彗星、海翁、kah 棍仔球桮

Page(/daily/2021/05/20210513.md)

探索宇宙1!逐工會揀一幅無仝款 ê 影像抑是相片,𤆬你熟似咱這个迷人 ê 宇宙,閣有專業天文學者2為你解說3

[漢羅] 彗星、海翁、kah 棍仔球桮

彗星 ATLAS (C/2020 R4) tī 3 月 1 號 倚近太陽,tī 4 月 23 倚近地球。 咱會當 tī 這張美麗 ê 望遠鏡視野內底,看著伊有一个較暗 ê 青色彗尾 kah 一个較短 ê 彗尾。 這張影像是 5 月 5 號 tī 這位予人翕著 ê。 彗星 to̍h tī 北方星座獵犬座(拍獵 ê 狗)ê 範圍內底。 咱嘛會當 tī 差不多仝一个視線方向看著兩个有名 ê 背景星系,海翁星系 kah 棍仔球桮星系。 Tī 正爿頂懸 ê NGC 4631,雖然看起來親像是一隻海翁,毋閣伊 kah 銀河欲平大,是一个坦敧身 ê 捲螺仔星系,離咱有 2500 萬光年遠。 Tī NGC 4631 倒爿下跤 ê NGC 4656/7,是一組交互作用星系,in 看起來 to̍h 親像是一支拗彎 ê 棍仔 leh 運動。 實際上,這个變形 koh 相濫 ê 氣體痕跡,若是用其他波段來 kā 檢查,to̍h 會看著這隻宇宙海翁 kah 棍仔球桮 tī 古早時代有真密切 ê 接觸。 這个 欲轉去 ê 彗星 ATLAS,離地球干焦 7「光分」遠,應該會 tī 1000 年以內 閣再拜訪內部太陽系

[POJ] Hui-chhiⁿ, Hái-ang, kah Kùn-á-kiû-poe

Hui-chhiⁿ ATLAS (C/jī-khòng-jī-khòng R-sù) tī saⁿ goe̍h it hō óa-kīn Thài-iông, tī sì goe̍h jī-saⁿ óa-kīn Tē-kiû. Lán ē-tàng tī chi̍t-tiuⁿ bí-lē ê bōng-oán-kiàⁿ sī-iá lāi-té, khòaⁿ-tio̍h i ū chi̍t-ê khah-àm ê chheⁿ-sek hūi-bóe kah chi̍t-ê khah-té ê hūi-chhiⁿ. Chit-tiuⁿ iáⁿ-siōng sī gō͘ goe̍h gō͘ hō tī chit-ūi hō͘ lâng hip-tio̍h-ê. Hui-chhiⁿ to̍h tī pak-hong seng-chō La̍h-khián-chō (phah-la̍h ê káu) ê hoān-ûi lāi-té. Lán mā ē-tàng tī chha-put-to kāng-chi̍t-ê sī-sòaⁿ-hong-hiòng khòaⁿ-tio̍h nn̄g-ê ū-miâ ê pōe-kéng seng-hē, Hái-ang seng-hē kah Kùn-á-kiû-poe seng-hē. Tī chiàⁿ-pêng téng-koân ê NGC sù-lio̍k-sam-it, sù-jian khòaⁿ-khí-lâi chhiⁿ-chhiūⁿ sī chi̍t-chiah hái-ang, m̄-koh i kah Gîn-hô beh pêⁿ-tōa, sī chi̍t-ê thán-khi-sin ê kńg-lê-á seng-hē, lî lán ū nn̄g-chheng-gō͘-pah-bān kng-nî hn̄g. Tī NGC sù-lio̍k-sam-it tò-pêng ē-kha ê NGC sù-lio̍k-ngó͘-lio̍k kah chhit, sī chi̍t-cho͘ kau-hō͘-chok-iōng seng-hē, in khòaⁿ-khí-lâi to̍h chhiⁿ-chhiūⁿ sī chi̍t-ki āu-oan ê kùn-á leh ūn-tōng. Si̍t-chè-siōng, chit-ê piàn-hêng koh sio-lām ê khì-thé hûn-jiah, nā-sī iōng kî-tha pho-tōaⁿ lâi kā kiám-cha, to̍h ē khòaⁿ-tio̍h chit-chiah ú-tiū hái-ang kah kùn-á-kiû-poe tī kó͘-chá-sî-tāi ū chin bi̍t-chhiat ê chiap-chhiok. Chit-ê beh tńg–khì ê hūi-chhiⁿ ATLAS, lî Tē-kiû kan-na chhit “kng-hun” hn̄g, eng-kai ē tī chi̍t-chheng nî í-lâi koh-chài pài-hóng Lōe-pō͘ Thài-iông-hē.

[KIP] Hui-tshinn, Hái-ang, kah Kùn-á-kiû-pue

Hui-tshinn ATLAS (C/jī-khòng-jī-khòng R-sù) tī sann gue̍h it hō uá-kīn Thài-iông, tī sì gue̍h jī-sann uá-kīn Tē-kiû. Lán ē-tàng tī tsi̍t-tiunn bí-lē ê bōng-uán-kiànn sī-iá lāi-té, khuànn-tio̍h i ū tsi̍t-ê khah-àm ê tshenn-sik huī-bué kah tsi̍t-ê khah-té ê huī-tshinn. Tsit-tiunn iánn-siōng sī gōo gue̍h gōo hō tī tsit-uī hōo lâng hip-tio̍h-ê. Hui-tshinn to̍h tī pak-hong sing-tsō La̍h-khián-tsō (phah-la̍h ê káu) ê huān-uî lāi-té. Lán mā ē-tàng tī tsha-put-to kāng-tsi̍t-ê sī-suànn-hong-hiòng khuànn-tio̍h nn̄g-ê ū-miâ ê puē-kíng sing-hē, Hái-ang sing-hē kah Kùn-á-kiû-pue sing-hē. Tī tsiànn-pîng tíng-kuân ê NGC sù-lio̍k-sam-it, sù-jian khuànn-khí-lâi tshinn-tshiūnn sī tsi̍t-tsiah hái-ang, m̄-koh i kah Gîn-hô beh pênn-tuā, sī tsi̍t-ê thán-khi-sin ê kńg-lê-á sing-hē, lî lán ū nn̄g-tshing-gōo-pah-bān kng-nî hn̄g. Tī NGC sù-lio̍k-sam-it tò-pîng ē-kha ê NGC sù-lio̍k-ngóo-lio̍k kah tshit, sī tsi̍t-tsoo kau-hōo-tsok-iōng sing-hē, in khuànn-khí-lâi to̍h tshinn-tshiūnn sī tsi̍t-ki āu-uan ê kùn-á leh ūn-tōng. Si̍t-tsè-siōng, tsit-ê piàn-hîng koh sio-lām ê khì-thé hûn-jiah, nā-sī iōng kî-tha pho-tuānn lâi kā kiám-tsa, to̍h ē khuànn-tio̍h tsit-tsiah ú-tiū hái-ang kah kùn-á-kiû-pue tī kóo-tsá-sî-tāi ū tsin bi̍t-tshiat ê tsiap-tshiok. Tsit-ê beh tńg–khì ê huī-tshinn ATLAS, lî Tē-kiû kan-na tshit “kng-hun” hn̄g, ing-kai ē tī tsi̍t-tshing nî í-lâi koh-tsài pài-hóng Luē-pōo Thài-iông-hē.

[English] The Comet, the Whale, and the Hockey Stick

Closest to the Sun on March 1, and closest to planet Earth on April 23, this Comet ATLAS (C/2020 R4) shows a faint greenish coma and short tail in this pretty, telescopic field of view. Captured at its position on May 5, the comet was within the boundaries of northern constellation Canes Venatici (the Hunting Dogs), and near the line-of-sight to intriguing background galaxies popularly known as the Whale and the Hockey Stick. Cetacean in appearance but Milky Way sized, NGC 4631 is a spiral galaxy seen edge-on at the top right, some 25 million light-years away. NGC 4656/7 sports the bent-stick shape of interacting galaxies below and left of NGC 4631. In fact, the distortions and mingling trails of gas detected at other wavelengths suggest the cosmic Whale and Hockey Stick have had close encounters with each other in their distant past. Outbound and only about 7 light-minutes from Earth this Comet ATLAS should revisit the inner solar system in just under 1,000 years.

詞彙學習(台語漢字/POJ/KIP/華語漢字/English)

  • 【彗星】hūi-chhiⁿ/huī-tshinn/彗星/comet
  • 【海翁星系】Hái-ang seng-hē/Hái-ang sing-hē/鯨魚星系/Whale Galaxy
  • 【棍仔球桮星系】Kùn-á-kiû-poe seng-hē/Kùn-á-kiû-pue seng-hē/曲棍球棍星系/Hockey Stick Galaxy
  • 【慧鬚】hūi-chhiu/huī-tshiu/彗髮/coma
  • 【彗尾】hūi-bóe/huī-bué/彗尾/comet tail
  • 【獵犬座】La̍h-khián-chō/La̍h-khián-tsō/獵犬座/Canes Venatici
  • 【視線方向】sī-sòaⁿ-hong-hiòng/sī-suànn-hong-hiòng/視線方向/line-of-sight
  • 【坦敧身星系】thán-khi-sin seng-hē/thán-khi-sin sing-hē/側向星系/edge-on galaxy
  • 【捲螺仔星系】kńg-lê-á seng-hē/kńg-lê-á sing-hē/螺旋星系/spiral galaxy
  • 【交互作用星系】kāu-hō͘-chok-iōng seng-hē/kāu-hōo-tsok-iōng sing-hē/交互作用星系/interacting galaxies
  • 【光分】kng-hun/kng-hun/光分/light-minute
  • 【內部太陽系】Lōe-pō͘ Thài-iông-hē/Luē-pōo Thài-iông-hē/內部太陽系/the Inner Solar System

  1. 逐工 ê 圖 ↩︎

  2. 本站 ê 介紹 (台語/華語) ↩︎

  3. FAQ (華語) ↩︎

昨昏 ê 圖:流星 kah 對日照 明仔載 ê 圖:M104:草帽仔星系