龍骨座 AG 星 ê 爆發雲

Page(/daily/2021/05/20210526.md)

探索宇宙1!逐工會揀一幅無仝款 ê 影像抑是相片,𤆬你熟似咱這个迷人 ê 宇宙,閣有專業天文學者2為你解說3

[漢羅] 龍骨座 AG 星 ê 爆發雲

是啥物產生這个特別 ê 雲? Tī 這張 2021 年 ê 哈伯影像 中央是 龍骨座 AG 星,伊是一粒超巨星,to̍h tī 南天 ê 龍骨座內底,離咱有 2 萬光年遠。 這粒恆星發射 ê 能量是太陽 ê 一百萬倍,予 龍骨座 AG 星 成做咱 銀河系 內底上光 ê 恆星之一。 龍骨座 AG 星 kah 伊 ê 厝邊星 龍骨座 Eta 星,攏是真罕得看著 ê 強藍光變星 (LBV) 這類 ê 恆星。 這款星足稀罕 ê,而且 in 有 足猛 ê 爆發。 Tī 龍骨座 AG 星 邊仔 ê 星雲,應該是這款 爆發 發生上無一擺以上 ê 殘骸。 這个星雲有 5 光年 闊,估計差不多有 10 ê 太陽質量 ê 氣體,而且上無嘛有 1 萬歲矣。 這个哈伯影像 是紀念哈伯太空望遠鏡 發射 31 週年。 這是頭一擺翕著完整 ê 星雲,提供逐家一个新 ê 角度來看伊 ê 結構 kah 塗粉量。 這寡 LBV 代表 ê 是一寡 超巨星 較晏較短 ê 性命階段。 毋閣欲解說 in 是按怎恬袂落來,實在是無簡單。 因為欲 解說 大質量恆星是按怎運作 ê,tùi 人類來講是一个真大 ê 挑戰

[POJ] Liông-kut-chō AG chhiⁿ ê po̍k-hoat-hûn

Sī siáⁿ-mih sán-seng chit-ê te̍k-pia̍t ê hûn? Tī chit-tiuⁿ jī-khòng-jī-it nî ê Ha-peh iáⁿ-siōng tiong-ng sī Liông-kut-chō AG chhiⁿ, i sī chi̍t-lia̍p chhiau-kū-chhiⁿ, to̍h tī lâm-thian ê Liông-kut-chō lāi-té, lî lán ū nn̄g-bān kng-nî hn̄g. Chit-lia̍p hêng-chhiⁿ hoat-siā ê lêng-liōng sī Thài-iông ê chi̍t-pah-bān pōe, hō͘ Liông-kut-chō AG chhiⁿ chiâⁿ-chò lán Gîn-hô-hē lāi-té siōng-kng ê hêng-chhiⁿ chi-it. Liông-kut-chō AG chhiⁿ kah i ê chhù-piⁿ-chhiⁿ Liông-kut-chō Eta chhiⁿ, lóng sī chin hán-tek khòaⁿ-tio̍h ê Kiông-nâ-kng piàn-chhiⁿ (LBV) chit-lūi ê hêng-chhiⁿ. Chit-khoán chhiⁿ chiok hi-hán–ê, jî-chhiáⁿ in ū chiok mé ê po̍k-hoat. Tī Liông-kut-chō AG chhiⁿ piⁿ-á ê seng-hûn, èng-kai sī chit-khoán po̍k-hoat hoat-seng siōng-bô chi̍t-pái í-siōng ê chân-hâi. Chit-ê seng-hûn ū gō͘ kng-nî khoah, kó͘-kè chha-put-to ū cha̍p ê thài-iông chit-liōng ê khì-thé, jî-chhiáⁿ siōng-bô mā ū chi̍t-bān hòe ah. Chit-ê Ha-peh iáⁿ-siōng sī kì-liām Ha-peh thài-khong-bōng-oán-kiàⁿ hoat-siā saⁿ-cha̍p-it chiu-nî. Che sī thâu-chi̍t-pái hip-tio̍h oân-chéng ê seng-hûn, thê-kiong ta̍k-ke chi̍t-ê sin–ê kak-tō͘ lâi khòaⁿ i ê kiat-kò͘ kah thô͘-hún-liōng. Chit-kóa LBV tāi-piáu ê sī chi̍t-kóa chhiau-kū-chhiⁿ khah-òaⁿ khah-té ê sìⁿ-miā kai-tōaⁿ. M̄-koh beh kái-soeh in sī án-ná tiām bōe lo̍h-lâi, si̍t-chāi sī bô kán-tan. In-ūi beh kái-soeh tōa-chit-liōng hêng-chhiⁿ sī án-ná ūn-chok ê, tùi jîn-lūi lâi-kóng sī chi̍t-ê chin tōa ê thiáu-chiàn.

[KIP] Liông-kut-tsō AG tshinn ê po̍k-huat-hûn

Sī siánn-mih sán-sing tsit-ê ti̍k-pia̍t ê hûn? Tī tsit-tiunn jī-khòng-jī-it nî ê Ha-peh iánn-siōng tiong-ng sī Liông-kut-tsō AG tshinn, i sī tsi̍t-lia̍p tshiau-kū-tshinn, to̍h tī lâm-thian ê Liông-kut-tsō lāi-té, lî lán ū nn̄g-bān kng-nî hn̄g. Tsit-lia̍p hîng-tshinn huat-siā ê lîng-liōng sī Thài-iông ê tsi̍t-pah-bān puē, hōo Liông-kut-tsō AG tshinn tsiânn-tsò lán Gîn-hô-hē lāi-té siōng-kng ê hîng-tshinn tsi-it. Liông-kut-tsō AG tshinn kah i ê tshù-pinn-tshinn Liông-kut-tsō Eta tshinn, lóng sī tsin hán-tik khuànn-tio̍h ê Kiông-nâ-kng piàn-tshinn (LBV) tsit-luī ê hîng-tshinn. Tsit-khuán tshinn tsiok hi-hán–ê, jî-tshiánn in ū tsiok mé ê po̍k-huat. Tī Liông-kut-tsō AG tshinn pinn-á ê sing-hûn, ìng-kai sī tsit-khuán po̍k-huat huat-sing siōng-bô tsi̍t-pái í-siōng ê tsân-hâi. Tsit-ê sing-hûn ū gōo kng-nî khuah, kóo-kè tsha-put-to ū tsa̍p ê thài-iông tsit-liōng ê khì-thé, jî-tshiánn siōng-bô mā ū tsi̍t-bān huè ah. Tsit-ê Ha-peh iánn-siōng sī kì-liām Ha-peh thài-khong-bōng-uán-kiànn huat-siā sann-tsa̍p-it tsiu-nî. Tse sī thâu-tsi̍t-pái hip-tio̍h uân-tsíng ê sing-hûn, thê-kiong ta̍k-ke tsi̍t-ê sin–ê kak-tōo lâi khuànn i ê kiat-kòo kah thôo-hún-liōng. Tsit-kuá LBV tāi-piáu ê sī tsi̍t-kuá tshiau-kū-tshinn khah-uànn khah-té ê sìnn-miā kai-tuānn. M̄-koh beh kái-sueh in sī án-ná tiām buē lo̍h-lâi, si̍t-tsāi sī bô kán-tan. In-uī beh kái-sueh tuā-tsit-liōng hîng-tshinn sī án-ná ūn-tsok ê, tuì jîn-luī lâi-kóng sī tsi̍t-ê tsin tuā ê thiáu-tsiàn.

[English] The Outburst Clouds of Star AG Car

What created these unusual clouds? At the center of this 2021 Hubble image sits AG Carinae, a supergiant star located about 20,000 light-years away in the southern constellation Carina. The star’s emitted power is over a million times that of the Sun, making AG Carinae one of the most luminous stars in our Milky Way galaxy. AG Carinae and its neighbor Eta Carinae belong to the scarce Luminous Blue Variable (LBV) class of stars, known for their rare but violent eruptions. The nebula that surrounds AG Car is interpreted as a remnant of one or more such outbursts. This nebula measures 5 light-years across, is estimated to contain about 10 solar masses of gas, and to be at least 10,000 years old. This Hubble image, taken to commemorate Hubble’s 31st launch anniversary, is the first to capture the whole nebula, offering a new perspective on its structure and dust content. The LBVs represent a late and short stage in the lives of some supergiant stars, but explaining their restlessness remains a challenge to humanity’s understanding of how massive stars work.

詞彙學習(台語漢字/POJ/KIP/華語漢字/English)

  • 【龍骨座】Liông-kut-chō/Liông-kut-tsō/船底座/Carina
  • 【龍骨座 AG 星】Liông-kut-chō AG chhiⁿ/Liông-kut-tsō AG tshinn/船底座 AG/AG Carinae, AG Car
  • 【龍骨座 Eta 星】Liông-kut-chō Eta chhiⁿ/Liông-kut-tsō Eta tshinn/船底座 Eta/Eta Carinae
  • 【強藍光變星】Kiông-nâ-kng Piàn-chhiⁿ/Kiông-nâ-kng Piàn-tshinn/高光度藍變星/Luminous Blue Variable (LBV)
  • 【太陽質量】thài-iông chit-liōng/thài-iông tsit-liōng/太陽質量/solar mass
  • 【超巨星】chhiau-kū-chhiⁿ/tshiau-kū-tshinn/超巨星/supergiant star

  1. 逐工 ê 圖 ↩︎

  2. 本站 ê 介紹 (台語/華語) ↩︎

  3. FAQ (華語) ↩︎

昨昏 ê 圖:月全食時陣 ê 月娘 明仔載 ê 圖:月食 kah 銀河