星團 M35 kah NGC 2158

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Star Clusters M35 and NGC 2158
• 影像來源 kah 版權：CFHT, Coelum, MegaCam, J.-C. Cuillandre (CFHT) & G. A. Anselmi (Coelum)
• 台文翻譯：An-Li Tsai (NCU)

[漢羅] 星團 M35 kah NGC 2158

星團有近–ê 有遠–ê，有少年–ê 有 老–ê，有散–ê 有集中–ê。 這張影像 展示 tī 仝一个星場內底 ê 兩个 開放星團 相對照。 Tī 倒爿下跤 ê 是 M35，伊離咱算近 ê，差不多有 2800 光年 遠。 伊是有較少年，差不多是 1.5 億歲，嘛較散，差不多是 2500 粒恆星 tī 這个 30 光年闊 ê 空間內底。 較光 ê 藍光星，定定會當提來分辨少年 ê 開放星團， to̍h 親像 M35。 相對來講，tī 正爿頂懸 ê NGC 2158，是比 M35 閣較遠 4 倍，閣較老 10 倍，嘛較集中。 NGC 2158 內底較光 ê 藍光星已經 家己爆炸 矣，所以星團 ê 光這馬主要是一寡較老 ê kah 較黃 ê 恆星來 ê。 一般來講，開放星團會 tī 咱 ê 銀河系 ê 星系盤面頂揣著，而且不管 tī 佗位內底攏會有 100 到 10000 粒恆星。 In 攏差不多 tī 仝一个時間形成 ê。 開放星團 M35 kah NGC 2158 攏會使用細台望遠鏡 tùi 雙生仔星座（雙生仔座）ê 方向 揣著。

[POJ] Seng-thoân M-saⁿ-cha̍p-gō͘ kah NGC jī-it-ngó͘-pat

Seng-thoân ū kīn–ê ū hn̄g–ê, ū siàu-liân–ê ū lāu–ê, ū sòaⁿ–ê ū chi̍p-tiong–ê. Chit-tiuⁿ iáⁿ-siōng tiān-sī tī kāng-chi̍t-ê seng-tiûⁿ lāi-té ê nn̄g-ê khai-hòng-seng-thoân sio tùi-chiàu. Tī tò-pêng ē-kha ê sī M-saⁿ-cha̍p-gō͘, i lî lán sǹg kīn-ê, chha-put-to ū nn̄g-chheng-poeh-pah kng-nî hn̄g. I sī ū khah siàu-liân, chha-put-to sī it-tiám-gō͘ ek hòe, mā khah sòaⁿ, chha-put-to sī nn̄g-chheng-gō͘-pah lia̍p hêng-chhiⁿ tī chit-ê saⁿ-cha̍p kng-nî khoah ê khong-kan lāi-té. Khah kng ê nâ-kng-chhiⁿ, tiāⁿ-tiāⁿ ē-tàng thê-lâi hun-piān siàu-liân ê khai-hòng-seng-thoân, to̍h chhin-chhiūⁿ M-saⁿ-cha̍p-gō͘. Siong-tùi lâi-kóng, tī chiàⁿ-pêng téng-koân ê NGC jī-it-gō͘-pat, sī pí M-saⁿ-cha̍p-gō͘ koh khah hn̄g sì-poe, koh khah lāu cha̍p-poe, mā khah chi̍p-tiong. NGC 2158 lāi-té khah kng ê nâ-kng-chhiⁿ í-keng ka-tī po̍k-chà ah, só͘-í seng-thoân ê kng chit-má chú-iàu sī chi̍t-kóa khah-lāu–ê kah khah-n̂g–ê hêng-chhiⁿ lâi–ê. It-poaⁿ lâi-kóng, khai-hòng-seng-thoân ē tī lán ê Gîn-hô-hē ê seng-hē-pôaⁿ bīn-téng chhōe-tio̍h, jî-chhiáⁿ put-koán tī tó-ūi lāi-té lóng ē ū chi̍t-pah kàu chi̍t-bān lia̍p hêng-chhiⁿ. In lóng chha-put-to tī kāng-chi̍t-ê sî-kan hêng-sêng–ê. Khai-hòng-seng-thoân M-saⁿ-cha̍p-gō͘ kah NGC jī-it-ngó͘-pat lóng ē-sái iōng sè-tâi bōng-oán-kiàⁿ tùi Siang-siⁿ-á seng-chō (Siang-siⁿ-á-chō) ê hong-hiòng chhōe-tio̍h.

[KIP] Sing-thuân M-sann-tsa̍p-gōo kah NGC jī-it-ngóo-pat

Sing-thuân ū kīn–ê ū hn̄g–ê, ū siàu-liân–ê ū lāu–ê, ū suànn–ê ū tsi̍p-tiong–ê. Tsit-tiunn iánn-siōng tiān-sī tī kāng-tsi̍t-ê sing-tiûnn lāi-té ê nn̄g-ê khai-hòng-sing-thuân sio tuì-tsiàu. Tī tò-pîng ē-kha ê sī M-sann-tsa̍p-gōo, i lî lán sǹg kīn-ê, tsha-put-to ū nn̄g-tshing-pueh-pah kng-nî hn̄g. I sī ū khah siàu-liân, tsha-put-to sī it-tiám-gōo ik huè, mā khah suànn, tsha-put-to sī nn̄g-tshing-gōo-pah lia̍p hîng-tshinn tī tsit-ê sann-tsa̍p kng-nî khuah ê khong-kan lāi-té. Khah kng ê nâ-kng-tshinn, tiānn-tiānn ē-tàng thê-lâi hun-piān siàu-liân ê khai-hòng-sing-thuân, to̍h tshin-tshiūnn M-sann-tsa̍p-gōo. Siong-tuì lâi-kóng, tī tsiànn-pîng tíng-kuân ê NGC jī-it-gōo-pat, sī pí M-sann-tsa̍p-gōo koh khah hn̄g sì-pue, koh khah lāu tsa̍p-pue, mā khah tsi̍p-tiong. NGC 2158 lāi-té khah kng ê nâ-kng-tshinn í-king ka-tī po̍k-tsà ah, sóo-í sing-thuân ê kng tsit-má tsú-iàu sī tsi̍t-kuá khah-lāu–ê kah khah-n̂g–ê hîng-tshinn lâi–ê. It-puann lâi-kóng, khai-hòng-sing-thuân ē tī lán ê Gîn-hô-hē ê puânn bīn-tíng tshuē-tio̍h, jî-tshiánn put-kuán tī tó-uī lāi-té lóng ē ū tsi̍t-pah kàu tsi̍t-bān lia̍p hîng-tshinn. In lóng tsha-put-to tī kāng-tsi̍t-ê sî-kan hîng-sîng–ê. Khai-hòng-sing-thuân M-sann-tsa̍p-gōo kah NGC jī-it-ngóo-pat lóng ē-sái iōng sè-tâi bōng-uán-kiànn tuì Siang-sinn-á sing-tsō (Siang-sinn-á-tsō) ê hong-hiòng tshuē-tio̍h.

[English] Star Clusters M35 and NGC 2158

Clusters of stars can be near or far, young or old, diffuse or compact. The featured image shows two quite contrasting open star clusters in the same field. M35, on the lower left, is relatively nearby at 2800 light years distant, relatively young at 150 million years old, and relatively diffuse, with about 2500 stars spread out over a volume 30 light years across. Bright blue stars frequently distinguish younger open clusters like M35. Contrastingly, NGC 2158, on the upper right, is four times more distant than M35, over 10 times older, and much more compact. NGC 2158’s bright blue stars have self-destructed, leaving cluster light to be dominated by older and yellower stars. In general, open star clusters are found in the plane of our Milky Way Galaxy, and contain anywhere from 100 to 10,000 stars – all of which formed at nearly the same time. Both open clusters M35 and NGC 2158 can be found together with a small telescope toward the constellation of the Twins (Gemini).

詞彙學習（漢羅/POJ/KIP/華語/English）

• 【開放星團】khai-hòng-seng-thoân/khai-hòng-sing-thuân/開放星團/open cluster
• 【星系盤】seng-hē-pôaⁿ/sing-hē-puânn/星系盤/galactic plane
• 【光年】kng-nî/kng-nî/光年/light-year
• 【銀河系】Gîn-hô-hē/Gîn-hô-hē/銀河系/Milky Way Galaxy
• 【藍光星】nâ-kng-chhiⁿ/nâ-kng-tshinn/藍色恆星/blue star
• 【雙生仔星座】Siang-siⁿ-á seng-chō/Siang-sinn-á sing-tsō/雙胞胎星座/the constellation of the Twins
• 【雙生仔座】Siang-siⁿ-á-chō/Siang-tsú-tsō/雙子座/Gemini