捲螺仔星系 NGC 1350

Page(/daily/2021/02/20210212.md)

探索宇宙1!逐工會揀一幅無仝款 ê 影像抑是相片,𤆬你熟似咱這个迷人 ê 宇宙,閣有專業天文學者2為你解說3

[漢羅] 捲螺仔星系 NGC 1350

這个華麗 ê 宇宙島 to̍h tī 南天星座,天爐座 內底,離咱有 85 百萬光年遠。NGC 1350 絞絚 ê 捲螺仔手骨 內底,有少年 ê 藍光星團,看起來敢若欲絞 lŏe 星系中央彼个大閣光 ê 星系核。伊看起來 to̍h 親像是一粒宇宙眼。實際上,NGC 1350 差不多有 13 萬光年闊。比咱 ê 銀河閣小可仔大一點矣。Tùi 地球 ê 天文學家 來講,NGC 1350 可能是 天爐座星系團 ê 外沿星系。毋閣 ùi 推算出來 ê 距離來看,伊應該毋是星系團 ê 成員。當然,tī 望遠鏡視野內底,彼寡足清楚 ê 前景星,是咱 ê 捲螺仔星系(銀河)ê 成員星。

[POJ] Kńg-lê-á seng-hē NGC it-sam-ngó͘-khòng

Chit-ê hôa-lē ê ú-tiū-tó to̍h tī lâm-thian-seng-chō, Thian-lô͘-chō lāi-té, lî lán ū peh-cha̍p-gō͘ kng-nî hn̄g. NGC it-sam-ngó͘-khòng ká-ân–ê kńg-lê-á-chhiú-kut lāi-té, ū siàu-liân ê nâ-kng seng-thoân, khòaⁿ–khí-lâi ká-ná beh ká-lŏe seng-hē tiong-ng hit-ê tōa-koh-kng ê seng-hē-he̍k. I khòaⁿ–khí-lâi to̍h chhin-chhiūⁿ sī chi̍t-lia̍p ú-tiū-gán. Si̍t-chè-siōng, NGC it-sam-ngó͘-khòng chha-put-to ū cha̍p-saⁿ bān kng-nî khoah. Pì lán-ê Gîn-hô koh sió-khóa-á tōa chi̍t-tiám ah. Tùi tē-kiû ê thian-bûn-ha̍k-ka lâi-kóng, NGC it-sam-ngó͘-khòng khó-lêng sī Thian-lô͘-chō-seng-hē-thoân ê gōa-iân seng-hē. M̄-koh ùi thui-sǹg-chhut-lâi ê kū-lî lâi-khòaⁿ, i eng-kai m̄-sī seng-hē-thòaⁿ ê sêng-goân. Tong-jiân, tī bōng-oán-kiàⁿ sī-iá lāi-té, hit-kóa chiok chheng-chhó͘ ê chiân-kéng-chhiⁿ, sī lán-ê kńg-lê-á-seng-hē (Gîn-hô) ê sêng-goân-chhiⁿ.

[KIP] Kńg-lê-á sing-hē NGC it-sam-ngóo-khòng

Tsit-ê huâ-lē ê ú-tīu-tó to̍h tī lâm-thian-sing-tsō, Thian-lôo-tsō lāi-té, lî lán ū peh-tsa̍p-gōo kng-nî hn̄g. NGC it-sam-ngóo-khòng ká-ân–ê kńg-lê-á-tshíu-kut lāi-té, ū siàu-liân ê nâ-kng sing-thuân, khuànn–khí-lâi ká-ná beh ká-luĕ sing-hē tiong-ng hit-ê tuā-koh-kng ê sing-hē-hi̍k. I khuànn–khí-lâi to̍h tshin-tshīunn sī tsi̍t-lia̍p ú-tīu-gán. Si̍t-tsè-siōng, NGC it-sam-ngóo-khòng tsha-put-to ū tsa̍p-sann bān kng-nî khuah. Pì lán-ê Gîn-hô koh sió-khuá-á tuā tsi̍t-tiám ah. Tuì tē-kîu ê thian-bûn-ha̍k-ka lâi-kóng, NGC it-sam-ngóo-khòng khó-lîng sī Thian-lôo-tsō-sing-hē-thuân ê guā-iân sing-hē. M̄-koh uì thui-sǹg-tshut-lâi ê kū-lî lâi-khuànn, i ing-kai m̄-sī sing-hē-thuànn ê sîng-guân. Tong-jiân, tī bōng-uán-kiànn sī-iá lāi-té, hit-kuá tsiok tshing-tshóo ê tsiân-kíng-tshinn, sī lán-ê kńg-lê-á-sing-hē (Gîn-hô) ê sîng-guân-tshinn.

[English] Spiral Galaxy NGC 1350 

This gorgeous island universe lies about 85 million light-yearsdistant in the southern constellationFornax .Inhabited by young blue star clusters, thetightly wound spiral arms of NGC 1350 seem to join in a circle around the galaxy’s large,bright nucleus, giving it the appearance of acosmic eye.In fact, NGC 1350 is about 130,000 light-years across.That makes it as large or slightly larger than the Milky Way.For earth-based astronomers ,NGC 1350 is seen on the outskirts of the Fornax cluster of galaxies, but its estimated distance suggests thatit is not itself a cluster member.Of course, the bright spiky stars in the foreground of thistelescopic field of view are members of our own spiral Milky Way galaxy .

詞彙學習(台語漢字/POJ/KIP/華語漢字/English)

  • 【捲螺仔星系】kńg-lê-á-seng-hē/kńg-lê-á-sing-hē/螺旋星系/spiral galaxy
  • 【天爐座】Thian-lô͘-chō/Thian-lôo-tsō/天爐座/Fornax
  • 【捲螺仔手骨】kńg-lê-á-chhiú-kut/kńg-lê-á-tshíu-kut/旋臂/spiral arm
  • 【星團】seng-thoân/sing-thuân/星團/star cluster
  • 【星系核】seng-hē-he̍k/sing-hē-hi̍k/星系核/galactic nucleus
  • 【宇宙眼】ú-tiū-gán/ú-tīu-gán/宇宙眼/cosmic eye
  • 【星系團】seng-hē-thoân/sing-hē-thuân/星系團/cluster of galaxies
  • 【望遠鏡】bōng-oán-kiàⁿ/bōng-uán-kiànn/望遠鏡/telescope
  • 【視野】sī-iá/sī-iá/視野/field of view

  1. 逐工 ê 圖 ↩︎

  2. 本站 ê 介紹 (台語/華語) ↩︎

  3. FAQ (華語) ↩︎

昨昏 ê 圖:天鵝座 2010 - 2020 年 ê 拼接圖 明仔載 ê 圖:立體 ê 愛神星