水星紅石 3 號發射矣！

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Mercury-Redstone 3 Launch
• 影像來源：NASA
• 台文翻譯：An-Li Tsai (NCU)

[漢羅] 水星紅石 3 號發射矣！

六十冬前，tī 太空時代拄開始 彼陣，NASA 控制中心「放炮仔起鼓」，用紅石火箭 kā 水星太空人 Alan Shepard 送去太空。 伊坐 ê 彼台 足狹 ê 太空艙 去予人號做自由 7 號。 這个有歷史意義 ê 水星紅石 3 號（MR-3） 太空船，是 tī 美國東岸時間 1961 年 5 月 5 號早起 9 點 34，ùi Florida 州 ê Cape Canaveral 發射 ê。 這規个過程有 tùi 全世界 ê 電視觀眾轉播放送。 自由 7 號 是美國頭一个太空飛行，比蘇聯較晏無到一個月 ê 時間。 蘇聯頭一擺 ê 人類太空探索，是由蘇聯太空人 Yuri Gagarin 進行 ê。 這个 15 分鐘 ê 踅地球飛行試驗，飛到 187 公里懸 ê 懸度，上緊 ê 速度有到一點鐘 8262 公里遐爾緊。 當 Alan Shepard tī 自由 7 號飛到上懸附近 ê 時陣 越頭看，伊會當看著 Florida 西海岸、Florida 中部 ê Okeechobe 湖、墨西哥灣、kah 巴哈馬 ê 面模。 Shepard 較慢會 ùi 閣較遠 ê 角度來 看地球。 而且伊會 tī 阿波羅 14 號任務 內底擔任指揮官，tī 月球面頂行踏。

[POJ] Chúi-chhiⁿ Âng-chio̍h saⁿ hō hoat-siā ah!

La̍k-cha̍p tang chêng, tī thài-khong-sî-tāi tú khai-sí hit-chūn, NASA khòng-chè-tiong-sim “Pàng phàu-á khí-kó͘”, iōng Âng-chio̍h hóe-chìⁿ kā Chúi-chhiⁿ thài-khong-jîn Alan Shepard sàng khì thài-khong. I che ê hit-tâi chiok-e̍h-ê thài-khong-chhng khì hō͘ lâng hō-chò Chū-iû chhit hō. Chit-ê ū le̍k-sú ì-gī ê Chúi-chhiⁿ Âng-chiok saⁿ hō (MR-saⁿ) thài-khong-chûn, sī tī Bí-kok tang-hōaⁿ sî-kan i̍t-kiú-lio̍k-it nî gō͘ goe̍h gō͘ hō chái-khí káu tiám saⁿ-cha̍p-sì, ùi Florida chiu ê Cape Canaveral hoat-siā ê. Che kui-ê kòe-têng ū tùi choán-sè-kài ê tiān-sī koan-chiòng choán-pò hòng-sàng. Chū-iû chhit hō sī Bí-kok thâu-chi̍t-ê thài-khong hui-hêng, pí So͘-liân khah òaⁿ bô-kàu chi̍t-ko-goe̍h ê sî-kan. So͘-liân thâu-chi̍t-pái ê jîn-lūi thài-khong thàm-soh, sī iû So͘-liân thài-khong-jîn Yuri Gagarin chìn-hêng ê. Chit-ê cha̍p-gō͘ hun-cheng ê se̍h Tē-kiû hui-hêng chhì-giām, poe-kàu chi̍t-pah-poeh-cha̍p-chhit kong-lí koân ê koân-tō͘, siōng-kín ê sok-tō͘ ū-kàu chi̍t-tiám-cheng poeh-chheng-nn̄g-pah-la̍k-cha̍p-jī kong-lí hiah-nī kín. Tng Alan Shepard tī Chū-iû chhit hō poe-kàu siōng-koân hū-kīn ê sî-chūn oa̍t-thâu khòaⁿ, i ē-tàng khòaⁿ-tio̍h Florida se-hái-hōaⁿ, Florida tiong-pō͘ ê Okeechobe ô͘, Be̍k-se-ko-oan, kah Pá-ha-mah ê bīn-bô͘. Shepard khah bān ē ùi koh-khah hn̄g ê kak-tō͘ lâi khòaⁿ Tē-kiû. jî-chhiáⁿ i ē tī A-pho-lô cha̍p-sì hō jīm-bū lāi-té tam-jīm chí-hui-koaⁿ, tī Goe̍h-kiû bīn-téng kiâⁿ-ta̍h.

[KIP] Kim-tshinn Âng-tsio̍h sann hō huat-siā ah!

La̍k-tsa̍p tang tsîng, tī thài-khong-sî-tāi tú khai-sí hit-tsūn, NASA khòng-tsè-tiong-sim “Pàng phàu-á khí-kóo”, iōng Âng-tsio̍h hué-tsìnn kā Kim-tshinn thài-khong-jîn Alan Shepard sàng khì thài-khong. I tse ê hit-tâi tsiok-e̍h-ê thài-khong-tshng khì hōo lâng hō-tsò Tsū-iû tshit hō. Tsit-ê ū li̍k-sú ì-gī ê Kim-tshinn Âng-tsiok sann hō (MR-sann) thài-khong-tsûn, sī tī Bí-kok tang-huānn sî-kan i̍t-kiú-lio̍k-it nî gōo gue̍h gōo hō tsái-khí káu tiám sann-tsa̍p-sì, uì Florida tsiu ê Cape Canaveral huat-siā ê. Tse kui-ê kuè-tîng ū tuì tsuán-sè-kài ê tiān-sī kuan-tsiòng tsuán-pò hòng-sàng. Tsū-iû tshit hō sī Bí-kok thâu-tsi̍t-ê thài-khong hui-hîng, pí Soo-liân khah uànn bô-kàu tsi̍t-ko-gue̍h ê sî-kan. Soo-liân thâu-tsi̍t-pái ê jîn-luī thài-khong thàm-soh, sī iû Soo-liân thài-khong-jîn Yuri Gagarin tsìn-hîng ê. Tsit-ê tsa̍p-gōo hun-tsing ê se̍h Tē-kiû hui-hîng tshì-giām, pue-kàu tsi̍t-pah-pueh-tsa̍p-tshit kong-lí kuân ê kuân-tōo, siōng-kín ê sok-tōo ū-kàu tsi̍t-tiám-tsing pueh-tshing-nn̄g-pah-la̍k-tsa̍p-jī kong-lí hiah-nī kín. Tng Alan Shepard tī Tsū-iû tshit hō pue-kàu siōng-kuân hū-kīn ê sî-tsūn ua̍t-thâu khuànn, i ē-tàng khuànn-tio̍h Florida se-hái-huānn, Florida tiong-pōo ê Okeetsobe ôo, Bi̍k-se-ko-uan, kah Pá-ha-mah ê bīn-bôo. Shepard khah bān ē uì koh-khah hn̄g ê kak-tōo lâi khuànn Tē-kiû. jî-tshiánn i ē tī A-pho-lô tsa̍p-sì hō jīm-bū lāi-té tam-jīm tsí-hui-kuann, tī Gue̍h-kiû bīn-tíng kiânn-ta̍h.

[English] Mercury-Redstone 3 Launch

Sixty years ago, near the dawn of the space age, NASA controllers “lit the candle” and sent Mercury astronaut Alan Shepard arcing into space atop a Redstone rocket. His cramped space capsule was dubbed Freedom 7. Broadcast live to a global television audience, the historic Mercury-Redstone 3 (MR-3) spacecraft was launched from Cape Canaveral Florida at 9:34 a.m. Eastern Time on May 5, 1961. The flight of Freedom 7, the first space flight by an American, followed less than a month after the first human venture into space by Soviet Cosmonaut Yuri Gagarin. The 15 minute sub-orbital flight achieved an altitude of 116 miles and a maximum speed of 5,134 miles per hour. As Shepard looked back near the peak of Freedom 7’s trajectory, he could see the outlines of the west coast of Florida, Lake Okeechobe in central Florida, the Gulf of Mexico, and the Bahamas. Shepard would later view planet Earth from a more distant perspective and walk on the Moon as commander of the Apollo 14 mission.

詞彙學習（漢羅/POJ/KIP/華語/English）

• 【水星紅石 3 號】Chúi-chhiⁿ Âng-chio̍h saⁿ hō/Tsuí-tshinn Âng-tsio̍h sann hō/水星紅石 3 號/Mercury-Redstone 3
• 【NASA 控制中心】NASA khòng-chè-tiong-sim/NASA khòng-tsè-tiong-sim/NASA 控制中心/NASA controllers
• 【紅石火箭】Âng-chio̍h hóe-chìⁿ/Âng-tsio̍h hué-tsìnn/紅石火箭/Redstone rocket
• 【自由 7 號】Chū-iû chhit hō/Tsū-iû tshit hō/自由 7 號/Freedom 7
• 【阿波羅 14 號任務】A-pho-lô cha̍p-sì hō jīm-bū/A-pho-lô tsa̍p-sì hō jīm-bū/阿波羅 14 號任務/Apollo 14 mission
• 【太空艙】thài-khong-chhng/thài-khong-tshng/太空艙/space capsule
• 【太空船】thài-khong-chûn/thài-khong-tsûn/太空船/spacecraft
• 【巴哈馬】Pá-ha-mah/Pá-ha-mah/巴哈馬/Bahamas
• 【墨西哥灣】Be̍k-se-ko-oan/Bi̍k-se-ko-uan/墨西哥灣/the Gulf of Mexico