火山爆發頭頂 ê 天星

Page(/daily/2021/03/20210303.md)

探索宇宙1!逐工會揀一幅無仝款 ê 影像抑是相片,𤆬你熟似咱這个迷人 ê 宇宙,閣有專業天文學者2為你解說3

[漢羅] 火山爆發頭頂 ê 天星

Etna 火山 已經爆發幾若十萬年矣! Tī Italy Sicily 島 ê 這个火山,會產生一公里懸 ê 火山熔岩噴泉。 Etna 火山 毋但是 地球 面頂 活動力上強 ê 火山 之一,嘛是上大 ê 火山之一。 伊 ê 山盤 有 50 公里闊,懸度有 3 公里懸。 這張相片 是頂禮拜翕–ê,火山 ê 熔岩衝懸,燒滾滾 ê 熔岩 to̍h ùi 火山外口流落來。 衛星 ê 痕跡 出現 tī 火山 ê 頭殼頂,古早時代 ê 天星 to̍h 點 tī 遠方 ê 天頂。 這个火山爆發是遮爾強,附近 ê 機場嘛愛關起來,才袂予飛龍機飛倚去這个危險 ê 熔岩噴泉。 這張影像 ê 前景 kah 背景是用仝一台 kha-mé-lah tī 仝一个所在 連紲翕的

[POJ] Hóe-soaⁿ po̍k-hoat thâu-téng ê thiⁿ-chhiⁿ

Etna hóe-soaⁿ í-keng po̍k-hoat kúi-nā-cha̍p-bān nî ah! Tī Italy Sicily tó ê chi̍t-ê hóe-soaⁿ, ē sán-seng chi̍t-kong-lí koân ê hóe-soaⁿ iông-gâm phùn-choân. Etna hóe-soaⁿ m̄-nā sī Tē-kiû bīn-téng oa̍h-tōng-le̍k siōng kiông ê hóe-soaⁿ chi-it, mā sī siōng tōa ê hóe-soaⁿ chi-it. I ê soaⁿ-pôaⁿ ū gō͘-cha̍p kong-lí khoah, koân-tō͘ ū saⁿ kong-lí koân. Chit-tiuⁿ siòng-phìⁿ sī téng-lé-pài hip–ê, hóe-soaⁿ ê iông-gâm chhèng-koân, sio-kún-kún ê iông-gâm to̍h ùi hóe-soaⁿ gōa-kháu lâu–lo̍h-lâi. Ūi-chhiⁿ ê hûn-jiah chhut-hiān tī hóe-soaⁿ soaⁿ-téng ê thâu-khak-téng, kó͘-chá sî-tāi ê thiⁿ-chhiⁿ to̍h tiám tī oán-hong ê thiⁿ-téng. Chi̍t-ê hóe-soaⁿ po̍k-hoat sī chiah-nī kiông, hū-kūn ê ki-tiûⁿ mā ài koaiⁿ–khí-lâi, chiah bōe hō͘ hoe-lêng-ki poe-óa-khì chi̍t-ê ûi-hiám ê iông-gâm phùn-choân. Chit-tiuⁿ iáⁿ-siōng ê chiân-kéng kah pōe-kéng sī iōng kâng-chit-tâi kha-mé-lah tī kâng-chi̍t-ê só͘-chāi liân-sòa hip–ê.

[KIP] Hué-suann po̍k-huat thâu-tíng ê thinn-tshinn

Etna hué-suann í-king po̍k-huat kuí-nā-tsa̍p-bān nî ah! Tī Italy Sicily tó ê tsi̍t-ê hué-suann, ē sán-sing tsi̍t-kong-lí kuân ê hué-suann iông-gâm phùn-tsuân. Etna hué-suann m̄-nā sī Tē-kîu bīn-tíng ua̍h-tōng-li̍k siōng kiông ê hué-suann tsi-it, mā sī siōng tuā ê hué-suann tsi-it. I ê suann-puânn ū gōo-tsa̍p kong-lí khuah, kuân-tōo ū sann kong-lí kuân. Tsit-tiunn siòng-phìnn sī tíng-lé-pài hip–ê, hué-suann ê iông-gâm tshìng-kuân, sio-kún-kún ê iông-gâm to̍h uì hué-suann guā-kháu lâu–lo̍h-lâi. Uī-tshinn ê hûn-jiah tshut-hiān tī hué-suann suann-tíng ê thâu-khak-tíng, kóo-tsá sî-tāi ê thinn-tshinn to̍h tiám tī uán-hong ê thinn-tíng. Tsi̍t-ê hué-suann po̍k-huat sī tsiah-nī kiông, hū-kūn ê ki-tîunn mā ài kuainn–khí-lâi, tsiah buē hōo hue-lîng-ki pue-uá-khì tsi̍t-ê uî-hiám ê iông-gâm phùn-tsuân. Tsit-tiunn iánn-siōng ê tsiân-kíng kah puē-kíng sī iōng kâng-tsit-tâi kha-mé-lah tī kâng-tsi̍t-ê sóo-tsāi liân-suà hip–ê.

[English] Stars over an Erupting Volcano

Mt. Etna has been erupting for hundreds of thousands of years. Located in Sicily, Italy, the volcano produces lava fountains over one kilometer high. Mt. Etna is not only one of the most active volcanoes on Earth, it is one of the largest, measuring over 50 kilometers at its base and rising nearly 3 kilometers high. Pictured erupting last month, a lava plume shoots upwards, while hot lava flows down the volcano’s exterior. Likely satellite trails appear above, while ancient stars dot the sky far in the distance. This volcanic eruption was so strong that nearby airports were closed to keep planes from flying through the dangerous plume. The image foreground and background were captured consecutively by the same camera and from the same location.

詞彙學習(台語漢字/POJ/KIP/華語漢字/English)

  • 【熔岩】iông-gâm/iông-gâm/熔岩/lava
  • 【衛星】ūi-chhiⁿ/uī-tshinn/衛星/satellite

  1. 逐工 ê 圖 ↩︎

  2. 本站 ê 介紹 (台語/華語) ↩︎

  3. FAQ (華語) ↩︎

昨昏 ê 圖:獨創號:Tī 火星 ê 細台直升機 明仔載 ê 圖:Ti 金牛座 ê 火星