遠方 ê 小行星

Page(/daily/2021/01/20210131.md)

探索宇宙1!逐工會揀一幅無仝款 ê 影像抑是相片,𤆬你熟似咱這个迷人 ê 宇宙,閣有專業天文學者2為你解說3

[漢羅] 遠方 ê 小行星

逐工攏有 ùi 太空掔過來地球 ê 石頭。是講,較大粒 ê 石頭嘛較罕 leh 挵著地球。逐工攏有足濟幾若公斤重 ê 太空塗粉挵著地球。較大粒 ê 挵著 to̍h 會變做發光 ê 流星。逐工攏有 kah 籃球平大粒 ê 石頭 kah 冰丸落落來地球 ê 大氣層。大部份攏足緊 to̍h 蒸發了了矣。Tùi 地球會造成 嚴重威脅 ê 石頭嘛有。直徑差不多有 100 公尺遐爾大。In 差不多每 1000 年才 挵著地球 一擺。遮爾大粒 ê 石頭若是掔著海,to̍h 會引起 足恐怖 ê chu-ná-mih,閣有 可能毀滅 海岸線。若是欲予超過一公里大 ê 大粒小行星 摃著 ê 機會 ē 閣較少。一般來講,愛幾若百萬年才會拄著一擺。毋過,這會 造成全球性 ê 災難。其實猶有足濟小行星 猶未去予人揣著。Tī 這張影像 內底,有一粒畫一逝藍線 ê 小行星,to̍h 是按呢 tī 1998 年去予哈伯太空望遠鏡揣著 ê。大粒小行星 kah 地球 相碰,並無啥會 影響著地球 ê 軌道。顛倒是相碰 產生 ê 塗粉,會影響著 地球 ê 氣候。有一款結果是造成全球足濟物種 ê 滅絕。這款講法,可能會減弱 地球物種 sī 因為人類活動 chiah 慢慢滅絕 ê 假設。

[POJ] Oán-hong ê sió-kiâⁿ-chhiⁿ

Ta̍k-kang lóng-ū ùi thài-khong khian-kòe-lâi tē-kiû ê chio̍h-thâu. Sī-kóng, khah tōa-lia̍p ê chio̍h-thâu mā khah hán-leh lòng-tio̍h tē-kiû. Ta̍k-kang lóng-ū chiok-chōe kúi-ā-kong-kin tāng ê thài-khong thô͘-hún lòng-tio̍h tē-kiû. Khah tōa-lia̍p ê lòng-tio̍h to̍h ē piàn-chò hoat-kng ê liû-chhiⁿ. Ta̍k-kang lóng-ū kah nâ-kiû pêⁿ-tōa-lia̍p ê chio̍h-thâu kah peng-oân lak-lo̍h-lâi tē-kiû ê tōa-khì-chân. Tōa-pō͘-hūn lóng chiok-kín to̍h cheng-hoat liáu-liáu-ah. Tùi tē-kiû ē chō-sêng giâm-tiōng ui-hia̍p ê chio̍h-thâu mā ū. Ti̍t-kèng chha-put-to ū chi̍t-pah kong-chhioh hiah-nī tōa. In chha-put-to múi chi̍t-chheng nî chiah lòng-tio̍h tē-kiû chi̍t-pái. Chiah-nī tōa-lia̍p ê chio̍h-thâu nā-sī khian-tio̍h hái, to̍h ē ín-khí chiok-khióng-pò͘ ê chu-ná-mih, koh-ū khó-lêng húi-bia̍t hái-hōaⁿ-sòaⁿ. Nā-sī beh hō͘ chhiau-kòe chi̍t kong-lí tōa ê tōa-lia̍p sió-kiâⁿ-chhiⁿ kòng–tio̍h ê ki-hōe ē koh-khah chió. It-poaⁿ-lāi-kong, ài kúi-ā-pah-bān nî chiah-ē tú-tio̍h chi̍t-pái. M̄-koh, che ē chō-sêng choân-kiû-sèng ê chai-lān. Kî-si̍t iáu-ū chiok-chōe sió-kiâⁿ-chhiⁿ iáu-bē khì hō͘-lâng chhōe-tio̍h. Tī chit-tiuⁿ iáⁿ-siōng lāi-té, ū chi̍t-lia̍p ōe chi̍t-chōa nâ-sòaⁿ ê sió-kiâⁿ-chhiⁿ, to̍h sī án-ni tī it-kiú-kiú-pat nî khì hō͘ Ha-peh thài-khong-bōng-oán-kiàⁿ chhōe-tio̍h-ê. Tōa-lia̍p sió-kiâⁿ-chhiⁿ kah tē-kiû sio-pōng, pēng-bô saⁿ ē éng-hióng tio̍h tē-kiû ê kúi-tō. Tian-tò-sī sio-pōng sán-seng ê thô͘-hu, ē éng-hióng tio̍h tē-kiû ê khì-hāu. Ū chit-khoán kiat-kó sī chō-sêng choân-kiû chiok-chōe bu̍t-chióng ê bia̍t-choa̍t. Chit-khoán kóng-hoat, khó-lêng ē kiám-jio̍k tē-kiû bu̍t-chióng sī in-ūi jîn-lūi oa̍h-tōng chiah bān-bān bia̍t-choa̍t ê ká-siat.

[KIP] Uán-hong ê sió-kiânn-tshinn

Ta̍k-kang lóng-ū uì thài-khong khian-kuè-lâi tē-kiû ê tsio̍h-thâu. Sī-kóng, khah tuā-lia̍p ê tsio̍h-thâu mā khah hán-leh lòng-tio̍h tē-kiû. Ta̍k-kang lóng-ū tsiok-tsuē kuí-ā-kong-kin tāng ê thài-khong thôo-hún lòng-tio̍h tē-kîu. Khah tuā-lia̍p ê lòng-tio̍h to̍h ē piàn-tsò huat-kng ê lîu-tshinn. Ta̍k-kang lóng-ū kah nâ-kîu pênn-tuā-lia̍p ê tsio̍h-thâu kah ping-uân lak-lo̍h-lâi tē-kîu ê tuā-khì-tsân. Tuā-pōo-hūn lóng tsiok-kín to̍h tsing-huat liáu-liáu-ah. Tuì tē-kîu ē tsō-sîng giâm-tiōng ui-hia̍p ê tsio̍h-thâu mā ū. Ti̍t-kìng tsha-put-to ū tsi̍t-pah kong-tshioh hiah-nī tuā. In tsha-put-to muí tsi̍t-tshing nî tsiah lòng-tio̍h tē-kîu tsi̍t-pái. Tsiah-nī tuā-lia̍p ê tsio̍h-thâu nā-sī khian-tio̍h hái, to̍h ē ín-khí tsiok-khióng-pòo ê tsu-ná-mih, koh-ū khó-lîng huí-bia̍t hái-huānn-suànn. Nā-sī beh hōo tshiau-kuè tsi̍t kong-lí tuā ê tuā-lia̍p sió-kiânn-tshinn kòng–tio̍h ê ki-huē ē koh-khah tsió. It-puann-lāi-kong, ài kuí-ā-pah-bān nî tsiah-ē tú-tio̍h tsi̍t-pái. M̄-koh, tse ē tsō-sîng tsuân-kîu-sìng ê tsai-lān. Kî-si̍t iáu-ū tsiok-tsuē sió-kiânn-tshinn iáu-bē khì hōo-lâng tshuē-tio̍h. Tī tsit-tiunn iánn-siōng lāi-té, ū tsi̍t-lia̍p uē tsi̍t-tsuā nâ-suànn ê sió-kiânn-tshinn, to̍h sī án-ni tī it-kiú-kiú-pat nî khì hōo Ha-peh thài-khong-bōng-uán-kiànn tshuē-tio̍h-ê. Tuā-lia̍p sió-kiânn-tshinn kah tē-kîu sio-pōng, pīng-bô sann ē íng-hióng tio̍h tē-kîu ê kuí-tō. Tian-tò-sī sio-pōng sán-sing ê thôo-hu, ē íng-hióng tio̍h tē-kîu ê khì-hāu. Ū tsit-khuán kiat-kó sī tsō-sîng tsuân-kîu tsiok-tsuē bu̍t-tsióng ê bia̍t-tsua̍t. Tsit-khuán kóng-huat, khó-lîng ē kiám-jio̍k tē-kîu bu̍t-tsióng sī in-uī jîn-luī ua̍h-tōng tsiah bān-bān bia̍t-tsua̍t ê ká-siat.

[English] Asteroids in the Distance 

Rocks from space hit Earth every day. The larger the rock, though, the less often Earth is struck. Many kilograms of space dust pitter to Earth daily.Larger bits appear initially as a bright meteor . Baseball-sized rocks and ice-ballsstreak through our atmosphere daily,most evaporating quickly to nothing. Significant threats do exist for rocks near 100 meters in diameter, which strike the Earth roughly every 1000 years. An object this size could cause significant tsunamis were it to strike an ocean, potentially devastating even distant shores.A collision with a massive asteroid ,over 1 km across, is more rare ,occurring typically millions of years apart, but could have truly global consequences .Many asteroids remain undiscovered . In fact, one was discovered in 1998 as the long blue streak in the above archival image taken by the Hubble Space Telescope.A collision with a large asteroid would not affect Earth’s orbit so much as raise dust that would affect Earth’s climate . One likely result is a global extinction of many species of life,possibly dwarfing the ongoing extinction occurring now .

詞彙學習(台語漢字/POJ/KIP/華語漢字/English)

  • 【小行星】sió-kiâⁿ-chhiⁿ/sió-kiânn-tshinn/小行星/asteroid
  • 【chu-ná-mih】chu-ná-mih/tsu-ná-mih/海嘯/tsunami
  • 【起蛟龍】khí-kau-lêng/khí-kau-lîng/海嘯/tsunami
  • 【海嘯】hái-siàu/hái-siàu/海嘯/tsunami
  • 【哈伯太空望遠鏡】Ha-peh-thài-khong-bōng-oán-kiàⁿ/Ha-peh-thài-khong-bōng-uán-kiànn/哈伯太空望遠鏡/Hubble Space Telescope

  1. 逐工 ê 圖 ↩︎

  2. 本站 ê 介紹 (台語/華語) ↩︎

  3. FAQ (華語) ↩︎

昨昏 ê 圖:一萬兩千公尺懸 ê 南天景色 明仔載 ê 圖:Tī 雪樹頭殼頂 ê 月暈