月全食時陣 ê 月娘

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：The Moon During a Total Lunar Eclipse
• 影像來源：Wang Letian & Zhang Jiajie
• 月食快報：2021 年 5 月 26 台灣 ê 月全食
• 台文翻譯：An-Li Tsai (NCU)

[漢羅] 月全食時陣 ê 月娘

月全食 ê 時陣月娘看起來會是啥款？ 這个縮時攝影影片 是 kā 2018 年 1 月 31 彼工 5 點鐘久 ê 月食影像，用數位處理 ê 方式來保持 月球 ê 光度，閣 kā 伊固定 tī 影片中央。 咱會先看會著 月圓，因為 月食 干焦會發生 tī 月圓 ê 時陣。 背景有足濟恆星行過，因為 月食 ê 時陣，月球踅 地球 leh 行。 煞落來咱會看著地球 圓形 ê 烏影 行過月球。 烏影邊界 ê 淺藍色色調是 kah 地球天空是按怎是藍色 ê 欲仝。 烏影 中心 ê 深紅色色調是 kah 日頭袂落海 ê 時陣是按怎看起來是紅色 ê 欲仝。 明仔載，蹛 tī 南亞、太平洋、美國西南爿 ê 人，應該會當看著 血色 ê 超級月娘 月全食。 Tī 遮講--ê 血色，是 leh 形容 月全食 ê 月娘 有較紅。 超級月娘 是 leh 形容伊 ê 角大細有較大。 這是因為伊 tī 踅地球 小可仔長株圓軌道 leh 行 ê 時陣，行到離地球較近 ê 所在。

[POJ] Goe̍h-choân-si̍t sî-chūn ê goe̍h-niû

Goe̍h-choân-si̍t ê sî-chūn goe̍h-niû khòaⁿ--khí-lâi ē sī siáⁿ-khoán? Chit-ê sok-sî-liap-iáⁿ iáⁿ-phìⁿ sī kā jī-khòng-it-pat nî it goe̍h saⁿ-cha̍p-it hit-kang gō͘ tiám-cheng kú ê goe̍h-si̍t iáⁿ-siōng, iōng só͘-ūi chhú-lí ê hong-sek lâi pó-chhî Goe̍h-kiû ê kng-tō͘, koh kā i kò͘-tēng tī iáⁿ-phìⁿ tiong-ng. Lán ē seng khòaⁿ-tio̍h goe̍h-îⁿ, in-ūi goe̍h-si̍t kan-na ē hoat-seng tī goe̍h-îⁿ ê sî-chūn. Pōe-kéng ū chiok-chōe hêng-chhiⁿ kiâⁿ-kòe, in-ūi goe̍h-si̍t ê sî-chūn, Goe̍h-kiû se̍h Tē-kiû leh kiâⁿ. Sòa-lo̍h-lâi lán ē khòaⁿ-tio̍h Tē-kiû îⁿ-hêng ê o͘-iáⁿ kiâⁿ-kòe Goe̍h-kiû. O͘-iáⁿ pian-kài ê chhián-nâ-sek sek-tiāu sī kah Tē-kiû thian-khong sī án-ná sī nâ-sek ê beh-kâng. O͘-iáⁿ tiong-sim ê chhim-âng-sek sek-tiāu sī kā ji̍t-thâu beh lo̍h-hái ê sî-chūn sī án-ná khòaⁿ--khí-lâi sī âng-sek ê beh-kâng. Miâ-á-chài, tòa tī Lâm-a, Thài-pêng-iûⁿ, Bí-kok se-lâm-pêng ê lâng, èng-kai ē-tàng khòaⁿ-tio̍h hoeh-sek ê chhiau-kip goe̍h-niû goe̍h-choân-si̍t. Tī chia kóng--ê hoeh-sek, sī leh hêng-iông goe̍h-choân-si̍t ê goe̍h-niû ū khah âng. Chhiau-kip goe̍h-niû sī leh hêng-iông i ê kak-tōa-sè ū khah tōa. Che sī in-ūi i tī se̍h Tē-kiû sió-khóa-á tn̂g-tu-îⁿ kúi-tō leh kiâⁿ ê sî-chūn, kiâⁿ kàu lî Tē-kiû khah kīn ê só͘-chāi.

[KIP] Gue̍h-tsuân-si̍t sî-tsūn ê gue̍h-niû

Gue̍h-tsuân-si̍t ê sî-tsūn gue̍h-niû khuànn-khí-lâi ē sī siánn-khuán? Tsit-ê sok-sî-liap-iánn iánn-phìnn sī kā jī-khòng-it-pat nî it gue̍h sann-tsa̍p-it hit-kang gōo tiám-tsing kú ê gue̍h-si̍t iánn-siōng, iōng sóo-uī tshú-lí ê hong-sik lâi pó-tshî Gue̍h-kiû ê kng-tōo, koh kā i kòo-tīng tī iánn-phìnn tiong-ng. Lán ē sing khuànn-tio̍h gue̍h-înn, in-uī gue̍h-si̍t kan-na ē huat-sing tī gue̍h-înn ê sî-tsūn. Puē-kíng ū tsiok-tsuē hîng-tshinn kiânn-kuè, in-uī gue̍h-si̍t ê sî-tsūn, Gue̍h-kiû se̍h Tē-kiû leh kiânn. Suà-lo̍h-lâi lán ē khuànn-tio̍h Tē-kiû înn-hîng ê oo-iánn kiânn-kuè Gue̍h-kiû. OO-iánn pian-kài ê tshián-nâ-sik sik-tiāu sī kah Tē-kiû thian-khong sī án-ná sī nâ-sik ê beh-kâng. OO-iánn tiong-sim ê tshim-âng-sik sik-tiāu sī kā ji̍t-thâu beh lo̍h-hái ê sî-tsūn sī án-ná khuànn-khí-lâi sī âng-sik ê beh-kâng. Miâ-á-tsài, tuà tī Lâm-a, Thài-pîng-iûnn, Bí-kok se-lâm-pîng ê lâng, ìng-kai ē-tàng khuànn-tio̍h hueh-sik ê tshiau-kip gue̍h-niû gue̍h-tsuân-si̍t. Tī tsia kóng--ê hueh-sik, sī leh hîng-iông gue̍h-tsuân-si̍t ê gue̍h-niû ū khah âng. Tshiau-kip gue̍h-niû sī leh hîng-iông i ê kak-tuā-sè ū khah tuā. Tse sī in-uī i tī se̍h Tē-kiû sió-khuá-á tn̂g-tu-înn kuí-tō leh kiânn ê sî-tsūn, kiânn kàu lî Tē-kiû khah kīn ê sóo-tsāi.

[English] The Moon During a Total Lunar Eclipse

How does the Moon's appearance change during a total lunar eclipse? The featured time-lapse video was digitally processed to keep the Moon bright and centered during the 5-hour eclipse of 2018 January 31. At first the full moon is visible because only a full moon can undergo a lunar eclipse. Stars move by in the background because the Moon orbits the Earth during the eclipse. The circular shadow of the Earth is then seen moving across the Moon. The light blue hue of the shadow's edge is related to why Earth's sky is blue, while the deep red hue of the shadow's center is related to why the Sun appears red when near the horizon. Tomorrow, people living from southeast Asia, across the Pacific, to the southwest Americas may get to see a Blood Supermoon Total Lunar Eclipse. Here the term blood refers to the (likely) red color of the fully eclipsed Moon, while the term supermoon indicates the Moon's slightly high angular size -- due to being relatively close to the Earth in its slightly elliptical orbit.

詞彙學習