去予風吹開 ê NGC 3199

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Windblown NGC 3199
• 影像來源 kah 版權：Mike Selby and Roberto Colombari
• 台文翻譯：An-Li Tsai (NCU)

[漢羅] 去予風吹開 ê NGC 3199

NGC 3199 離咱有 12,000 光年遠，是一隻 tī 南天航行 ê 星座，龍骨座，內底發光 ê 宇宙雲。 這个星雲 tī 狹頻假色影像 內底，有 75 光年闊。 雖然講這个深空影像差不多看會著規个完整 ê 氣波形體，毋閣伊看起來趨一爿，tī 面頂邊仔彼搭較光。 Tī 中央是 Wolf-Rayet 星，伊是一个大質量、高溫、短命 ê 恆星，會產生足強 ê 恆星風。 實際上，咱知影 Wolf-Rayet 星會製造有 足趣味外形 ê 星雲。 這是因為伊有足強 ê 恆星風，會 kā 邊仔 ê 星際物質掃開。 Tī 這个案例內底，這个足光 ê 雲邊可能是恆星犁過一个齊齊 ê 物質產生 ê 弓形衝擊，to̍h 親像是船行過水面仝款。 毋閣 測量 ê 結果 顯示，這个恆星並無直接徙去到較光彼爿。 所以上有可能 ê 解說是講，tī 恆星邊仔 ê 物質並無齊齊。 實際上，去予風吹 ê NGC 3199 較光彼爿，是一簇一簇、較密 ê。

[POJ] Khì hō͘ hong chhoe--khui-ê NGC sam-it-kiú-kiú

NGC sam-it-kiú-kiú lî lán ū chi̍t-bān-nn̄g-chheng kng-nî hn̄g, sī chi̍t-chiah tī lâm-thian hâng-hêng ê seng-chō, Liông-kut-chō, lāi-té hoat-kng ê ú-tiū-hûn. Chi̍t-ê seng-hûn tī e̍h-pîn ká-sek iáⁿ-siōng lāi-té, ū chhit-cha̍p-gō͘ kng-nî khoah. Sui-jiân-kóng, chit-ê chhim-khong iáⁿ-siōng chha-put-to khòaⁿ-ē-tio̍h kui-ê oân-chéng ê khí-pho hêng-thé, m̄-koh i khòaⁿ--khí-lâi chhu chi̍t-pêng, tī bīn-téng piⁿ-á hit-tah khah-kng. Tī tiong-ng sī Wolf-Rayet chhiⁿ, i sī chi̍t-ê tōa chit-liōng, ko-un, té-miā ê hêng-chhiⁿ, ē sán-seng chiok-kiông ê hêng-chhiⁿ-hong. Si̍t-chè-siōng, lán chai-iáⁿ Wolf-Rayet chhiⁿ ē chè-chō ū chiok-chhù-bī gōa-hêng ê seng-hûn. Che sī in-ūi i ū chiok-kiông ê hêng-chhiⁿ-hong, ē kā piⁿ-á ê seng-chè-bu̍t-chit sàu-khui. Tī chi̍t-ê àn-lē lāi-té, chit-ê chiok-kng ê hûn-piⁿ khó-lêng sī hêng-chhiⁿ lê-kòe chi̍t-ê chiâu-chê ê bu̍t-chit sán-seng ê kiong-hêng chhiong-kek, to̍h chhin-chhiūⁿ sī chûn kiâⁿ-kòe chúi-bīn kāng-khoán. M̄-koh chhek-liông ê kiat-kó hián-sī, chit-ê hêng-chhiⁿ pēng bô ti̍t-chiap sóa-khì kàu khah-kng hit-pêng. Só͘-í siōng ū khó-lêng ê kái-soeh sī kóng, tī hêng-chhiⁿ piⁿ-á ê bu̍t-chit pēng bô chiâu-chê. Si̍t-chè-siōng, khì hō͘ hong chhoe ê NGC sam-it-kiú-kiú khah-kng hit-pêng, sī chi̍t-chhok-chi̍t-chhok, khah bat ê.

[KIP] Khì hōo hong tshue--khui-ê NGC sam-it-kiú-kiú

NGC sam-it-kiú-kiú lî lán ū tsi̍t-bān-nn̄g-tshing kng-nî hn̄g, sī tsi̍t-tsiah tī lâm-thian hâng-hîng ê sing-tsō, Liông-kut-tsō, lāi-té huat-kng ê ú-tiū-hûn. Tsi̍t-ê sing-hûn tī e̍h-pîn ká-sik iánn-siōng lāi-té, ū tshit-tsa̍p-gōo kng-nî khuah. Sui-jiân-kóng, tsit-ê tshim-khong iánn-siōng tsha-put-to khuànn-ē-tio̍h kui-ê uân-tsíng ê khí-pho hîng-thé, m̄-koh i khuànn--khí-lâi tshu tsi̍t-pîng, tī bīn-tíng pinn-á hit-tah khah-kng. Tī tiong-ng sī Wolf-Rayet tshinn, i sī tsi̍t-ê tuā tsit-liōng, ko-un, té-miā ê hîng-tshinn, ē sán-sing tsiok-kiông ê hîng-tshinn-hong. Si̍t-tsè-siōng, lán tsai-iánn Wolf-Rayet tshinn ē tsè-tsō ū tsiok-tshù-bī guā-hîng ê sing-hûn. Tse sī in-uī i ū tsiok-kiông ê hîng-tshinn-hong, ē kā pinn-á ê sing-tsè-bu̍t-tsit sàu-khui. Tī tsi̍t-ê àn-lē lāi-té, tsit-ê tsiok-kng ê hûn-pinn khó-lîng sī hîng-tshinn lê-kuè tsi̍t-ê tsiâu-tsê ê bu̍t-tsit sán-sing ê kiong-hîng tshiong-kik, to̍h tshin-tshiūnn sī tsûn kiânn-kuè tsuí-bīn kāng-khuán. M̄-koh tshik-liông ê kiat-kó hián-sī, tsit-ê hîng-tshinn pīng bô ti̍t-tsiap suá-khì kàu khah-kng hit-pîng. Sóo-í siōng ū khó-lîng ê kái-sueh sī kóng, tī hîng-tshinn pinn-á ê bu̍t-tsit pīng bô tsiâu-tsê. Si̍t-tsè-siōng, khì hōo hong tshue ê NGC sam-it-kiú-kiú khah-kng hit-pîng, sī tsi̍t-tshok-tsi̍t-tshok, khah bat ê.

[English] Windblown NGC 3199

NGC 3199 lies about 12,000 light-years away, a glowing cosmic cloud in the nautical southern constellation of Carina. The nebula is about 75 light-years across in this narrowband, false-color view. Though the deep image reveals a more or less complete bubble shape, it does look very lopsided with a much brighter edge along the top. Near the center is a Wolf-Rayet star, a massive, hot, short-lived star that generates an intense stellar wind. In fact, Wolf-Rayet stars are known to create nebulae with interesting shapes as their powerful winds sweep up surrounding interstellar material. In this case, the bright edge was thought to indicate a bow shock produced as the star plowed through a uniform medium, like a boat through water. But measurements have shown the star is not really moving directly toward the bright edge. So a more likely explanation is that the material surrounding the star is not uniform, but clumped and denser near the bright edge of windblown NGC 3199.

詞彙學習