獅仔座三重奏

Page(/daily/2021/03/20210320.md)

探索宇宙1!逐工會揀一幅無仝款 ê 影像抑是相片,𤆬你熟似咱這个迷人 ê 宇宙,閣有專業天文學者2為你解說3

[漢羅] 獅仔座三重奏

Tī 三月 ê 春分 kah 北半球春天 ê 暗頭仔,會當看著這个足紅 ê 星群。 In to̍h 是有名 ê 獅仔座三生仔。 這三个華麗 ê 星系,to̍h tī 這个特別 ê 獅仔座 內底,拄仔好 tī 仝一个天文視野內底會當看著。 To̍h 算是一般民眾用普通 ê 望遠鏡來 kā 看,in 嘛會使分出 NGC 3628(正爿),M66(倒爿面頂),kah M65(下跤)。 In 攏是較大 ê 捲螺仔星系,毋閣看起來有淡薄仔無仝。 因為 in ê 星系盤 tùi 咱 ê 視線方向來講,是敧無仝款 ê 方向。 NGC 3628 嘛叫做美國割包星系。 伊是一个足迷人 ê 側向星系,有一條塗粉烏帶 kā 伊蓬鬆蓬鬆 ê 星系盤切做兩爿。 M66 kah M65 ê 星系盤攏趨有夠,予人看會著 in ê 捲螺仔結構。 這三个星系 ê 引力交互作用有留一寡仔線索落來。 包括潮汐尾溜 kah 彎曲 無平 ê 星系盤,閣有 kā 捲螺仔手骨伸出來 ê M66。 這个華麗 ê 景色 tī 天頂有 1 度闊(兩粒月圓 ê 闊度)ê 範圍。 若是用三重奏 ê 估算距離 3000 萬光年來 kā 算,這幅圖有超過 50 萬光年闊。 毋免講,tī 遐彼粒足光 ê 前景星,是 tī 咱 ê 銀河內底。

[POJ] Sai-á-chō saⁿ-têng-chàu

Tī saⁿ-goe̍h ê chhun-hun kah pak-pòaⁿ-kiû chhun-thiⁿ ê àm-thâu-á, ē-tàng khòaⁿ-tio̍h chit-ê chiok-âng ê seng-kûn. In to̍h sī ū-miâ ê Sai-á-chō saⁿ-sìⁿ-á. Chit saⁿ-ê hôa-lē ê seng-hē, to̍h tī chit-ê te̍k-pia̍t ê Sai-á-chō lāi-té, tú-á-hó tī kâng-chi̍t-ê thian-bûn sī-iá lāi-té ē-tàng khòaⁿ-tio̍h. To̍h-sǹg-sī it-poaⁿ bîn-chiòng iōng phó͘-thong ê bōng-oán-kiàⁿ lâi kā khòaⁿ, in mā ē-sái pun-chhut NGC sam-lio̍k-jī-pat (chiàⁿ-pêng), M la̍k-cha̍p-la̍k (tò-pêng bīn-téng), kah M la̍k-cha̍p-gō͘ (ē-kha). In lóng-sī khah-tōa ê kńg-lê-á seng-hē, m̄-koh khòaⁿ-khí-lâi ū tām-po̍h-á bô-kâng. In-ūi in ê seng-hē-pôaⁿ tùi lán ê sī-sòaⁿ-hong-hiòng lâi-kóng, sī khi bô-kâng-khoán ê hong-hiòng. NGC sam-lio̍k-jī-pat mā kiò-chò Bí-kok-koah-pau seng-hē. I sī chi̍t-ê chiok bê-lâng ê chhek-hiòng seng-hē, ū chi̍t-tiâu thô͘-hún-o͘-tòa kā i phōng-song-phōng-song ê seng-hē-pôaⁿ chhiat-chò nn̄g-pêng. M la̍k-cha̍p-la̍k kah M la̍k-cha̍p-gō͘ ê seng-hē-pôaⁿ lóng chhu ū-kàu, hō͘ lâng khòaⁿ-ē-tio̍h in ê kńg-lê-á kiat-kò͘. Che saⁿ-ê seng-hē ê ín-le̍k kau-hō͘-chok-iōng ū lâu chi̍t-kóa-á sòaⁿ-soh lo̍h-lâi. Pau-koah tiâu-se̍k-bóe-liu kah oan-khiau bô-pêⁿ ê seng-hē-pôaⁿ, koh ū kńg-lê-á chhiú-kut chhun–chhut-lâi ê M la̍k-cha̍p-la̍k. Chi̍t-ê hôa-lē ê kéng-sek tī thiⁿ-téng ū chi̍t-tō͘ khoah (nn̄g-lia̍p goe̍h-îⁿ ê khoah-tō͘) ê hoān-ûi. Nā-sī iōng saⁿ-têng-chàu ê kó͘-sǹg kū-lî saⁿ-chheng bān kng-nî lâi kā sǹg, chit-pak-tô͘ ū chhiau-kòe gō͘-cha̍p bān kng-nî khoah. M̄-bián-kóng, tī hiah hit-lia̍p chiok-kng ê chiân-kéng-chhiⁿ, sī tī lán ê Gîn-hô lāi-té.

[KIP] Sai-á-tsō sann-tîng-tsàu

Tī sann-gue̍h ê tshun-hun kah pak-puànn-kiû tshun-thinn ê àm-thâu-á, ē-tàng khuànn-tio̍h tsit-ê tsiok-âng ê sing-kûn. In to̍h sī ū-miâ ê Sai-á-tsō sann-sìnn-á. Tsit sann-ê huâ-lē ê sing-hē, to̍h tī tsit-ê ti̍k-pia̍t ê Sai-á-tsō lāi-té, tú-á-hó tī kâng-tsi̍t-ê thian-bûn sī-iá lāi-té ē-tàng khuànn-tio̍h. To̍h-sǹg-sī it-puann bîn-tsiòng iōng phóo-thong ê bōng-uán-kiànn lâi kā khuànn, in mā ē-sái pun-tshut NGC sam-lio̍k-jī-pat (tsiànn-pîng), M la̍k-tsa̍p-la̍k (tò-pîng bīn-tíng), kah M la̍k-tsa̍p-gōo (ē-kha). In lóng-sī khah-tuā ê kńg-lê-á sing-hē, m̄-koh khuànn-khí-lâi ū tām-po̍h-á bô-kâng. In-uī in ê sing-hē-puânn tuì lán ê sī-suànn-hong-hiòng lâi-kóng, sī khi bô-kâng-khuán ê hong-hiòng. NGC sam-lio̍k-jī-pat mā kiò-tsò Bí-kok-kuah-pau sing-hē. I sī tsi̍t-ê tsiok bê-lâng ê tshik-hiòng sing-hē, ū tsi̍t-tiâu thôo-hún-oo-tuà kā i phōng-song-phōng-song ê sing-hē-puânn tshiat-tsò nn̄g-pîng. M la̍k-tsa̍p-la̍k kah M la̍k-tsa̍p-gōo ê sing-hē-puânn lóng tshu ū-kàu, hōo lâng khuànn-ē-tio̍h in ê kńg-lê-á kiat-kòo. Tse sann-ê sing-hē ê ín-li̍k kau-hōo-tsok-iōng ū lâu tsi̍t-kuá-á suànn-soh lo̍h-lâi. Pau-kuah tiâu-si̍k-bué-liu kah uan-khiau bô-pênn ê sing-hē-puânn, koh ū kńg-lê-á tshiú-kut tshun–tshut-lâi ê M la̍k-tsa̍p-la̍k. Tsi̍t-ê huâ-lē ê kíng-sik tī thinn-tíng ū tsi̍t-tōo khuah (nn̄g-lia̍p gue̍h-înn ê khuah-tōo) ê huān-uî. Nā-sī iōng sann-tîng-tsàu ê kóo-sǹg kū-lî sann-tshing bān kng-nî lâi kā sǹg, tsit-pak-tôo ū tshiau-kuè gōo-tsa̍p bān kng-nî khuah. M̄-bián-kóng, tī hiah hit-lia̍p tsiok-kng ê tsiân-kíng-tshinn, sī tī lán ê Gîn-hô lāi-té.

[English] The Leo Trio

This popular group leaps into the early evening sky around the March equinox and the northern hemisphere spring. Famous as the Leo Triplet, the three magnificent galaxies found in the prominent constellation Leo gather here in one astronomical field of view. Crowd pleasers when imaged with even modest telescopes, they can be introduced individually as NGC 3628 (right), M66 (upper left), and M65 (bottom). All three are large spiral galaxies but tend to look dissimilar, because their galactic disks are tilted at different angles to our line of sight. NGC 3628, also known as the Hamburger Galaxy, is temptingly seen edge-on, with obscuring dust lanes cutting across its puffy galactic plane. The disks of M66 and M65 are both inclined enough to show off their spiral structure. Gravitational interactions between galaxies in the group have left telltale signs, including the tidal tails and warped, inflated disk of NGC 3628 and the drawn out spiral arms of M66. This gorgeous view of the region spans over 1 degree (two full moons) on the sky in a frame that covers over half a million light-years at the trio’s estimated distance of 30 million light-years. Of course the spiky foreground stars lie well within our own Milky Way.

詞彙學習(台語漢字/POJ/KIP/華語漢字/English)

  • 【獅仔座三重奏】Sai-á-chō saⁿ-têng-chàu/Sai-á-tsō sann-tîng-tsàu/獅子座三重奏/the Leo Trio
  • 【獅仔座三生仔】Sai-á-chō saⁿ-sìⁿ-á/Sai-á-tsō sann-sìnn-á/獅子座三胞胎/the Leo Trio
  • 【獅仔座】Sai-á-chō/Sai-á-tsō/獅子座/the constellation Leo
  • 【春分】chhun-hun/tshun-hun/春分/equinox
  • 【視野】sī-iá/sī-iá/視野/field of view
  • 【視線方向】sī-sòaⁿ-hong-hiòng/sī-suànn-hong-hiòng/視線方向/line of sight
  • 【望遠鏡】bōng-oán-kiàⁿ/bōng-uán-kiànn/望遠鏡/telescope
  • 【捲螺仔星系】kńg-lê-á seng-hē/kńg-lê-á sing-hē/螺旋星系/spiral galaxy
  • 【捲螺仔手骨】kńg-lê-á chhiú-kut/kńg-lê-á tshiú-kut/螺旋手臂(旋臂)/spiral arm
  • 【美國割包星系】Bí-kok-koah-pau seng-hē/Bí-kok-kuah-pau sing-hē/漢堡星系/Hamburger Galaxy
  • 【側向星系】chhek-hiòng seng-hē/tshik-hiòng sing-hē/側向星系/edge-on galaxy
  • 【星系盤】seng-hē-pôaⁿ/sing-hē-puânn/星系盤/galactic plane
  • 【潮汐尾溜】tiâu-se̍k bóe-liu/tiâu-si̍k bué-liu/潮汐尾/tidal tail

  1. 逐工 ê 圖 ↩︎

  2. 本站 ê 介紹 (台語/華語) ↩︎

  3. FAQ (華語) ↩︎

昨昏 ê 圖:Tī 中央 ê 紅外線波段內海仔 明仔載 ê 圖:Antikythera 機械