圓形 ê 日暈

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Circular Sun Halo
• 影像來源 kah 版權：Vincenzo Mirabella
• 台文翻譯：An-Li Tsai (NCU)

[漢羅] 圓形 ê 日暈

你敢有想欲看著 kā 日頭箍牢 ê 環？ Tī 全世界 ê 日時欲看著這个景色，攏是 真簡單 ê 代誌。 這是薄懸卷雲內底 無仝方向排列 ê 冰晶 產生 ê 22 度闊 ê 圓形日暈，是比虹較捷看著。 這張影像是 5 月 29 tī 意大利 羅馬 附近，用智慧型手機仔 翕 ê。 你若是較細膩 kā 日頭閘 leh，差不多用一个指頭仔尾，按呢你 to̍h 會當看著 平常時看會著 ê 日暈環。 這个日暈 ê 特徵角度，差不多愛 kā 你 ê 手骨伸長，指頭仔拍開，ùi 大頭拇 kah 尾指 ê 角度欲仝。 若是欲看 火環日食，是有較困難。 今仔日（6月10號）拄仔好會當看著這个特殊 ê 環形日食，嘛叫做 火環。 你若是徛 tī 月球產生 ê 狹細烏影帶內底，to̍h 有法度看著。 這个烏影帶迒過加拿大、格陵蘭、北極、kah 露西亞東爿。 毋閣日偏食會當 tī 較闊 ê 範圍 看著，包括亞洲北爿、歐洲、kah 美國 ê 一部份。

[POJ] Îⁿ-hêng ê Ji̍t-n̄g

Lí kám ū siūⁿ-beh khòaⁿ-tio̍h kā ji̍t-thâu kho͘-tiâu ê khoân? Tī choân-sè-kài ê ji̍t-sî beh khòaⁿ-tio̍h chit-ê kéng-sek, lóng sī chin kán-tan ê tāi-chì. Che sī po̍h koân kńg-hûn lāi-té bô-kâng hong-hiòng pâi-lia̍t ê peng-chiⁿ sán-seng ê jī-cha̍p-jī tō͘ khoah ê îⁿ-hêng ji̍t-n̄g, sī pí khēng khah chia̍p khòaⁿ-tio̍h. Chit-tiuⁿ iáⁿ-siōng sī gō͘-goe̍h jī-káu tī I-thá-lī Lô-má hū-kīn, iōng tì-hūi-hêng chhiú-ki-á hip--ê. Lí nā-sī khah sè-lī kā ji̍t-thâu cha̍h-leh, chha-put-to iōng chi̍t-ê chéng-thâu-á-bóe, án-ne lí to̍h ē-tàng khòaⁿ-tio̍h pêng-siông-sî khòaⁿ-ē-tio̍h ê ji̍t-n̄g-khoân. Chit-ê ji̍t-n̄g ê te̍k-teng kak-tō͘, chha-put-to ài kā lī ê chhiú-kut chhun-tn̂g, chéng-thâu-á phah-khui, ùi tōa-thâu-bó kah bóe-cháiⁿ ê kak-tō͘ beh kâng. Nā-sī beh khòaⁿ hóe-khoân ji̍t-si̍t, sī ū khah khùn-lân. Kin-á-ji̍t (la̍k goe̍h cha̍p hō) tú-á-hó ē-tàng khòaⁿ-tio̍h chit-ê te̍k-sû ê khoân-hêng ji̍t-si̍t, mā kiò-chò Hóe-khoân. Lí nā-sī khiā tī Goe̍h-kiû sán-seng ê e̍h-sè o͘-iáⁿ-tōa lāi-té, to̍h ū-hoat-tō͘ khòaⁿ-tio̍h. Chit-ê o͘-iáⁿ-tòa ē hāⁿ kòe Kha-ná-tà, Keh-lêng-lân, pak-ke̍k, kah Lō͘-se-a tang-pêng. M̄-koh ji̍t-phian-si̍t ē-tàng tī khah khoah ê hoān-ûi khòaⁿ-tio̍h, pau-koat A-chiu pak-pêng, Au-chiu, kah Bí-kok ê chi̍t-pō͘-hūn.

[KIP] Înn-hîng ê Ji̍t-n̄g

Lí kám ū siūnn-beh khuànn-tio̍h kā ji̍t-thâu khoo-tiâu ê khuân? Tī tsuân-sè-kài ê ji̍t-sî beh khuànn-tio̍h tsit-ê kíng-sik, lóng sī tsin kán-tan ê tāi-tsì. Tse sī po̍h kuân kńg-hûn lāi-té bô-kâng hong-hiòng pâi-lia̍t ê ping-tsinn sán-sing ê jī-tsa̍p-jī tōo khuah ê înn-hîng ji̍t-n̄g, sī pí khīng khah tsia̍p khuànn-tio̍h. Tsit-tiunn iánn-siōng sī gōo-gue̍h jī-káu tī I-thá-lī Lô-má hū-kīn, iōng tì-huī-hîng tshiú-ki-á hip--ê. Lí nā-sī khah sè-lī kā ji̍t-thâu tsa̍h-leh, tsha-put-to iōng tsi̍t-ê tsíng-thâu-á-bué, án-ne lí to̍h ē-tàng khuànn-tio̍h pîng-siông-sî khuànn-ē-tio̍h ê ji̍t-n̄g-khuân. Tsit-ê ji̍t-n̄g ê ti̍k-ting kak-tōo, tsha-put-to ài kā lī ê tshiú-kut tshun-tn̂g, tsíng-thâu-á phah-khui, uì tuā-thâu-bó kah bué-tsáinn ê kak-tōo beh kâng. Nā-sī beh khuànn hué-khuân ji̍t-si̍t, sī ū khah khùn-lân. Kin-á-ji̍t (la̍k gue̍h tsa̍p hō) tú-á-hó ē-tàng khuànn-tio̍h tsit-ê ti̍k-sû ê khuân-hîng ji̍t-si̍t, mā kiò-tsò Hué-khuân. Lí nā-sī khiā tī Gue̍h-kiû sán-sing ê e̍h-sè oo-iánn-tuā lāi-té, to̍h ū-huat-tōo khuànn-tio̍h. Tsit-ê oo-iánn-tuà ē hānn kuè Kha-ná-tà, Keh-lîng-lân, pak-ki̍k, kah Lōo-se-a tang-pîng. M̄-koh ji̍t-phian-si̍t ē-tàng tī khah khuah ê huān-uî khuànn-tio̍h, pau-kuat A-tsiu pak-pîng, Au-tsiu, kah Bí-kok ê tsi̍t-pōo-hūn.

[English] Circular Sun Halo

Want to see a ring around the Sun? It's easy to do in daytime skies around the world. Created by randomly oriented ice crystals in thin high cirrus clouds, circular 22 degree halos are visible much more often than rainbows. This one was captured by smart phone photography on May 29 near Rome, Italy. Carefully blocking the Sun, for example with a finger tip, is usually all that it takes to reveal the common bright halo ring. The halo's characteristic angular radius is about equal to the span of your hand, thumb to little finger, at the end of your outstretched arm. Want to see a ring of fire eclipse? That's harder. The spectacular annular phase of today's (June 10) solar eclipse, known as a ring of fire, is briefly visible only if you're standing along the Moon's narrow shadow track that passes over parts of northern Canada, Greenland, the Arctic, and eastern Russia. The solar eclipse is partial though, when seen from broader regions, including northern Asia, Europe, and parts of the US.

詞彙學習