有一巡一巡 ê NGC 1947

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Threads of NGC 1947
• 影像來源：ESA/Hubble & NASA, D. Rosario; Acknowledgment: L. Shatz
• 台文翻譯：An-Li Tsai (NCU)

[漢羅] 有一巡一巡 ê NGC 1947

NGC 1947 會使 tī 足遠 ê 南天深空，鬼頭刀星座 ê 邊界揣著。 伊離咱有 4000 萬光年遠。 Tī 這个去予恆星光照出來 ê 形影內底，看會著宇宙塗粉帶 to̍h 迒 tī 這个特殊星系 ê 中央足光 ê 區域面頂。 一般捲螺仔星系 ê 恆星、氣體、kah 塗粉，會綴捲螺仔手骨做伙行。 毋閣 NGC 1947 煞 kah in 無仝。 伊 ê 塗粉 kah 氣體煞無 kā 恆星綴牢牢。 有這款 較複雜 ê 無連紲運動 to̍h 表示，tī 這个星系看會著 ê 一巡一巡 ê 塗粉 kah 氣體，可能是 ùi 另外一个星系來 ê。 伊 to̍h tī 這个特殊 ê 星系過去 30 億年左右 ê 演化過程中，去予 NGC 1947 食去矣。 這張清楚 ê 哈伯影像 tī NGC 1947 ê 中央有 2 萬 5 千光年闊。 前景 ê 銀河系恆星 kah 小可仔較遠 ê 背景星系 to̍h tī 這幅圖內底四界掖。

[POJ] Ū chit-sûn chit-sûn ê NGC i̍t-kiú-sù-chhit

NGC i̍t-kiú-sù-chhit ē-sái tī chiok-hn̄g ê lâm-thian chhim-khong, Kúi-thâu-to seng-chō ê pian-kài chhōe-tio̍h. I lî lán ū sì-chheng bān kng-nî hn̄g. Tī chit-ê khì hō͘ hêng-chhiⁿ-kng chiò–chhut-lâi ê hêng-iáⁿ lāi-té, khòaⁿ-ē-tio̍h ú-tiū thô͘-hún-tòa to̍h hāⁿ tī chit-ê te̍k-sû seng-hē ê tiong-ng chiok-kng ê khu-he̍k bīn-téng. It-poaⁿ kńg-lê-á seng-hē ê hêng-chhiⁿ, khì-thé, kah thô͘-hún, ē tòe kńg-lê-á chhiú-kut chòe-hóe kiâⁿ. M̄-koh NGC i̍t-kiú-sù-chhit soah kah in bô-kâng. I ê thô͘-hún kah khì-thé soah bô kā hêng-chhiⁿ tòe-tiâu-tiâu. Ū chit-khoán khah ho̍k-cha̍p ê bô-liân-sòa ūn-tōng to̍h piáu-sī, tī chit-ê seng-hē khòaⁿ-ē-tio̍h ê chit-sûn chit-sûn ê thô͘-hún kah khì-thé, khó-lêng sī ùi lēng-gōa chi̍t-ê seng-hē lâi–ê. I to̍h tī chit-ê te̍k-sû ê seng-hē kòe-khì saⁿ-cha̍p ek-nî chó-iū ê ián-hòa kòe-têng tiong, khì hō͘ NGC i̍t-kiú-sù-chhit chia̍h–khì ah. Chit-tiuⁿ chheng-chhó͘ ê Ha-peh iáⁿ-siōng tī NGC i̍t-kiú-sù-chhit ê tiong-ng ū nn̄g-bān-gō͘-chheng kng-nî khoah. chiân-kéng ê Gîn-hô-hē hêng-chhiⁿ kah sió-khóa-á khah-hn̄g ê pōe-kéng seng-hē to̍h tī chit-pak-tô͘ lāi-té sì-kè iā.

[KIP] Ū tsit-sûn tsit-sûn ê NGC i̍t-kiú-sù-tshit

NGC i̍t-kiú-sù-tshit ē-sái tī tsiok-hn̄g ê lâm-thian tshim-khong, Kuí-thâu-to sing-tsō ê pian-kài tshuē-tio̍h. I lî lán ū sì-tshing bān kng-nî hn̄g. Tī tsit-ê khì hōo hîng-tshinn-kng tsiò–tshut-lâi ê hîng-iánn lāi-té, khuànn-ē-tio̍h ú-tiū thôo-hún-tuà to̍h hānn tī tsit-ê ti̍k-sû sing-hē ê tiong-ng tsiok-kng ê khu-hi̍k bīn-tíng. It-puann kńg-lê-á sing-hē ê hîng-tshinn, khì-thé, kah thôo-hún, ē tuè kńg-lê-á tshiú-kut tsuè-hué kiânn. M̄-koh NGC i̍t-kiú-sù-tshit suah kah in bô-kâng. I ê thôo-hún kah khì-thé suah bô kā hîng-tshinn tuè-tiâu-tiâu. Ū tsit-khuán khah ho̍k-tsa̍p ê bô-liân-suà ūn-tōng to̍h piáu-sī, tī tsit-ê sing-hē khuànn-ē-tio̍h ê tsit-sûn tsit-sûn ê thôo-hún kah khì-thé, khó-lîng sī uì līng-guā tsi̍t-ê sing-hē lâi–ê. I to̍h tī tsit-ê ti̍k-sû ê sing-hē kuè-khì sann-tsa̍p ik-nî tsó-iū ê ián-huà kuè-tîng tiong, khì hōo NGC i̍t-kiú-sù-tshit tsia̍h–khì ah. Tsit-tiunn tshing-tshóo ê Ha-peh iánn-siōng tī NGC i̍t-kiú-sù-tshit ê tiong-ng ū nn̄g-bān-gōo-tshing kng-nî khuah. tsiân-kíng ê Gîn-hô-hē hîng-tshinn kah sió-khuá-á khah-hn̄g ê puē-kíng sing-hē to̍h tī tsit-pak-tôo lāi-té sì-kè iā.

[English] Threads of NGC 1947

Found in deep southern skies within the boundaries of the constellation Dorado, NGC 1947 is some 40 million light-years distant. In silhouette against starlight, obscuring lanes of cosmic dust thread across the peculiar galaxy’s bright core. Unlike the rotation of stars, gas, and dust tracing the arms of spiral galaxies, the motions of dust and gas don’t follow the motions of stars in NGC 1947 though. The more complicated arrangement suggests this galaxy’s visible threads of dust and gas may have come from a donor galaxy, accreted by NGC 1947 during the last 3 billion years or so of the peculiar galaxy’s evolution. With spiky foreground Milky Way stars and more distant background galaxies scattered through the frame, this sharp Hubble image spans about 25,000 light-years near the center of NGC 1947.

詞彙學習（漢羅/POJ/KIP/華語/English）

• 【鬼頭刀星座】Kúi-thâu-to seng-chō/Kuí-thâu-to sing-tsō/劍魚星座/the constellation Dorado
• 【捲螺仔星系】kńg-lê-á seng-hē/kńg-lê-á sing-hē/螺旋星系/spiral galaxy
• 【捲螺仔手骨】kńg-lê-á chhiú-kut/kńg-lê-á tshiú-kut/螺旋手臂（旋臂）/spiral arm
• 【哈伯影像】Ha-peh iáⁿ-siōng/Ha-peh iánn-siōng/哈伯影像/Hubble image