超級 kha-mé-lah ê 目標 Ma'az

Page(/daily/2021/03/20210313.md)

來聽看覓 tī 火星面頂 ê 雷射銃第一改 ê 聲音記錄

探索宇宙1!逐工會揀一幅無仝款 ê 影像抑是相片,𤆬你熟似咱這个迷人 ê 宇宙,閣有專業天文學者2為你解說3

[漢羅] 超級 kha-mé-lah ê 目標 Ma’az

Tī 火星面頂 一改 ê 雷射聲 聽起來是啥物款–ê? 這無需要去問禪師。 咱 kan-na 需要來聽一下仔 火星面頂第一个拍出 ê 雷射聲波記錄 to̍h 知影。 毅力號任務 tī 第 12 个火星日(3 月 2 號)彼工,to̍h 用探測車桅尾彼台超級 kha-mé-lah 儀器,ùi 3.1 公尺遠 ê 所在 tùi 一粒叫做 Ma’az ê 石頭拍 30 改 ê 信號。 伊 ê mài-khù kā 超級 kha-mé-lah ê 高速雷射銃發出 ê 無連紲 ê 聲音記錄起來。 一寡石頭去予雷射銃拍甲蒸發去,煞來 tī 火星薄薄 ê 大氣層內底產生衝擊波。 這款聲音會當提供目標物 ê 物理結構 ê 線索。 這台 超級 kha-mé-lah tùi Ma’az 區域特寫 ê 範圍有 6 公分闊。 Ma’az tī 美國原住民 Navajo ê 語言 內底,to̍h 是火星 ê 意思。

[POJ] Chhiau-kip kha-mé-lah ê bo̍k-piau Ma’az

Tī Hóe-chhiⁿ bīn-téng chi̍t-kái ê lûi-siā-siaⁿ thiaⁿ-khí-lâi sī siáⁿ-mih-khoán–ê? Che bô-su-iàu khì mn̄g Siâm-su. Lán kan-na su-iàu lâi thiaⁿ chi̍t-ē-á Hóe-chhiⁿ bīn-téng tē-it-ê phah-chhut lûi-siā-siaⁿ-pho kì-lo̍k to̍h chai-iáⁿ. Gē-le̍k-hō jīm-bū tī tē-cha̍p-jī-ê Hóe-chhiⁿ-ji̍t (saⁿ goe̍h jī hō) hit-kang, to̍h iōng thàm-chhek-chhia ûi-bóe hit-tâi chhiau-kip-kha mé-lah gî-khì, ùi saⁿ-tiám-it kong-chhioh hn̄g ê só͘-chāi tùi chi̍t-lia̍p kiò-chò Ma’az ê chio̍h-thâu phah saⁿ-cha̍p kái ê sìn-hō. I ê mài-khù kā chhiau-kip kha-mé-lah ê ko-sok lûi-siā-chhèng hoat–chhut ê bô-liân-sòa ê siaⁿ-im kì-lo̍k–khí-lâi. Chi̍t-kóa chio̍h-thâu khì hō͘ lûi-siā-chhèng phah-kah cheng-hoat–khì, soah-lâi tī Hóe-chhiⁿ po̍h-po̍h–ê tōa-khì-chân lāi-té sán-seng chhiong-kek-phō. Chit-khoán siaⁿ-im ē-tàng thê-kiong bo̍k-piau-bu̍t ê bu̍t-lí kiat-kò͘ ê sòaⁿ-soh. Chi̍t-tâi chhiau-kip kha-mé-lah tùi Ma’az khu-he̍k te̍k-siá ê hoān-ûi ū la̍k kong-hun khoah. Ma’az tī Bí-kok goân-chū-bîn Navajo ê gí-giân lāi-té, to̍h sī Hóe-chhiⁿ ê ì-sù.

[KIP] Tshiau-kip kha-mé-lah ê bo̍k-piau Ma’az

Tī Hué-tshinn bīn-tíng tsi̍t-kái ê luî-siā-siann thiann-khí-lâi sī siánn-mih-khuán–ê? Tse bô-su-iàu khì mn̄g siâm-su. Lán kan-na su-iàu lâi thiann tsi̍t-ē-á Hué-tshinn bīn-tíng tē-it-ê phah-tshut luî-siā-siann-pho kì-lo̍k to̍h tsai-iánn. Gē-li̍k-hō jīm-bū tī tē-tsa̍p-jī-ê Hué-tshinn-ji̍t (sann gue̍h jī hō) hit-kang, to̍h iōng thàm-tshik-tshia uî-bué hit-tâi tshiau-kip-kha mé-lah gî-khì, uì sann-tiám-it kong-tshioh hn̄g ê sóo-tsāi tuì tsi̍t-lia̍p kiò-tsò Ma’az ê tsio̍h-thâu phah sann-tsa̍p kái ê sìn-hō. I ê mài-khù kā tshiau-kip kha-mé-lah ê ko-sok luî-siā-tshìng huat–tshut ê bô-liân-suà ê siann-im kì-lo̍k–khí-lâi. Tsi̍t-kuá tsio̍h-thâu khì hōo luî-siā-tshìng phah-kah tsing-huat–khì, suah-lâi tī Hué-tshinn po̍h-po̍h–ê tuā-khì-tsân lāi-té sán-sing tshiong-kik-phō. Tsit-khuán siann-im ē-tàng thê-kiong bo̍k-piau-bu̍t ê bu̍t-lí kiat-kòo ê suànn-soh. Tsi̍t-tâi tshiau-kip kha-mé-lah tuì Ma’az khu-hi̍k ti̍k-siá ê huān-uî ū la̍k kong-hun khuah. Ma’az tī Bí-kok guân-tsū-bîn Navajo ê gí-giân lāi-té, to̍h sī Hué-tshinn ê ì-sù.

[English] SuperCam Target on Ma’az

What’s the sound of one laser zapping? There’s no need to consult a Zen master to find out, just listen to the first acoustic recording of laser shots on Mars. On Perseverance mission sol 12 (March 2) the SuperCam instrument atop the rover’s mast zapped a rock dubbed Ma’az 30 times from a range of about 3.1 meters. Its microphone recorded the soft staccato popping sounds of the rapid series of SuperCam laser zaps. Shockwaves created in the thin martian atmosphere as bits of rock are vaporized by the laser shots make the popping sounds, sounds that offer clues to the physical structure of the target. This SuperCam close-up of the Ma’az target region is 6 centimeters (2.3 inches) across. Ma’az means Mars in the Navajo language.

詞彙學習(台語漢字/POJ/KIP/華語漢字/English)

  • 【禪師】Siâm-su/Siâm-su/禪師/Zen master
  • 【毅力號任務】Gē-le̍k-hō jīm-bū/Gē-li̍k-hō jīm-bū/毅力號任務/Perseverance mission
  • 【火星日】Hóe-chhiⁿ-ji̍t/Hué-tshinn-ji̍t/火星日/Sol
  • 【探測車】thàm-chhek-chhia/thàm-tshik-tshia/探測車/rover
  • 【雷射銃】lûi-siā-chhèng/lûi-siā-tshèng/雷射槍/laser shot
  • 【衝擊波】chhiong-kek-phō/tshiong-kik-phō/衝擊波/shockwave

  1. 逐工 ê 圖 ↩︎

  2. 本站 ê 介紹 (台語/華語) ↩︎

  3. FAQ (華語) ↩︎

昨昏 ê 圖:Messier 81 明仔載 ê 圖:Tī 瑞典天頂看起來敢若旗仔 ê 極光