七彩 ê 四分儀座流星

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：A Colorful Quadrantid Meteor
• 影像來源佮版權：Nicolas Paladini
• APOD 嘛有 英文版、Catalan 版、葡萄牙文版 ê 面冊矣！
• 台文翻譯：An-Li Tsai (NCU)

[漢羅] 七彩 ê 四分儀座流星

流星會使 sī 七彩 ê。人類 ê 目睭 sī 無法度分辨遮爾濟色光。毋閣，kha-mé-lah 會使。這張相片 sī 用 kha-mé-lah tī 美國 ê Missouri 翕 ê 四分儀座流星。Tī 這個月初，in 毋但光 kah 驚死人，閣五彩繽紛。這粒 發光 ê 石頭，應該 sī 去予小行星 2003 EH1 放捒了後，tī 行過 地球大氣層 ê 時陣燒出一條路 ê。流星 ê 色光 通常 sī ùi 流星 解體了後，產生 ê 離子元素來 ê。青藍色 ê 光一般攏是 ùi 鎂 來 ê。鈣 會發出茄仔色 ê 光。鎳 會發出青色 ê 光。毋閣，紅色一般來講，sī ùi 地球大氣內底，高能 ê 窒素 kah 酸素 來 ê。這个遮爾光 ê 火 流星 一目[目聶] to̍h 無去矣，比一秒鐘猶閣較短。毋閣，伊留一條 去予風歕出來 ê 電離軌跡，煞留幾若分鐘久 ê 光予人看著。

[POJ] Chhit-chhái ê Sì-hun-gî-chō liû-chhiⁿ

Liû-chhiⁿ ē-sái sī chhit-chhái--ê. Jîn-lūi ê ba̍k-chiu sī bô-hoat-tō͘ hun-piān chiah-nī chē sek-kng. M̄-koh, kha-mé-lah ē-sái. Chit-tiuⁿ siòng-phìⁿ sī iōng kha-mé-lah tī Bí-kok ê Missouri hip--ê Sì-hun-gî-chō liû-chhiⁿ. Tī chi̍t-kò-goe̍h-chhōe, in m̄-nā kng kah kiaⁿ-sí-lâng, koh ngó͘-chhái-phin-hun. Chit-lia̍p hoat-kng ê chio̍h-thâu, eng-kai sī khì hō͘ sió-kiâⁿ-chhiⁿ jī-khòng-khòng-sam EH-it pàng-sak liáu-āu, tī kiâⁿ-kòe tē-kiû tōa-khì-chân ê sî-chūn sió-chhut chi̍t-tiâu-lō͘ ê. Liû-chhiⁿ ê sek-kng thong-siông sī ùi liû-chhiⁿ kái-thé liáu-āu, sán-seng ê lî-chú goân-sò͘ lâi--ê. Chhiⁿ-nâ-sek ê kng it-poaⁿ lòng-sí ùi bí lâi--ê. Kài ē hoat-chhut kiô-á-sek ê kng. Gia̍t ē hoat-chhut chhiⁿ-sek ê kng. M̄-koh, âng-sek it-poaⁿ lâi-kóng, sī ùi tē-kiû tōa-khì lāi-té, ko-lêng ê chit-sò͘ kah sng-sò͘ lâi--ê. Chit-ê chiah-nī kng ê hóe-liû-chhiⁿ chi̍t-ba̍k-nih to̍h bô-khì-ah, pí chi̍t-bió-cheng iáu-koh khah té. M̄-koh, i lâu chi̍t-tiâu khì hō͘ hong pûn--chhut-lâi ê tiān-lî kúi-jiah, soah lâu kúi-ā hun-cheng kú ê kng hō͘ 人 khòaⁿ-tio̍h.

[KIP] Tshit-tshái ê Sì-hun-gî-tsō liû-tshinn

Liû-tshinn ē-sái sī tshit-tshái--ê. Jîn-luī ê ba̍k-tsiu sī bô-huat-tōo hun-piān tsiah-nī tsē sik-kng. M̄-koh, kha-mé-lah ē-sái. Tsit-tiunn siòng-phìnn sī iōng kha-mé-lah tī Bí-kok ê Missoori hip--ê Sì-hun-gî-tsō liû-tshinn. Tī tsi̍t-kò-gue̍h-tshuē, in m̄-nā kng kah kiann-sí-lâng, koh ngóo-tshái-phin-hun. Tsit-lia̍p huat-kng ê tsio̍h-thâu, ing-kai sī khì hōo sió-kiânn-tshinn jī-khòng-khòng-sam EH-it pàng-sak liáu-āu, tī kiânn-kuè tē-kîu tuā-khì-tsân ê sî-tsūn sió-tshut tsi̍t-tiâu-lōo ê. Lîu-tshinn ê sik-kng thong-siông sī uì lîu-tshinn kái-thé liáu-āu, sán-sing ê lî-tsú guân-sòo lâi--ê. Tshinn-nâ-sik ê kng it-puann lòng-sí uì bí lâi--ê. Kài ē huat-tshut kiô-á-sik ê kng. Gia̍t ē huat-tshut tshinn-sik ê kng. M̄-koh, âng-sik it-puann lâi-kóng, sī uì tē-kîu tuā-khì lāi-té, ko-lîng ê tsit-sòo kah sng-sòo lâi--ê. Tsit-ê tsiah-nī kng ê hué-lîu-tshinn tsi̍t-ba̍k-nih to̍h bô-khì-ah, pí tsi̍t-bió-tsing iáu-koh khah té. M̄-koh, i lâu tsi̍t-tiâu khì hōo hong pûn--tshut-lâi ê tiān-lî kuí-jiah, suah lâu kuí-ā hun-tsing kú ê kng hōo 人 khuànn-tio̍h.

[English] A Colorful Quadrantid Meteor 

Meteors can be colorful.While the human eye usually cannot discern many colors, cameras often can.Pictured is a Quadrantids meteor captured by camera over Missouri , USA , early this month that was not only impressively bright, but colorful.The radiant grit , likely cast off by asteroid 2003 EH1 ,blazed a path across Earth's atmosphere . Colors in meteors usually originate from ionized elements released as the meteor disintegrates, with blue-green typically originating from magnesium , calcium radiating violet, and nickel glowing green.Red, however, typically originates from energized nitrogen and oxygen in the Earth's atmosphere. This bright meteor ic fireball was gone in a flash -- less than a second -- but it left a wind-blown ionization trail that remained visible for several minutes.

詞彙學習