智利火山頭頂 ê 南十字

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Southern Cross over Chilean Volcano
• 影像來源佮版權：Tomáš Slovinský
• 台文翻譯：An-Li Tsai (NCU)

[漢羅] 智利火山頭頂 ê 南十字

你敢有看過南十字？伊是地球南半球 siāng 有名 ê 四粒星。這張相片 sī 這個月初 tī 智利 翕 ê。南十字 拄仔好 tī 爆發 ê Villarrica 火山 ê 倒爿翕著。伊 sī tī 咱太陽系內底，活動力上強 ê 火山 之一。Kā 南十字內底上紅 ê 十字架一 tùi 上光 ê 十字架二 連去，差不多 to̍h 會指向天頂上南 ê 所在，南天極（SCP）。Tī 這个所在，所有 ê 恆星看起來 to̍h kah 地球自轉同齊 leh 踅。Tī 現代，南天極附近無較光 ê 恆星，kah 北天極（NCP）無仝，伊附近有足光 ê 北極星。若是 kā 十字架一 kah 十字架二 ê 連線延長（差不多是 in ê 角距離 ê 4 到 7 倍），to̍h 會揣著 小麥哲倫星雲。伊是 tī 咱 ê 銀河系內底，一个足光 ê 衛星星系。南十字 星群 sī 南十字星座 ê 代表，in sī 一陣真明顯 ê 星，內底有四粒 iōng 目睭 to̍h 看會著 ê 造父變星。Tī 這張相片 ê 火山頭頂，看起來敢若 leh 衝烏煙 ê sī 烏炭橐仔星雲。倒爿頂懸彼區大 koh 紅 ê，sī 當咧形成新恆星 ê 龍骨座 星雲。

[POJ] Tì-lī hóe-soaⁿ thâu-téng ê Lâm-si̍p-jī

Lí kám-ū khòaⁿ-kòe Lâm-si̍p-jī? I sī tē-kiû Lâm-puànn-kiû siāng ū-miâ ê sì lia̍p chhiⁿ. Chit-tiuⁿ siòng-phìⁿ sī chit-kò-goe̍h-chhe tī Tì-lī hip–ê. Lâm-si̍p-jī tú-á-hó tī po̍k-hoat ê Villarrica hóe-soaⁿ ê tò-pêng hip–ê. I sī tī lán Thài-iông-hē lāi-té, oa̍h-tōng-le̍k siāng kiông ê hóe-soaⁿ chi-it. Kā Lâm-si̍p-jī lāi-té siāng âng ê Si̍p-jī-kè it tùi siāng-kng ê Si̍p-jī-kè-jī liân–khì, chha-put-to to̍h ē chí-hiòng thiⁿ-téng siāng lâm ê só͘-chāi, Lâm-thian-ke̍k (SCP). Tī chit-ê só͘-chāi, só͘-ū ê hêng-chhiⁿ khòaⁿ–khí-lâi to̍h kah tē-kiû chū-choán tâng-chê leh se̍h. Tī hiān-tāi, Lâm-thian-ke̍k hù-kūn bô khah-kng ê hêng-chhiⁿ, kah Pak-thian-ke̍k (NCP) bô-kâng, i hù-kūn ū chiok-kng ê Pak-ke̍k-chhiⁿ. Nā-sī kā Si̍p-jī-kè it kah Si̍p-jī-kè jī ê liân-sòaⁿ iân-tn̂g (chha-put-to sī in ê kak-kū-lî ê sì kàu chhit pōe), to̍h ē chhōe-tio̍h Siò Be̍h-thiat-lûn seng-hûn. I sī tī lán-ê Gîn-hô-hē lāi-té, chi̍t-ê chiok-kng ê ūi-chhiⁿ seng-hē. Lâm-si̍p-jī seng-kûn sī Lâm-si̍p-jī seng-chō ê tāi-piáu, in sī chi̍t-tiuⁿ chin bêng-hián ê chhiⁿ, lāi-té ū sì-lia̍p iōng ba̍k-chiu to̍h khòaⁿ-ē-tio̍h ê Chō-hū-piàn-seng. Tī chit-tiuⁿ siòng-phìⁿ ê hóe-soaⁿ thâu-téng, khòaⁿ–khí-lâi ká-ná leh chhèng o͘-ian ê sī O͘-thòaⁿ-lok-á seng-hûn. Tò-pêng téng-koân hit-khu tòa koh âng ê, sī tn̂g-leh hêng-sêng sin-hêng-chhiⁿ ê Chûn-té-chō seng-hûn.

[KIP] Tì-lī hué-suann thâu-tíng ê Lâm-si̍p-jī

Lí kám-ū khuànn-kuè Lâm-si̍p-jī? I sī tē-kiû Lâm-puànn-kiû siāng ū-miâ ê sì lia̍p tshinn. Tsit-tiunn siòng-phìnn sī tsit-kò-gue̍h-tshe tī Tì-lī hip–ê. Lâm-si̍p-jī tú-á-hó tī po̍k-huat ê Villarrica hué-suann ê tò-pîng hip–ê. I sī tī lán Thài-iông-hē lāi-té, ua̍h-tōng-li̍k siāng kiông ê hué-suann tsi-it. Kā Lâm-si̍p-jī lāi-té siāng âng ê Si̍p-jī-kè it tuì siāng-kng ê Si̍p-jī-kè-jī liân–khì, tsha-put-to to̍h ē tsí-hiòng thinn-tíng siāng lâm ê sóo-tsāi, Lâm-thian-ki̍k (SCP). Tī tsit-ê sóo-tsāi, sóo-ū ê hîng-tshinn khuànn–khí-lâi to̍h kah tē-kîu tsū-tsuán tâng-tsê leh se̍h. Tī hiān-tāi, Lâm-thian-ki̍k hù-kūn bô khah-kng ê hîng-tshinn, kah Pak-thian-ki̍k (NCP) bô-kâng, i hù-kūn ū tsiok-kng ê Pak-ki̍k-tshinn. Nā-sī kā Si̍p-jī-kè it kah Si̍p-jī-kè jī ê liân-suànn iân-tn̂g (tsha-put-to sī in ê kak-kū-lî ê sì kàu tshit puē), to̍h ē tshuē-tio̍h Siò Be̍h-thiat-lûn sing-hûn. I sī tī lán-ê Gîn-hô-hē lāi-té, tsi̍t-ê tsiok-kng ê uī-tshinn sing-hē. Lâm-si̍p-jī sing-kûn sī Lâm-si̍p-jī sing-tsō ê tāi-piáu, in sī tsi̍t-tiunn tsin bîng-hián ê tshinn, lāi-té ū sì-lia̍p iōng ba̍k-tsiu to̍h khuànn-ē-tio̍h ê Tsō-hū-piàn-sing. Tī tsit-tiunn siòng-phìnn ê hué-suann thâu-tíng, khuànn-khí-lâi ká-ná leh tshìng oo-ian ê sī Oo-thuànn-lok-á sing-hûn. Tò-pîng tíng-kuân hit-khu tuà koh âng ê, sī tn̂g-leh hîng-sîng sin-hîng-tshinn ê Tsûn-té-tsō sing-hûn.

[English] Southern Cross over Chilean Volcano 

Have you ever seen the Southern Cross?This famous four-star icon is best seen from Earth’s Southern Hemisphere.The featured image was taken last month in Chile and captures the Southern Cross just to the left of erupting Villarrica , one of the most active volcanos in our Solar System . Connecting the reddest Southern Cross star Gacrux through the brightest star Acrux points near the most southern location in the sky: the South Celestial Pole (SCP), around which all southern stars appear to spin as the Earth turns .In modern times , no bright star resides near the SCP, unlike in the north where bright Polaris now appears near the NCP. Extending the Gacrux - Acrux line still further (from about four to about seven times their angular separation) leads near the Small Magellanic Cloud , a bright satellite galaxy of our Milky Way Galaxy . The Southern Cross asterism dominates the Crux constellation , a deeper array of stars that includes four Cepheid variable stars visible to the unaided eye.Just above the volcano in the image, and looking like a dark plume, is the Coalsack Nebula , while the large red star-forming Carina Nebula is visible on the upper left.

詞彙學習（漢羅/POJ/KIP/華語/English）

• 【南十字】Lâm-si̍p-jī/Lâm-si̍p-jī/南十字/the Southern Cross
• 【南半球】Lâm-pòaⁿ-kiû/Lâm-puànn-kiû/南半球/Southern Hemisphere
• 【太陽系】Thài-iông-hē/Thài-iông-hē/太陽系/the Solar System
• 【十字架一】Si̍p-jī-kè it/Si̍p-jī-kè it/十字架一/Gacrux
• 【十字架二】Si̍p-jī-kè jī/Si̍p-jī-kè jī/十字架二/Acrux
• 【南天極】Lâm-thian-ke̍k/Lâm-thian-ki̍k/南天極/the South Celestial Pole (SCP)
• 【地球自轉】tē-kiû chū-choán/tē-kiû tsū-tsuán/地球自轉/Earth spin
• 【北天極】Pak-thian-ke̍k/Pak-thian-ki̍k/北天極/the North Celestial Pole (NCP)
• 【北極星】Pak-ke̍k-chhiⁿ/Pak-ki̍k-tshinn/北極星/Polaris
• 【角距離】kak-kū-lî/kak-kū-lî/角距離/angular seperation
• 【小麥哲倫星雲】Siò Be̍h-thiat-lûn seng-hûn/Siò Be̍h-thiat-lûn sing-hûn/小麥哲倫星雲/the Small Magellanic Cloud
• 【銀河系】Gîn-hô-hē/Gîn-hô-hē/銀河系/Milky Way Galaxy
• 【衛星星系】ūi-chhiⁿ seng-hē/uī-tshinn sing-hē/衛星星系/satellite galaxy
• 【南十字星群】Lâm-si̍p-jī seng-kûn/Lâm-si̍p-jī sing-kûn/南十字星群/the Southern Cross asterism
• 【南十字星座】Lâm-si̍p-jī-chō/Lâm-si̍p-jī-tsō/南十字星座/the Crux constellation
• 【造父變星】Chō-hū-piàn-seng/Tsō-hū-piàn-sing/造父變星/Cepheid variable stars
• 【烏炭橐仔星雲】O͘-thòaⁿ-lok-á-seng-hûn/Oo-thuànn-lok-á-sing-hûn/煤袋星雲/Coalsack Nebula
• 【龍骨座星雲】Liông-kut-chō-seng-hûn/Liông-kut-tsō-sing-hûn/船底座星雲/Carina Nebula
• 【船底座星雲】Chûn-té-chō-seng-hûn/Tsûn-té-tsō-sing-hûn/船底座星雲/Carina Nebula