火流星 ê 光 kah 聲

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Meteor Fireballs in Light and Sound
• 影像來源 kah 版權：Thomas Ashcraft (Radio Fireball Observatory)
• 台文翻譯：An-Li Tsai (NCU)
• 敢若是 tī leh 超空間：APOD ê 亂數產生器

[漢羅] 火流星 ê 光 kah 聲

是哩！毋知你敢捌聽過流星 ê 聲？ 一般來講，流星實在是 傷遠 矣！ 咱是無法度聽著伊 ê 聲欸。 毋閣，一粒 流星 會當產生一个 離子化 ê 軌跡，伊會當 ùi 遠方反射電波信號過來。 你若是徛 tī 適當 ê 所在，可能 to̍h 會當 tī 你 ê la-ji-ò͘ 聽著一塊仔 遠方廣播電台送過來 ê 聲，毋是 kan-na 靜態影像 爾爾。 Tī 這支 影片 內底，大粒流星 ê 軌跡，反映做聲音，ùi 遠方 ê 電波發射器送過來，去予敏感 ê 電波接受器掠著。 仝一个時間，這个 光-sûn 嘛去予 全天攝影機 翕著。 Tī 影片內底，四粒 火流星 明亮 ê 光跡 迒過天頂。 第一个火流星 ê 痕跡 tī 美國 新墨西哥州 Lamy ê 所在翕著。 紲落來，tī 每一幅靜態影像，即時影片嘛翕著每一粒 流星行過 天頂。 這馬 kā 影像 kah ùi 電波反射 ê 聲音記錄敆做伙。 Kā 流星 ê 軌跡投影 tī 地球，會當揣著伊 kah 地球 相挵 ê 地點（若是有）。 毋閣若是 kā 伊 ê 軌跡 投影轉去 天頂，to̍h 會揣著 伊 ê 老爸老母，彗星抑是小行星。

[POJ] Hóe-liû-chhiⁿ ê kng kah siaⁿ

Sī-lih! M̄-chai lí kám bat thiaⁿ-kòe liû-chhiⁿ ê siaⁿ? It-poaⁿ-lâi-kóng, liû-chhiⁿ si̍t-chāi sī siuⁿ hn̄g ah! Lán sī bô-hoat-tō͘ thiaⁿ-tio̍h i ê siaⁿ eh! M̄-koh, chi̍t-lia̍p liû-chhiⁿ ē-tàng sán-seng chi̍t-ê lî-chú-hòa ê kúi-jiah, i ē-tàng ùi oán-hong hoán-siā tiān-pho-sìn-hō kòe-lâi. Lí nā-sī khiā tī sek-tong ê só͘-chāi, khó-lêng to̍h ē-tàng tī lí ê la-ji-ò͘ thiaⁿ-tio̍h chi̍t-tè-á oán-hong kóng-pò-tiān-tâi sàng–kòe-lâi ê siaⁿ, m̄-sī kan-na chēng-thài-iáⁿ-siōng niā-niā. Tī chit-ki iáⁿ-phìⁿ lāi-té, tōa-lia̍p liû-chhiⁿ ê kúi-jiah, hoán-èng chò siaⁿ-im, ùi oán-hong ê tiān-pho hoat-siā-khì sàng–kòe-lâi, khì hō͘ bín-kám ê tiān-pho chiap-siū-khì lia̍h-tio̍h. Kâng chi̍t-ê sî-kan, chit-ê kng-sûn mā khì hō͘ choân-thian liap-iáⁿ-ki hip-tio̍h. Tī iáⁿ-phìⁿ lāi-té, sì-lia̍p Hóe-liû-chhiⁿ bêng-liōng ê kng-jiah hāⁿ-kòe thiⁿ-téng. Tē-it-ê Hóe-liû-chhiⁿ ê hûn-jiah tī Bí-kok sin Be̍k-se-ko chiu Lamy ê só͘-chāi hip-tio̍h. Sòa-lo̍h-lâi, tī múi-chit-pak chēng-thài iáⁿ-siōng, chek-sî iáⁿ-phìⁿ mā hip-tio̍h múi-chi̍t-lia̍p liû-chhiⁿ kiâⁿ-kòe thiⁿ-téng. Chit-má kā iáⁿ-siōng kah ùi tiān-pho-hoán-siā ê siaⁿ-im-kì-lo̍k kap chò-hóe. Kā liû-chhiⁿ ê kúi-jiah tâu-iáⁿ tī Tē-kiû, ē-tàng chhōe-tio̍h i kah tē-kiû sio-lòng ê tē-tiám (nā-sī ū). M̄-koh nā-sī kā i ê kúi-jiah tâu-iáⁿ tńg-khì thiⁿ-téng, to̍h ē chhōe-tio̍h i ê lāu-pē-lāu-bú, hūi-chhiⁿ iah-sī sió-kiâⁿ-chhiⁿ.

[KIP] Hué-liû-tshinn ê kng kah siann

Sī-lih! M̄-tsai lí kám bat thiann-kuè liû-tshinn ê siann? It-puann-lâi-kóng, liû-tshinn si̍t-tsāi sī siunn hn̄g ah! Lán sī bô-huat-tōo thiann-tio̍h i ê siann eh! M̄-koh, tsi̍t-lia̍p liû-tshinn ē-tàng sán-sing tsi̍t-ê lî-tsú-huà ê kuí-jiah, i ē-tàng uì uán-hong huán-siā tiān-pho-sìn-hō kuè-lâi. Lí nā-sī khiā tī sik-tong ê só͘-tsāi, khó-lîng to̍h ē-tàng tī lí ê la-ji-òo thiann-tio̍h tsi̍t-tè-á uán-hong kóng-pò-tiān-tâi sàng–kuè-lâi ê siann, m̄-sī kan-na tsīng-thài-iánn-siōng niā-niā. Tī tsit-ki iánn-phìnn lāi-té, tuā-lia̍p liû-tshinn ê kuí-jiah, huán-ìng tsò siann-im, uì uán-hong ê tiān-pho huat-siā-khì sàng–kuè-lâi, khì hōo bín-kám ê tiān-pho tsiap-siū-khì lia̍h-tio̍h. Kâng tsi̍t-ê sî-kan, tsit-ê kng-sûn mā khì hōo tsuân-thian liap-iánn-ki hip-tio̍h. Tī iánn-phìnn lāi-té, sì-lia̍p Hué-liû-tshinn bîng-liōng ê kng-jiah hāⁿ-kuè thinn-tíng. Tē-it-ê Hué-liû-tshinn ê hûn-jiah tī Bí-kok sin Bi̍k-se-ko tsiu Lamy ê sóo-tsāi hip-tio̍h. Suà-lo̍h-lâi, tī muí-tsit-pak tsīng-thài iánn-siōng, tsik-sî iánn-phìnn mā hip-tio̍h muí-tsi̍t-lia̍p liû-tshinn kiânn-kuè thinn-tíng. Tsit-má kā iánn-siōng kah uì tiān-pho-huán-siā ê siann-im-kì-lo̍k kap tsò-hué. Kā liû-tshinn ê kuí-jiah tâu-iánn tī Tē-kiû, ē-tàng tshuē-tio̍h i kah tē-kîu sio-lòng ê tē-tiám (nā-sī ū). M̄-koh nā-sī kā i ê kuí-jiah tâu-iánn tńg-khì thinn-tíng, to̍h ē tshuē-tio̍h i ê lāu-pē-lāu-bú, huī-tshinn iah-sī sió-kiânn-tshinn.

[English] Meteor Fireballs in Light and Sound

Yes, but have you ever heard a meteor? Usually, meteors are too far away to make any audible sound. However, a meteor will briefly create an ionization trail that can reflect a distant radio signal. If the geometry is right, you may momentarily hear – through your radio – a distant radio station even over static. In the featured video, the sounds of distant radio transmitters were caught reflecting from large meteor trails by a sensitive radio receiver – at the same time the bright streaks were captured by an all-sky video camera. In the video, the bright paths taken by four fireballs across the sky near Lamy, New Mexico, USA, are shown first. Next, after each static frame, a real-time video captures each meteor streaking across the sky, now paired with the sound recorded from its radio reflection. Projecting a meteor trail down to the Earth may lead to finding its impact site (if any), while projecting its trail back into the sky may lead to identifying its parent comet or asteroid.

詞彙學習（漢羅/POJ/KIP/華語/English）

• 【超空間】chhiau-khong-kan/tshiau-khong-kan/超空間/hyperspace
• 【火流星】hóe-liû-chhiⁿ/hué-liû-tshinn/火流星/fireball
• 【離子化 ê 軌跡】lî-chú-hòa ê kúi-jiah/lî-tsú-huà ê kuí-jiah/離子尾/ionization trail
• 【彗星】hūi-chhiⁿ/huī-tshinn/彗星/comet
• 【小行星】sió-kiâⁿ-chhiⁿ/sió-kiânn-tshinn/小行星/asteroid