好奇號：火星日第 3048 工

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Curiosity: Sol 3048
• 影像來源：NASA/JPL-Caltech
• 資料處理：Elisabetta Bonora & Marco Faccin / aliveuniverse.today
• 台文翻譯：An-Li Tsai (NCU)

[漢羅] 好奇號：火星日第 3048 工

Tī 毅力號 登陸火星進前，猶閣有一台好奇號。 事實上，好奇號探測車 tī 2012 年 4 月 5 號 ê 時陣，完成第一擺 ê 天空吊車試驗，成功登陸火星。 2021 年 3 月 2 號是好奇號 tī 這粒紅色行星，火星 ê 表面第 3048 工矣。 這張 360 度全景圖，是好奇號探測車甲板面頂 ê Mastcam kā 好奇號 tī 火星 3048 工翕 ê 149 張相片 拼接起來 ê。 內底有 23 張 結冰 ê 、薄薄 ê、懸懸 ê 雲，浮 tī 火星 ê 天頂。 這个厚雲 ê 天色，是 kā 火星幾若工 ê 景色記錄起來，才用數位技術 kā 拼接起來 ê 全景圖。 Tī 中央 ê，是一个幾若層 ê 、幾若-sûn ê Mercou 山。 Tī 遠方倒爿 ê 彼粒山是 Sharp 山。 伊是 ùi Gale 石坑底生出來 5 公里懸 ê 山。

[POJ] Hòⁿ-kî-hō: Hóe-chhiⁿ-ji̍t tē saⁿ-chheng-khòng-sì-cha̍p-peh kang

Tī Gē-le̍k-hō teng-lio̍k Hóe-chhiⁿ chìn-chêng, iáu-koh-ū chi̍t-tâi Hòⁿ-kî-hō. Sū-si̍t-siōng, Hòⁿ-kî-hō thàm-chhek-chhia tī jī-khòng-it-jī nî sì goe̍h gō͘ hō ê sî-chūn, oân-sêng tē-it-pái ê Thian-khong-tiàu-chhia chhì-giām, seng-kûn teng-lio̍k Hóe-chhiⁿ. Jī-khòng-jī-it nî saⁿ goe̍h jī hō sī Hòⁿ-kî-hō tī chi̍t-lia̍p âng-sek kiâⁿ-chhiⁿ, Hóe-chhiⁿ ê piáu-bīn tē saⁿ-chheng-khòng-sì-cha̍p-peh kang ah. Chit-tiuⁿ saⁿ-pah-la̍k-cha̍p-tō͘ choân-kéng-tô͘, sī Hòⁿ-kî-hō thàm-chhek-chhia kah-pán bīn-téng ê Mastcam kā Hòⁿ-kî-hō tī Hóe-chhiⁿ saⁿ-chheng-khòng-sì-cha̍p-peh kang hip–ê chi̍t-pah-sì-cha̍p-káu tiuⁿ siòng-phìⁿ pheng-chiap–khí-lâi-ê. Lāi-té ū jī-cha̍p-saⁿ tiuⁿ kiat-peng–ê, po̍h-po̍h–ê, koân-koân ê hûn, phû tī Hóe-chhiⁿ ê thiⁿ-téng. Chit-ê kāu-hûn ê thiⁿ-sek, sī kā Hóe-chhiⁿ kúi-ā-kang ê kéng-sek kì-lo̍k–khí-lâi, chiah iōng só͘-ūi ki-su̍t kā pheng-chiap–khí-lâi ê choân-kéng-tô͘. Tī tiong-ng–ê, sī chi̍t-ê kúi-ā-têng–ê, kúi-ā-sûn ê Mercou soaⁿ. Tī oán-hong tò-pêng ê hit-lia̍p soaⁿ sī Sharp soaⁿ. I sī ùi Gale chio̍h-kheⁿ-té seⁿ–chhut-lâi gō͘ kong-lí koân ê soaⁿ.

[KIP] Hònn-kî-hō: Hué-tshinn-ji̍t tē sann-tshing-khòng-sì-tsa̍p-peh kang

Tī Gē-li̍k-hō ting-lio̍k Hué-tshinn tsìn-tsîng, iáu-koh-ū tsi̍t-tâi Hònn-kî-hō. Sū-si̍t-siōng, Hònn-kî-hō thàm-tshik-tshia tī jī-khòng-it-jī nî sì gue̍h gōo hō ê sî-tsūn, uân-sîng tē-it-pái ê Thian-khong-tiàu-tshia tshì-giām, sing-kûn ting-lio̍k Hué-tshinn. Jī-khòng-jī-it nî sann gue̍h jī hō sī Hònn-kî-hō tī tsi̍t-lia̍p âng-sik kiânn-tshinn, Hué-tshinn ê piáu-bīn tē sann-tshing-khòng-sì-tsa̍p-peh kang ah. Tsit-tiunn sann-pah-la̍k-tsa̍p-tōo tsuân-kíng-tôo, sī Hònn-kî-hō thàm-tshik-tshia kah-pán bīn-tíng ê Mastcam kā Hònn-kî-hō tī Hué-tshinn sann-tshing-khòng-sì-tsa̍p-peh kang hip–ê tsi̍t-pah-sì-tsa̍p-káu tiunn siòng-phìnn phing-tsiap–khí-lâi-ê. Lāi-té ū jī-tsa̍p-sann tiunn kiat-ping–ê, po̍h-po̍h–ê, kuân-kuân ê hûn, phû tī Hué-tshinn ê thinn-tíng. Tsit-ê kāu-hûn ê thinn-sik, sī kā Hué-tshinn kuí-ā-kang ê kíng-sik kì-lo̍k–khí-lâi, tsiah iōng sóo-uī ki-su̍t kā phing-tsiap–khí-lâi ê tsuân-kíng-tôo. Tī tiong-ng–ê, sī tsi̍t-ê kuí-ā-tîng–ê, kuí-ā-sûn ê Mercoo suann. Tī uán-hong tò-pîng ê hit-lia̍p suann sī Sharp suann. I sī uì Gale tsio̍h-khenn-té senn–tshut-lâi gōo kong-lí kuân ê suann.

[English] Curiosity: Sol 3048

Before Perseverance there was Curiosity. In fact, the Curiosity rover accomplished the first sky crane maneuver touchdown on Mars on April 5, 2012. March 2, 2021 marked Curiosity’s 3,048th martian day operating on the surface of the Red Planet. This 360 degree panorama from sol 3048 is a mosaic of 149 frames from Curiosity’s Mastcam above the rover’s deck. It includes 23 frames of icy, thin, high clouds drifting through the martian sky. The cloudy sky frames were recorded throughout that martian day and are digitally stitched together in the panoramic view. Near center is a layered and streaked Mont Mercou. The peak of central Mount Sharp, rising over 5 kilometers above the floor of Gale Crater, is in the distant background on the left.

詞彙學習（漢羅/POJ/KIP/華語/English）

• 【火星】Hóe-chhiⁿ/Hué-tshinn/火星/Mars
• 【火星日】Hóe-chhiⁿ-ji̍t/Hué-tshinn-ji̍t/火星日/Sol
• 【好奇號】Hòⁿ-kî-hō/Hònn-kî-hō/好奇號/Curiosity
• 【毅力號】Gē-le̍k-hō/Gē-li̍k-hō/毅力號/Perseverance
• 【探測車】thàm-chhek-chhia/thàm-tshik-tshia/探測車/rover
• 【天空吊車】Thian-khong-tiàu-chhia/Thian-khong-tiàu-tshia/天空起重機/Sky Crane
• 【全景圖】choân-kéng-tô͘/tsuân-kíng-tôo/全景圖/the panoramic view