水上日食

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Eclipse on the Water
• 影像來源 kah 版權：Elliot Severn
• 投稿到 APOD ê 美麗相片：6 月 10 號 ê 日食相片
• 台文翻譯：An-Li Tsai (NCU)

[漢羅] 水上日食

「食」ê 出現是成對 ê。 一年會出現兩改，發生 tī 食季，一季 差不多 34 工，彼當陣太陽、月球、kah 地球差不多排仝排。 月娘初一十五 ê 月相 差兩禮拜，拄仔好會產生月食 kah 日食。 偏食通常會 tī 每一个食季出現。 毋閣有當時仔 tī 仝一个食季，月娘初一十五行到 giōng 欲排仝一條線，這个時陣 to̍h 會產生成對 ê 日全食 kah 月全食（抑是一个全食 kah 一个環食）。 這改 ê 食季，tī 5 月 26 十五暝彼工 ê 月全食 發生了後，紲落來 ê 初一，確實 tī 地球北爿 ê 烏影軌跡 產生一个金環日食。 這張相片 to̍h 是這改 ê 日食，是 6 月 10 號 tī 美國東北爿 Connecticut 州 Stratford ê 釣魚碼頭翕 ê。

[POJ] Chúi-siōng Ji̍t-si̍t

"Sit" ê chhut-hiān sī sēng-tùi ê. Chi̍t-nî ē chhut-hiān nn̄g-kái, hoat-seng tī si̍t-kùi, chi̍t-kùi chha-put-to saⁿ-cha̍p-sì kang, hit-tang-chūn Thài-iông, Goe̍h-kiû, kah Tē-kiû chha-put-to pâi kâng-pâi. Goe̍h-kiû chhoe-it cha̍p-gō͘ ê goe̍h-siòng chha nn̄g-lé-pài, tú-á-hó ē sán-seng goe̍h-si̍t kah ji̍t-si̍t. Phian-si̍t thong-siông ē tī múi-chi̍t-ê si̍t-kùi chhut-hiān. M̄-koh ū-tang-sî-á tī kâng chi̍t-ê si̍t-kùi, goe̍h-niû chhoe-it cha̍p-gō͘ kiâⁿ kàu giōng-beh pâi kâng chi̍t-tiâu sòaⁿ, Chi̍t-ê sî-chūn to̍h ē sán-seng sêng-tùi ê ji̍t-choân-si̍t kah goe̍h-choân-si̍t (iah-sī chi̍t-ê choân-si̍t kah chi̍t-ê khoân-si̍t). Chit-kái ê si̍t-kùi, tī gō͘ goe̍h jī-la̍k cha̍p-gō͘-mê hit-kang ê goe̍h-choân-si̍t hoat-seng liáu-āu, sòa-lo̍h-lâi ê chhoe-it, khak-si̍t tī Tē-kiû pak-pêng ê o͘-iáⁿ kúi-jiah sán-seng chi̍t-ê kim-khoân ji̍t-si̍t. Chit-tiuⁿ siòng-phìⁿ to̍h sī chit-kái ê ji̍t-si̍t, sī la̍k-goe̍h cha̍p-hō tī Bí-kok tang-pak-pêng Connecticut chiu Stratford ê tiò-hî bé-thâu hip--ê.

[KIP] Tsuí-siōng Ji̍t-si̍t

"Sit" ê tshut-hiān sī sīng-tuì ê. Tsi̍t-nî ē tshut-hiān nn̄g-kái, huat-sing tī si̍t-kuì, tsi̍t-kuì tsha-put-to sann-tsa̍p-sì kang, hit-tang-tsūn Thài-iông, Gue̍h-kiû, kah Tē-kiû tsha-put-to pâi kâng-pâi. Gue̍h-kiû tshue-it tsa̍p-gōo ê gue̍h-siòng tsha nn̄g-lé-pài, tú-á-hó ē sán-sing gue̍h-si̍t kah ji̍t-si̍t. Phian-si̍t thong-siông ē tī muí-tsi̍t-ê si̍t-kuì tshut-hiān. M̄-koh ū-tang-sî-á tī kâng tsi̍t-ê si̍t-kuì, gue̍h-niû tshue-it tsa̍p-gōo kiânn kàu giōng-beh pâi kâng tsi̍t-tiâu suànn, Tsi̍t-ê sî-tsūn to̍h ē sán-sing sîng-tuì ê ji̍t-tsuân-si̍t kah gue̍h-tsuân-si̍t (iah-sī tsi̍t-ê tsuân-si̍t kah tsi̍t-ê khuân-si̍t). Tsit-kái ê si̍t-kuì, tī gōo gue̍h jī-la̍k tsa̍p-gōo-mê hit-kang ê gue̍h-tsuân-si̍t huat-sing liáu-āu, suà-lo̍h-lâi ê tshue-it, khak-si̍t tī Tē-kiû pak-pîng ê oo-iánn kuí-jiah sán-sing tsi̍t-ê kim-khuân ji̍t-si̍t. Tsit-tiunn siòng-phìnn to̍h sī tsit-kái ê ji̍t-si̍t, sī la̍k-gue̍h tsa̍p-hō tī Bí-kok tang-pak-pîng Connecticut tsiu Stratford ê tiò-hî bé-thâu hip--ê.

[English] Eclipse on the Water

Eclipses tend to come in pairs. Twice a year, during an eclipse season that lasts about 34 days, Sun, Moon, and Earth can nearly align. Then the full and new phases of the Moon separated by just over 14 days create a lunar and a solar eclipse. Often partial eclipses are part of any eclipse season. But sometimes the alignment at both new moon and full moon phases during a single eclipse season is close enough to produce a pair of both total (or a total and an annular) lunar and solar eclipses. For this eclipse season, the New Moon following the Full Moon's total lunar eclipse on May 26 did produce an annular solar eclipse along its northerly shadow track. That eclipse is seen here in a partially eclipsed sunrise on June 10, photographed from a fishing pier in Stratford, Connecticut in the northeastern US.

詞彙學習