銀河樹

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：The Galaxy Tree
• 影像來源 kah 版權：César Vega Toledano；星座解說：Judy Schmidt
• 台文翻譯：An-Li Tsai (NCU)

[漢羅] 銀河樹

咱先來看這个樹林仔。 這是 kha-mé-lah sàng tī 西班牙 ê 城鎮 Salamanca 注意著 ê 橡樹林。 In 修剪了後 看起來足特別 ê。 咱紲落來來看咱 ê 銀河。 這个 kha-mé-lah sàng 踮遮等到 半暝 2 點，等 銀河系 升--起來，peh 到這欉雄偉橡樹 ê 頭殼頂。 Ùi 這个特別揀--過 ê 角度來 kā 看，銀河 ê 塗粉帶 干焦是 ùi 樹枝延續出去 ê 遐爾自然。 落尾咱來看光 ê 部份。 手電仔 to̍h 囥 tī 這欉樹仔較遠彼爿，投影出這个 剪影。 是講拄仔好，其他 ê 樹仔欉嘛 tī 有較光 ê 地平線頂懸現出 sio-siâng ê 剪影。 這是 tī 2015 年翕 ê 一張感光 30 秒 ê 相片，閣有經過數位處理來加強銀河 ê 部份。

[POJ] Gîn-hô-chhiu

Lán seng-lâi khòaⁿ chit-ê chhiū-nâ-á. Che sī kha-mé-lah sàng tī Se-pan-gâ ê siâⁿ-tìn Salamanca chù-ì tio̍h ê siōng-chhiū-nâ. In siu-chián liáu-āu khòaⁿ--khí-lâi chiok te̍k-pia̍t ê. Lán sòa-lo̍h-lâi lâi khòaⁿ lán ê Gîn-hô. Chit-ê kha-mé-lah sàng tiám chia tán kàu pòaⁿ-mî nn̄g tiám, tán Gîn-hô-hē seng--khí-lâi, peh kàu chit-châng hiông-úi siōng-chhiū ê thâu-khak-téng. Ùi chit-ê te̍k-pia̍t kéng--kòe ê kak-tō͘ lâi kā khòaⁿ, Gîn-hô ê thô͘-hún-tòa kan-na sī ùi chhiū-ki iân-sio̍k chhut-khì ê hiah-nī chū-jiân. Lo̍h-bóe lán lâi khòaⁿ kng ê pō͘-hūn. Chhiú-tiān-á to̍h khǹg tī chit-châng chhiū-á khah-hn̄g hit-pêng, tâu-iáⁿ chhut chit-ê chián-iáⁿ. Sī-kóng tú-á-hó, kî-tha ê chhiū-á-châng mā tī ū khah-kng ê tē-pêng-sòaⁿ téng-koân hiàn-chhut sio-siâng ê chián-iáⁿ. Che sī tī jī-khòng-it-ngó͘ nî hip--ê chi̍t-tiuⁿ kám-kng saⁿ-cha̍p bió ê siòng-phìⁿ, koh-ū kéng-kòe só͘-ūi chhú-lí lâi ka-kiông Gîn-hô ê pō͘-hūn.

[KIP] Gîn-hô-tshiu

Lán sing-lâi khuànn tsit-ê tshiū-nâ-á. Tse sī kha-mé-lah sàng tī Se-pan-gâ ê siânn-tìn Salamanca tsù-ì tio̍h ê siōng-tshiū-nâ. In siu-tsián liáu-āu khuànn-khí-lâi tsiok ti̍k-pia̍t ê. Lán suà-lo̍h-lâi lâi khuànn lán ê Gîn-hô. Tsit-ê kha-mé-lah sàng tiám tsia tán kàu puànn-mî nn̄g tiám, tán Gîn-hô-hē sing--khí-lâi, peh kàu tsit-tsâng hiông-uí siōng-tshiū ê thâu-khak-tíng. Uì tsit-ê ti̍k-pia̍t kíng--kuè ê kak-tōo lâi kā khuànn, Gîn-hô ê thôo-hún-tuà kan-na sī uì tshiū-ki iân-sio̍k tshut-khì ê hiah-nī tsū-jiân. Lo̍h-bué lán lâi khuànn kng ê pōo-hūn. Tshiú-tiān-á to̍h khǹg tī tsit-tsâng tshiū-á khah-hn̄g hit-pîng, tâu-iánn tshut tsit-ê tsián-iánn. Sī-kóng tú-á-hó, kî-tha ê tshiū-á-tsâng mā tī ū khah-kng ê tē-pîng-suànn tíng-kuân hiàn-tshut sio-siâng ê tsián-iánn. Tse sī tī jī-khòng-it-ngóo nî hip--ê tsi̍t-tiunn kám-kng sann-tsa̍p bió ê siòng-phìnn, koh-ū kíng-kuè sóo-uī tshú-lí lâi ka-kiông Gîn-hô ê pōo-hūn.

[English] The Galaxy Tree

First came the trees. In the town of Salamanca, Spain, the photographer noticed how distinctive a grove of oak trees looked after being pruned. Next came the galaxy. The photographer stayed up until 2 am, waiting until the Milky Way Galaxy rose above the level of a majestic looking oak. From this carefully chosen perspective, dust lanes in the galaxy appear to be natural continuations to branches of the tree. Last came the light. A flashlight was used on the far side of the tree to project a silhouette. By coincidence, other trees also appeared as similar silhouettes across the relatively bright horizon. The featured image was captured as a single 30-second frame in 2015 and processed to digitally enhance the Milky Way.

詞彙學習