半人馬座 Omega

Page(/daily/2021/06/20210603)

探索宇宙1!逐工會揀一幅無仝款 ê 影像抑是相片,𤆬你熟似咱這个迷人 ê 宇宙,閣有專業天文學者2為你解說3

[漢羅] 半人馬座 Omega

球形星團 半人馬座 Omega 嘛叫做 NGC 5149,離咱有 15,000 光年遠。 這个星團內底差不多有 1 千萬粒比太陽閣較老 ê 恆星,to̍h tī 直徑 150 光年闊 ê 範圍內底。 Tī 咱銀河系 ê 銀暈內底,有 200 球左右 ê 球形星團 leh 泅。 這个是內底上大上光彼球。 雖然講大部份 ê 星團內底 ê 恆星年歲 kah 組成成份攏仝款,毋閣這个神祕 ê 半人馬座 Omega 煞展示出 tī 星團內底,嘛是會使有 無仝 ê 恆星種類、無仝年歲 ê 分佈、kah 無仝 ê 化學豐度。 實際上,半人馬座 Omega 可能是 一个較細粒 ê 星系 kah 銀河合併了後 ê 殘核。 Tī 這張 清楚 ê 彩色 望遠鏡景色 內底,半人馬座 Omega ê 紅巨星(黃色色調)實在是真好揣。

[POJ] Pòaⁿ-jîn-má-chō Omega

Kiû-hêng seng-thoân Pòaⁿ-jîn-má-chō Omega mā kiò-chò NGC ngó͘-it-sù-kiú, lî lán ū chi̍t-bān-gō͘-chheng kng-nî hn̄g. Chit-ê seng-thoân lāi-té chha-put-to ū chi̍t-chheng-bān lia̍p pí Thài-iông koh-khah lāu ê hêng-chhiⁿ, to̍h chiⁿ tī ti̍t-kèng chi̍t-pah-gō͘-cha̍p kng-nî khoah ê hoān-ûi lāi-té. Tī lán Gîn-hô-hē ê gîn-n̄g lāi-té, ū nn̄g-pah kiû chó-iū ê kiû-hêng seng-thoân leh siû. Chit-ê sī lāi-té siōng-tōa siōng-kng hit kiû。 Sui-jiân-kóng tōa-pō͘-hūn ê seng-thoân lāi-té ê hêng-chhiⁿ nî-hòe kah cho͘-sêng sêng-hūn lóng kāng-khoán, m̄-koh chit-ê sîn-pì ê Pòaⁿ-jîn-má-chō Omega soah tián-sī chhut tī seng-thoân lāi-té, mā-sī ē-sái ū bô-kâng ê hêng-chhiⁿ chióng-lūi, bô-kâng nî-hòe ê hun-pò͘, kah bô-kâng ê hòa-ha̍k hong-tō͘. Si̍t-chè-siōng, Pòaⁿ-jîn-má-chō Omega khó-lêng sī chi̍t-ê khah sè-lia̍p ê seng-hē kah Gîn-hô ha̍p-pèng liáu-āu ê chân-he̍k.

[KIP] Puànn-jîn-má-tsō Omega

Kiû-hîng sing-thuân Puànn-jîn-má-tsō Omega mā kiò-tsò NGC ngóo-it-sù-kiú, lî lán ū tsi̍t-bān-gōo-tshing kng-nî hn̄g. Tsit-ê sing-thuân lāi-té tsha-put-to ū tsi̍t-tshing-bān lia̍p pí Thài-iông koh-khah lāu ê hîng-tshinn, to̍h tsinn tī ti̍t-kìng tsi̍t-pah-gōo-tsa̍p kng-nî khuah ê huān-uî lāi-té. Tī lán Gîn-hô-hē ê gîn-n̄g lāi-té, ū nn̄g-pah kiû tsó-iū ê kiû-hîng sing-thuân leh sîu. Tsit-ê sī lāi-té siōng-tuā siōng-kng hit kiû。 Sui-jiân-kóng tuā-pōo-hūn ê sing-thuân lāi-té ê hîng-tshinn nî-huè kah tsoo-sîng sîng-hūn lóng kāng-khuán, m̄-koh tsit-ê sîn-pì ê Puànn-jîn-má-tsō Omega suah tián-sī tshut tī sing-thuân lāi-té, mā-sī ē-sái ū bô-kâng ê hîng-tshinn tsióng-luī, bô-kâng nî-huè ê hun-pòo, kah bô-kâng ê huà-ha̍k hong-tōo. Si̍t-tsè-siōng, Puànn-jîn-má-tsō Omega khó-lîng sī tsi̍t-ê khah sè-lia̍p ê sing-hē kah Gîn-hô ha̍p-pìng liáu-āu ê tsân-hi̍k.

[English] Millions of Stars in Omega Centauri

Globular star cluster Omega Centauri, also known as NGC 5139, is some 15,000 light-years away. The cluster is packed with about 10 million stars much older than the Sun within a volume about 150 light-years in diameter. It’s the largest and brightest of 200 or so known globular clusters that roam the halo of our Milky Way galaxy. Though most star clusters consist of stars with the same age and composition, the enigmatic Omega Cen exhibits the presence of different stellar populations with a spread of ages and chemical abundances. In fact, Omega Cen may be the remnant core of a small galaxy merging with the Milky Way. Omega Centauri’s red giant stars (with a yellowish hue) are easy to pick out in this sharp color telescopic view.

詞彙學習(漢羅/POJ/KIP/華語/English)

  • 【半人馬座 Omega】Pòaⁿ-jîn-má-chō Omega/Puànn-jîn-má-tsō Omega/半人馬座 Omega/Omega Centauri
  • 【直徑】ti̍t-kèng/ti̍t-kìng/直徑/diameter
  • 【銀暈】gîn-n̄g/gîn-n̄g/銀暈/halo
  • 【球形星團】kiû-hêng seng-thoân/kiû-hîng sing-thuân/球狀星團/globular cluster
  • 【殘核】chân-he̍k/tsân-hi̍k/殘核/remnant core

  1. 阮嘛有 Podcast面冊InstagramTwitter,會逐工 kā 你提醒有新 ê 翻譯 kah 錄音。閣有 YouTube 頻道,有當時仔會出新 ê 影片,緊來追蹤! ↩︎

  2. 本站 ê 介紹 (台語/華語)FAQ (華語) ↩︎

  3. 看無台文?阮讀予你聽!已經錄過 ê 文章 ↩︎

昨昏 ê 圖:有恆星、氣體、kah 磁性 ê 銀河中心 明仔載 ê 圖:血色 ê 魔月