鉛筆星雲 ê 超新星衝擊波

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Confirmed Muon Wobble Remains Unexplained
• 影像來源 kah 版權：Greg Turgeon & Utkarsh Mishra
• 台文翻譯：An-Li Tsai (NCU)

[漢羅] 鉛筆星雲 ê 超新星衝擊波

這个超新星 ê 衝擊波用時速 50 萬公里緊 ê 速度 kā 星際空間掃予空。 Tī 這張有清楚細節 ê 彩色組合圖 中央 kah 面頂有薄、光、閣有花樣 ê 雲絲。 伊是 tī 宇宙中發光氣體真久長 ê 波痕，是側面向咱 ê。 伊予編做 NGC 2736，伊搝長 ê 形體予伊得著這个足有名 ê 名，鉛筆星雲。 這个 鉛筆星雲 有 5 光年長，800 光年 遠。 毋過這干焦是 Vela 超新星殘骸 ê 小小一部份。 Vela 超新星殘骸本身 ê 直徑有 100 光年長。 自恆星延展 ê 屑仔雲 是 ùi 1 萬 1 千年前 爆炸 ê。 上開始，這个 衝擊波 是用時速幾仔百萬年 ê 速度 leh 運動，了後才慢落來，kā 邊仔 ê 星際物質掃甲清清氣氣。 Tī 這張狹頻 ê 闊幅 影像，紅色 kah 藍色分別表示 離子化 ê 水素 kah 酸素原子 ê 特徵發射光。

[POJ] Iân-pit seng-hûn ê chhiau-sin-seng chhiong-kek-pho

Chit-ê chhiau-sin-seng ê chhiong-kek-pho iōng sî-sok gō͘-cha̍p-bān kong-lí kín ê sok-tō͘ kā seng-chè khong-kan sàu hō͘ khang. Tī chit-tiuⁿ ū chheng-chhó sè-chiat ê chhái-sek cho͘-ha̍p-tô͘ tiong-ng kah bīn-téng ū po̍h, kng, kah ū hoe-iūⁿ ê hûn-si. I sī tī ú-tiū tiong hoat-kng khì-thé chin kú-tn̂g ê pho-hûn, sī chhek-bīn hiòng lán--ê. I hō͘ pian-chò NGC jī-chhit-sam-lio̍k, i giú-tn̂g ê hêng-thé hō͘ i tek-tio̍h chit-ê chiok ū-miâ ê miâ, Iân-pit seng-hûn. Chit-ê Ian-pit seng-hûn ū go͘ kng-nî tn̂g, peh-pah kng-nî hn̄g. M̄-koh che kan-na sī Vela chhiau-sin-seng chân-hâi ê sió-sió chi̍t-pō͘-hūn. Vela chhiau-sin-seng chân-hâi pún-sin ê ti̍t-kèng ū chi̍t-pah kng-nî tn̂g. Chū hêng-chhiⁿ iân-tián ê sap-á-hûn sī ùi chi̍t bān chi̍t chheng nî chêng po̍k-chà--ê. Siōng khai-sí, chit-ê chhiong-kek-pho sī iōng sî-sok kúi-á pah-bān nî ê sok-tō͘ leh ūn-tōng, liáu-āu chiah bān--lo̍h-lâi, kā piⁿ--á ê seng-chè bu̍t-chit sàu-kah chheng-chheng-khì-khì. Tī chit-tiuⁿ e̍h-pîn ê khoah-pak iáⁿ-siōng, âng-sek kah nâ-sek hun-pia̍t piáu-sī lî-chú-hòa ê chúi-sò͘ kah sng-sò͘ goân-chú ê te̍k-teng hoat-siā-kng.

[KIP] Iân-pit sing-hûn ê tshiau-sin-sing tshiong-kik-pho

Tsit-ê tshiau-sin-sing ê tshiong-kik-pho iōng sî-sok gōo-tsa̍p-bān kong-lí kín ê sok-tōo kā sing-tsè khong-kan sàu hōo khang. Tī tsit-tiunn ū tshing-tshó sè-tsiat ê tshái-sik tsoo-ha̍p-tôo tiong-ng kah bīn-tíng ū po̍h, kng, kah ū hue-iūnn ê hûn-si. I sī tī ú-tiū tiong huat-kng khì-thé tsin kú-tn̂g ê pho-hûn, sī tshik-bīn hiòng lán--ê. I hōo pian-tsò NGC jī-tshit-sam-lio̍k, i giú-tn̂g ê hîng-thé hōo i tik-tio̍h tsit-ê tsiok ū-miâ ê miâ, Iân-pit sing-hûn. Tsit-ê Ian-pit sing-hûn ū goo kng-nî tn̂g, peh-pah kng-nî hn̄g. M̄-koh tse kan-na sī Vela tshiau-sin-sing tsân-hâi ê sió-sió tsi̍t-pōo-hūn. Vela tshiau-sin-sing tsân-hâi pún-sin ê ti̍t-kìng ū tsi̍t-pah kng-nî tn̂g. Tsū hîng-tshinn iân-tián ê sap-á-hûn sī uì tsi̍t bān tsi̍t tshing nî tsîng po̍k-tsà--ê. Siōng khai-sí, tsit-ê tshiong-kik-pho sī iōng sî-sok kuí-á pah-bān nî ê sok-tōo leh ūn-tōng, liáu-āu tsiah bān--lo̍h-lâi, kā pinn--á ê sing-tsè bu̍t-tsit sàu-kah tshing-tshing-khì-khì. Tī tsit-tiunn e̍h-pîn ê khuah-pak iánn-siōng, âng-sik kah nâ-sik hun-pia̍t piáu-sī lî-tsú-huà ê tsuí-sòo kah sng-sòo guân-tsú ê ti̍k-ting huat-siā-kng.

[English] The Pencil Nebula Supernova Shockwave

This supernova shock wave plows through interstellar space at over 500,000 kilometers per hour. Near the middle and moving up in this sharply detailed color composite, thin, bright, braided filaments are actually long ripples in a cosmic sheet of glowing gas seen almost edge-on. Cataloged as NGC 2736, its elongated appearance suggests its popular name, the Pencil Nebula. The Pencil Nebula is about 5 light-years long and 800 light-years away, but represents only a small part of the Vela supernova remnant. The Vela remnant itself is around 100 light-years in diameter, the expanding debris cloud of a star that was seen to explode about 11,000 years ago. Initially, the shock wave was moving at millions of kilometers per hour but has slowed considerably, sweeping up surrounding interstellar material. In the featured narrow-band, wide field image, red and blue colors track, primarily, the characteristic glows of ionized hydrogen and oxygen atoms, respectively.

詞彙學習