立體 ê 愛神星

Page(/daily/2021/02/20210213.md)

探索宇宙1!逐工會揀一幅無仝款 ê 影像抑是相片,𤆬你熟似咱這个迷人 ê 宇宙,閣有專業天文學者2為你解說3

[漢羅] 立體 ê 愛神星

Kā 你 ê 3D 目鏡 提咧!倚近到 編號 433 ê 小行星愛神星 ê 邊仔看。伊是每 1.8 年踅太陽一輾。這个近地小行星 ê 名,是 ùi 希臘 ê 愛神來 ê。毋閣,伊 ê 外形無成是一粒心,顛倒閣較成一塊馬鈴薯。愛神星是一个體積 40 x 14 x 14 公里大 ê 小小世界。面頂有起起落落 ê 地平線、石坑、大石頭、kah 山谷。這張 拼接影像 是 NEAR Shoemaker 太空船處理過 ê 立體浮雕影像。重點是伊予人感覺齷齪 ê 規模 kah 無浪漫 ê 外形。因為有遮爾明顯 ê 光暗對比,NEAR Shoemaker ê 3D 影像才會當提供小行星地貌 kah 結構真重要 ê 測量結果。而且嘛會當提供線索來研究太陽系內底 kah 城市平大粒 ê 石頭 ê 源頭。Tī 遮看會著上細粒 ê,是 30 公尺闊 ê 石頭。自 2000 年 2 月 14 開始,歷史上 ê NEAR Shoemaker to̍h 開一年 ê 時間踅愛神星 leh 轉踅。伊是第一个踅小行星 ê 太空船。20 年前 ê 2001 年 2 月 12,伊 to̍h 降落 tī 愛神星,這是第一个降落 tī 小行星表面 ê 事件。NEAR Shoemaker 上尾一擺 ùi 愛神星表面 送資料轉來,是 tī 2001 年 3 月 1 號。

[POJ] Li̍p-thé ê Ài-sîn-chhiⁿ

Kā lí-ê saⁿ-D ba̍k-kiàⁿ the̍h–leh! Óa-kūn kàu pian-hō sù-sam-sam ê sió-kiâⁿ-chhiⁿ Ài-sîn-chhiⁿ ê piⁿ-á khòaⁿ. I sī múi it-tiám-poeh nî se̍h thài-iông chi̍t-liàn. Chit-ê kūn-tē-sió-kiâⁿ-chhiⁿ ê miâ, sī ùi Hi-la̍h ê Ài-sîn lâi–ê. M̄-koh, i ê gōa-hêng bô sêng sī chi̍t-lia̍p sim, tian-tò koh-khah sêng chi̍t-tè má-lêng-chî. Ài-sîn-chhiⁿ sī chi̍t-ê thé-chek sì-cha̍p sêng cha̍p-sì sêng cha̍p-sì kong-lí tōa ê sió-sió-sè-kài. Bīn-téng ū khí-khí-lo̍h-lo̍h ê tē-pêng-sòaⁿ, chio̍h-kheⁿ, tōa chio̍h-thâu, kah soaⁿ-kok. Chit-tiuⁿ pheng-chiap-iáⁿ-siōng sī NEAR Shoemaker thài-khong-chûn chhú-lí-kòe ê li̍p-thé-phû-tiau-iáⁿ-siōng. Tiōng-tiám sī i hō͘-lâng kám-kak ak-chak ê kui-bô͘ kah bô lōng-bān ê gōa-hêng. In-ūi ū chiah-nī bêng-hián ê kng-àm-tùi-pí, NEAR Shoemaker ê saⁿ-D iáⁿ-siōng chiah ē-tàng thê-kiong sió-kiâⁿ-chhiⁿ tē-māu kah kiat-kò͘ chin tiōng-iàu ê chhek-liông kiat-kó. Jî-chhiáⁿ mā ē-tàng thê-kiong sòaⁿ-soh lâi gián-kiù thài-iông-hē lāi-té kah siâⁿ-chhī pêⁿ-tōa-lia̍p ê chio̍h-thâu ê goân-thâu. Tī chia khòaⁿ-ē-tio̍h siāng sè-lia̍p–ê, sī saⁿ-cha̍p kong-chhioh khoah ê chio̍h-thâu. Chū nn̄g-chheng nî jī goe̍h cha̍p-sì khai-sí, le̍k-sú-siōng ê NEAR Shoemaker to̍h khai chi̍t nî ê sî-kan se̍h Ài-sîn-chhiⁿ leh tńg-se̍h. I sī tē-it-ê se̍h sió-kiâⁿ-chhiⁿ ê thài-khong-chûn. Jī-cha̍p nî chêng ê jī-khòng-khòng-it nî jī goe̍h cha̍p-jī, i to̍h kàng-lo̍h tī Ài-sîn-chhiⁿ, che sī tē-it-ê kàng-lo̍h tī sió-kiâⁿ-chhiⁿ piáu-bīn ê sū-kiāⁿ. Near Shoemaker siāng-bóe chi̍t-pái ùi Ài-sîn-chhiⁿ piáu-bīn sàng chu-liāu tńg–lâi, sī tī jī-khòng-khòng-it nî saⁿ goe̍h it hō.

[KIP] Li̍p-thé ê Ài-sîn-tshinn

Kā lí-ê sann-D ba̍k-kiànn the̍h–leh! Uá-kūn kàu pian-hō sù-sam-sam ê sió-kiânn-tshinn Ài-sîn-tshinn ê pinn-á khuànn. I sī muí it-tiám-pueh nî se̍h thài-iông tsi̍t-liàn. Tsit-ê kūn-tē-sió-kiânn-tshinn ê miâ, sī uì Hi-la̍h ê Ài-sîn lâi–ê. M̄-koh, i ê guā-hîng bô sîng sī tsi̍t-lia̍p sim, tian-tò koh-khah sîng tsi̍t-tè má-lîng-tsî. Ài-sîn-tshinn sī tsi̍t-ê thé-tsik sì-tsa̍p sîng tsa̍p-sì sîng tsa̍p-sì kong-lí tuā ê sió-sió-sè-kài. Bīn-tíng ū khí-khí-lo̍h-lo̍h ê tē-pîng-suànn, tsio̍h-khenn, tuā tsio̍h-thâu, kah suann-kok. Tsit-tiunn phing-tsiap-iánn-siōng sī NEAR Shuemaker thài-khong-tsûn tshú-lí-kuè ê li̍p-thé-phû-tiau-iánn-siōng. Tiōng-tiám sī i hōo-lâng kám-kak ak-tsak ê kui-bôo kah bô lōng-bān ê guā-hîng. In-uī ū tsiah-nī bîng-hián ê kng-àm-tuì-pí, NEAR Shuemaker ê sann-D iánn-siōng tsiah ē-tàng thê-kiong sió-kiânn-tshinn tē-māu kah kiat-kòo tsin tiōng-iàu ê tshik-liông kiat-kó. Jî-tshiánn mā ē-tàng thê-kiong suànn-soh lâi gián-kìu thài-iông-hē lāi-té kah siânn-tshī pênn-tuā-lia̍p ê tsio̍h-thâu ê guân-thâu. Tī tsia khuànn-ē-tio̍h siāng sè-lia̍p–ê, sī sann-tsa̍p kong-tshioh khuah ê tsio̍h-thâu. Tsū nn̄g-tshing nî jī gue̍h tsa̍p-sì khai-sí, li̍k-sú-siōng ê NEAR Shuemaker to̍h khai tsi̍t nî ê sî-kan se̍h Ài-sîn-tshinn leh tńg-se̍h. I sī tē-it-ê se̍h sió-kiânn-tshinn ê thài-khong-tsûn. Jī-tsa̍p nî tsîng ê jī-khòng-khòng-it nî jī gue̍h tsa̍p-jī, i to̍h kàng-lo̍h tī Ài-sîn-tshinn, tse sī tē-it-ê kàng-lo̍h tī sió-kiânn-tshinn piáu-bīn ê sū-kiānn. Near Shuemaker siāng-bué tsi̍t-pái uì Ài-sîn-tshinn piáu-bīn sàng tsu-liāu tńg–lâi, sī tī jī-khòng-khòng-it nî sann gue̍h it hō.

[English] Stereo Eros 

Get out your red/blue glasses and float next to asteroid 433 Eros .Orbiting the Sun once every 1.8 years, the near-Earth asteroidis named for the Greek god of love.Still, its shape more closely resembles a lumpy potato than a heart.Eros is a diminutive 40 x 14 x 14 kilometer world of undulating horizons, craters, boulders and valleys.Its unsettling scale and unromantic shape are emphasized in this mosaic of images from the NEAR Shoemaker spacecraftprocessed to yield a stereo anaglyphic view. Along with dramatic chiaroscuro ,NEAR Shoemaker’s 3-D imaging provided important measurementsof the asteroid’s landforms and structures, andclues to the origin of this city-sized chunk of Solar System.The smallest features visible here are about 30 meters across.Beginning on February 14, 2000, historic NEAR Shoemakerspent a year in orbit around Eros,the first spacecraft to orbit an asteroid.Twenty years ago, on February 12 2001, it landed on Eros,the first ever landing on an asteroid’s surface.NEAR Shoemaker’s final transmission from the surface of Eros was on March 1, 2001.

詞彙學習(台語漢字/POJ/KIP/華語漢字/English)

  • 【近地小行星】kūn-tē-sió-kiâⁿ-chhiⁿ/kūn-tē-sió-kiânn-tshinn/近地小行星/near-Earth asteroid
  • 【愛神星】Ài-sîn-chhiⁿ/Ài-sîn-tshinn/愛神星/Eros
  • 【希臘】Hi-la̍h/Hi-la̍h/希臘/Greek
  • 【立體浮雕影像】li̍p-thé phû-tiau iáⁿ-siōng/li̍p-thé phû-tiau iánn-siōng/立體浮雕影像/stereo anaglyphic view
  • 【光暗對比】kng-àm tùi-pí/kng-àm tùi-pí/明暗對比/chiaroscuro

  1. 逐工 ê 圖 ↩︎

  2. 本站 ê 介紹 (台語/華語) ↩︎

  3. FAQ (華語) ↩︎

昨昏 ê 圖:捲螺仔星系 NGC 1350 明仔載 ê 圖:有長花柄 ê 玫瑰星雲