登陸火星:驚惶七分鐘

探索宇宙1!逐工會揀一幅無仝款 ê 影像抑是相片,𤆬你熟似咱這个迷人 ê 宇宙,閣有專業天文學者2為你解說3

[漢羅] 登陸火星:驚惶七分鐘

Ùi 這禮拜四(2021 年 2 月 18)開始,火星可能 to̍h 會加一台 足厲害 ê 機器人探險家 矣!毋閣,in mā 有可能會變做一堆 新 ê 糞埽。這 to̍h 愛看 火星 2020 任務,是毋是有法度 tī 到火星新厝 ê 幾若分鐘內登陸成功,而且閣 kā 毅力號探測車安搭好勢,予伊會當正常運作。毋免講,這是 tī 紅色行星面頂上複雜 ê 登陸任務。伊 ê 連紲精密校正 ê 登陸模式,包括一个 隔熱枋、la̍k-khá-sàng、幾若擺 ê 火箭演習、kah 一个特別 ê 自動駕駛設備,號做 天空吊車。拜四(2 月 18)ê「驚惶七分鐘」sī 呼應 2012 年火星任務 好奇號探測車 ê 登陸,to̍h tī 這个影片 內底看會著。若是有成功,這台 kah 車平大台 ê 毅力號探測車 to̍h 會停 tī 火星 ê 表面。紲落來 to̍h 會當開始探索 Jezero 石坑,看這个看起來敢若袂生 ê 世界,是毋是 tī 過去、這馬、猶是未來,一个適合 生物 徛家 ê 所在。雖然講有幾若个媒體攏會報導這擺 ê 登陸,上完整 ê 登陸內容猶是愛 tī NASA 頻道 ê 網路直播才看會著。

[POJ] Teng-lio̍k Hóe-chhiⁿ: Kiaⁿ-hiâⁿ chhi̍t hun-cheng

Ùi chit-lé-pài khai-sí (jī-khòng-jī-it nî jī goe̍h cha̍p-poeh) khai-sí, Hóe-chhiⁿ khó-lêng to̍h ē ke chi̍t-tâi chiok lī-hāi ê ke-khì-jîn thàm-hiám-ka ah! M̄-koh, in mā ū-khó-lêng ē piàn-chò chi̍t-tui sin–ê pùn-sò. Che to̍h ài khòaⁿ Hóe-chhiⁿ jī-khòng-jī-khòng jīm-bū, sī-mu-sī ū-hoat-tō͘ tī kàu Hóe-chhiⁿ sin-chhù ê kúi-ā hun-cheng lāi teng-lio̍k-sêng-kong, jî-chhiáⁿ koh kā Gē-le̍k-hō thàm-chhek-chhia an-tah hó-sè, hō͘ i ē-tàng chèng-siông ūn-chok. M̄-bián-kóng, che-sī tī âng-sek kiâⁿ-chhiⁿ bīn-téng siāng ho̍k-cha̍p ê teng-lio̍k jīm-bū. I ê liân-sòa-cheng-bi̍t-kàu-chèng ê teng-lio̍k-bô͘-sek, pau-koah chi̍t-ê keh-jia̍t-pang, la̍k-khá-sàng, kúi-ā pái ê hóe-chìⁿ ián-si̍p, kah chi̍t-ê te̍k-pia̍t ê chū-tōng-kà-sú-siat-pī, hō-chò Thian-khong-tiàu-chhia. Pài-sì (jī goe̍h cha̍p-poeh) ê “Kiaⁿ-hiâⁿ chhi̍t hun-cheng” sī ho͘-èng jī-khòng-it-jī nî Hóe-chhiⁿ-jīm-bū Hòⁿ-kî-hō thàm-chhek-chhia ê teng-lio̍k, to̍h tī chit-ê iáⁿ-phìⁿ lāi-té khòaⁿ-ē-tio̍h. Nā-sī ū sêng-kong, chit-tâi kah chhia pêⁿ-tōa-tâi ê Gē-le̍k-hō thàm-chhek-chhia to̍h ē thêng tī Hóe-chhiⁿ piáu-bīn. Sòa-lo̍h-lâi to̍h ē-tàng khai-sí thàm-soh Jezero chio̍h-kheⁿ, khòaⁿ chit-ê khòaⁿ–khí-lâi ká-ná bē-siⁿ ê sè-kài, sī-m̄-sī tī kòe-khì, chit-má, iáu-sī bī-lâi, chi̍t-ê sek-ha̍p seng-bu̍t khiā-ke ê só͘-chāi. Sui-jiân-kóng ū kúi-ā-ê mûi-thé lóng-ē pò-tō chit-pái ê teng-lio̍k, siāng oân-chéng ê teng-lio̍k-lōe-iông iáu-sī ài tī NASA pîn-tō ê bāng-lō͘ ti̍t-pò chiah khòaⁿ-ē-tio̍h.

[KIP] Ting-lio̍k Hué-tshinn: Kiann-hiânn tshi̍t hun-tsing

Uì tsit-lé-pài khai-sí (jī-khòng-jī-it nî jī gue̍h tsa̍p-pueh) khai-sí, Hué-tshinn khó-lîng to̍h ē ke tsi̍t-tâi tsiok lī-hāi ê ke-khì-jîn thàm-hiám-ka ah! M̄-koh, in mā ū-khó-lîng ē piàn-tsò tsi̍t-tui sin–ê pùn-sò. Tse to̍h ài khuànn Hué-tshinn jī-khòng-jī-khòng jīm-bū, sī-mu-sī ū-huat-tōo tī kàu Hué-tshinn sin-tshù ê kuí-ā hun-tsing lāi ting-lio̍k-sîng-kong, jî-tshiánn koh kā Gē-li̍k-hō thàm-tshik-tshia an-tah hó-sè, hōo i ē-tàng tsìng-siông ūn-tsok. M̄-bián-kóng, tse-sī tī âng-sik kiânn-tshinn bīn-tíng siāng ho̍k-tsa̍p ê ting-lio̍k jīm-bū. I ê liân-suà-tsing-bi̍t-kàu-tsìng ê ting-lio̍k-bôo-sik, pau-kuah tsi̍t-ê keh-jia̍t-pang, la̍k-khá-sàng, kuí-ā pái ê hué-tsìnn ián-si̍p, kah tsi̍t-ê ti̍k-pia̍t ê tsū-tōng-kà-sú-siat-pī, hō-tsò Thian-khong-tiàu-tshia. Pài-sì (jī gue̍h tsa̍p-pueh) ê “Kiann-hiânn tshi̍t hun-tsing” sī hoo-ìng jī-khòng-it-jī nî Hué-tshinn-jīm-bū Hònn-kî-hō thàm-tshik-tshia ê ting-lio̍k, to̍h tī tsit-ê iánn-phìnn lāi-té khuànn-ē-tio̍h. Nā-sī ū sîng-kong, tsit-tâi kah tshia pênn-tuā-tâi ê Gē-li̍k-hō thàm-tshik-tshia to̍h ē thîng tī Hué-tshinn piáu-bīn. Suà-lo̍h-lâi to̍h ē-tàng khai-sí thàm-soh Jezero tsio̍h-khenn, khuànn tsit-ê khuànn–khí-lâi ká-ná bē-sinn ê sè-kài, sī-m̄-sī tī kuè-khì, tsit-má, iáu-sī bī-lâi, tsi̍t-ê sik-ha̍p sing-bu̍t khiā-ke ê sóo-tsāi. Sui-jiân-kóng ū kuí-ā-ê muî-thé lóng-ē pò-tō tsit-pái ê ting-lio̍k, siāng uân-tsíng ê ting-lio̍k-luē-iông iáu-sī ài tī NASA pîn-tō ê bāng-lōo ti̍t-pò tsiah khuànn-ē-tio̍h.

[English] Landing on Mars: Seven Minutes of Terror 

Starting Thursday, there may be an amazing new robotic explorer on Mars. Or there may be a new pile of junk . It all likely depends on things going correctly in the minutes after the Mars 2020 mission arrives at its new home planet and attempts to deploy the Perseverance rover . Arguably the most sophisticated landing yet attempted on the red planet, consecutive precision events will involve a heat shield , a parachute, several rocket maneuvers, and the automatic operation of an unusual device called a Sky Crane . Thursday’s Seven Minutes of Terror echo the landing of the Curiosity rover on Mars in 2012, as depicted in the featured video .If successful, the car-sized Perseverance rover will rest on the surface of Mars , soon to begin exploring Jezero Crater to better determine the habitability of this seemingly barren world to life – past, present, and future. Although multiple media outlets may cover this event, one way to watch these landing events unfold is on the NASA channel live on the web.

詞彙學習(台語漢字/POJ/KIP/華語漢字/English)

  • 【火星】Hóe-chhiⁿ/Hué-tshinn/火星/Mars
  • 【毅力號探測車】Gē-le̍k-hō thàm-chhek-chhia/Gē-li̍k-hō thàm-tshik-tshia/ 毅力號探測車/Perseverance rover
  • 【隔熱枋】keh-jia̍t-pang/keh-jia̍t-pang/隔熱罩/heat shield
  • 【la̍k-khá-sàng】la̍k-khá-sàng/la̍k-khá-sàng/降落傘/parachute
  • 【降落傘】Kàng-lo̍h-sòaⁿ/Kàng-lo̍h-suànn/降落傘/parachute
  • 【火箭演習】Hóe-chìⁿ ián-si̍p/Hué-tsìnn ián-si̍p/火箭演習/rocket maneuver
  • 【天空吊車】Thian-khong-tiàu-chhia/Thian-khong-tiàu-tshia/天空起重機/Sky Crane
  • 【好奇號探測車】Hòⁿ-kî-hō thàm-chhek-chhia/Hònn-kî-hō thàm-tshik-tshia/好奇號探測車/Curiosity rover

  1. 逐工 ê 圖 ↩︎

  2. 本站 ê 介紹 (台語/華語) ↩︎

  3. FAQ (華語) ↩︎

昨昏 ê 圖:有長花柄 ê 玫瑰星雲 明仔載 ê 圖:毅力號:七分鐘到火星