龍骨座星雲 ê 雲

Page(/daily/2021/05/20210502.md)

探索宇宙1!逐工會揀一幅無仝款 ê 影像抑是相片,𤆬你熟似咱這个迷人 ê 宇宙,閣有專業天文學者2為你解說3

[漢羅] 龍骨座星雲 ê 雲

是啥物造成龍骨座星雲 ê 雺霧? 這幅烏暗不祥 ê 圖實際上是 分子雲。 分子氣體 kah 塗粉 結幾若丸,雲厚到變做 袂透光。 毋閣比起來,這寡雲 ê 密度是比 地球 ê 大氣層 閣較薄。 這張是 龍骨座星雲 核心 ê 詳細影像,是氣體塗粉 烏暗 kah 彩色攏特別明顯 ê 部份。 是 2016 年中 tī 澳洲 Siding Spring 天文台 翕–ê。 雖然講星雲主要 ê 成份是 水素 氣體,tī 這張影像內底是青色 ê。 毋閣這張影像嘛用藍色 kah 紅色來追蹤成份內底有 硫磺 kah 酸素 發出 ê 光。 這規个 龍骨座星雲 予編做 NGC 3372,有 300 光年闊,離咱有 7000 光年 遠,to̍h tī 龍骨 內底。 龍骨座 Eta 星 是這个星雲內底能量上強 ê 恆星。 伊是 1830 年代天頂上光 ê 恆星,毋閣了後 煞雄雄變暗去

[POJ] Liông-kut-chō seng-hûn ê hûn

Sī siáⁿ-mih chō-sêng Liông-kut-chō seng-hûn ê bông-bū? Chit-pak o͘-àm put-siông ê tô͘ si̍t-chè-siōng sī hun-chú-hûn. Hūn-chú khì-thé kah thô͘-hún kat kúi-ā-oân, hûn kāu kàu piàn-chò bōe thàu-kng. M̄-koh pí–khí-lâi, chit-kóa hûn ê bi̍t-tō͘ sī pí Tē-kiû ê tōa-khì-chân koh-khah po̍h. Chit-tiuⁿ sī Liông-kut-chō seng-hûn he̍k-sim ê siông-sè iáⁿ-siōng, sī khì-thé tô͘-hûn hûn o͘-àm kah chhái-sek lóng te̍k-pia̍t bêng-hián ê pō͘-hūn. Sī jī-khòng-it-lio̍k nî-tiong tī Ò-chiu Siding Spring thian-bûn-tâi hip–ê. Sui-jiân-kóng seng-hûn chú-iàu ê sêng-hūn sī chúi-sò͘ khì-thé, tī chit-tiuⁿ iáⁿ-siōng lāi-té sī chheⁿ-sek ê. M̄-koh chit-tiuⁿ iáⁿ-siōng mā iōng nâ-sek kah âng-sek lâi tui-chong sêng-hūn lāi-té ū liû-hông kah sng-sò͘ hoat-chhut ê kng. Chit kui-ê Liông-kut-chō seng-hûn hō͘ pian-chò NGC sam-sam-chhit-jī, ū saⁿ-pah kng-nî khoah, lî lán ū chhit-chheng kng-nî hn̄g, to̍h tī Liông-kut-chō lāi-té. Liông-kut-chō Eta seng sī chit-ê seng-hûn lāi-té lêng-liōng siōng-kiông ê hêng-chhiⁿ. I sī it-pat-sam-khòng nî-tāi thiⁿ-téng siōng-kng ê hêng-chhiⁿ, m̄-koh liáu-āu soah hiông-hiông piàn-àm-khì.

[KIP] Liông-kut-tsō sing-hûn ê hûn

Sī siánn-mih tsō-sîng Liông-kut-tsō sing-hûn ê bông-bū? Tsit-pak oo-àm put-siông ê tôo si̍t-tsè-siōng sī hun-tsú-hûn. Hūn-tsú khì-thé kah thôo-hún kat kuí-ā-uân, hûn kāu kàu piàn-tsò buē thàu-kng. M̄-koh pí–khí-lâi, tsit-kuá hûn ê bi̍t-tōo sī pí Tē-kiû ê tuā-khì-tsân koh-khah po̍h. Tsit-tiunn sī Liông-kut-tsō sing-hûn hi̍k-sim ê siông-sè iánn-siōng, sī khì-thé tôo-hûn hûn oo-àm kah tshái-sik lóng ti̍k-pia̍t bîng-hián ê pōo-hūn. Sī jī-khòng-it-lio̍k nî-tiong tī Ò-tsiu Siding Spring thian-bûn-tâi hip–ê. Sui-jiân-kóng sing-hûn tsú-iàu ê sîng-hūn sī tsuí-sòo khì-thé, tī tsit-tiunn iánn-siōng lāi-té sī tshenn-sik ê. M̄-koh tsit-tiunn iánn-siōng mā iōng nâ-sik kah âng-sik lâi tui-tsong sîng-hūn lāi-té ū liû-hông kah sng-sòo huat-tshut ê kng. Tsit kui-ê Liông-kut-tsō sing-hûn hōo pian-tsò NGC sam-sam-tshit-jī, ū sann-pah kng-nî khuah, lî lán ū tshit-tshing kng-nî hn̄g, to̍h tī Liông-kut-tsō lāi-té. Liông-kut-tsō Eta sing sī tsit-ê sing-hûn lāi-té lîng-liōng siōng-kiông ê hîng-tshinn. I sī it-pat-sam-khòng nî-tāi thinn-tíng siōng-kng ê hîng-tshinn, m̄-koh liáu-āu suah hiông-hiông piàn-àm-khì.

[English] Clouds of the Carina Nebula

What forms lurk in the mists of the Carina Nebula? The dark ominous figures are actually molecular clouds, knots of molecular gas and dust so thick they have become opaque. In comparison, however, these clouds are typically much less dense than Earth’s atmosphere. Featured here is a detailed image of the core of the Carina Nebula, a part where both dark and colorful clouds of gas and dust are particularly prominent. The image was captured in mid-2016 from Siding Spring Observatory in Australia. Although the nebula is predominantly composed of hydrogen gas – here colored green, the image was assigned colors so that light emitted by trace amounts of sulfur and oxygen appear red and blue, respectively. The entire Carina Nebula, cataloged as NGC 3372, spans over 300 light years and lies about 7,500 light-years away in the constellation of Carina. Eta Carinae, the most energetic star in the nebula, was one of the brightest stars in the sky in the 1830s, but then faded dramatically.

詞彙學習(台語漢字/POJ/KIP/華語漢字/English)

  • 【龍骨座星雲】Liông-kut-chō seng-hûn/Liông-kut-tsō sing-hûn/船底座星雲/Carina Nebula
  • 【龍骨座】Liông-kut-chō/Liông-kut-tsō/船底座/Carina Nebula
  • 【龍骨座 Eta 星】Liông-kut-chō Eta-seng/Liông-kut-tsō Eta-sing/船底座 η 星、海山二/Eta Carinae
  • 【水素】chúi-sò͘/tsuí-sòo/氫/hydrogen
  • 【酸素】sng-sò͘/sng-sòo/氧/oxygen
  • 【硫磺】liû-hông/liû-hông/硫/sulfur

  1. 逐工 ê 圖 ↩︎

  2. 本站 ê 介紹 (台語/華語) ↩︎

  3. FAQ (華語) ↩︎

昨昏 ê 圖:獨創號翕 ê 毅力號 明仔載 ê 圖:阿波羅 11 號:地球、月球、太空船