厝邊 ê 大質量捲螺仔星系 NGC 2841

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你³解說⁴。

• 原始文章：Massive Nearby Spiral Galaxy NGC 2841
• 影像來源：NASA, ESA, Hubble, Subaru
• 製作 & 版權：Roberto Colombari
• 台文翻譯：An-Li Tsai (NCU)

[漢羅] 厝邊 ê 大質量捲螺仔星系 NGC 2841

NGC 2841 是一个咱熟似 ê 大質量星系。伊是一个佇北爿 ê 大熊座 內底，干焦 4600 萬光年遠 ê 捲螺仔星系。這个遮爾清楚 koh 美麗 ê 宇宙島，有一个足明顯 ê 黃色星系核 kah 星系盤。佇一節一節、絞 ân ê 捲螺仔 手骨內底，有塗粉帶、有粉紅仔斑 ê 恆星形成區、閣有少年 ê 藍色星團。毋閣，大部份 ê 捲螺仔星系 sī 有較分明 ê 手骨 kah 較大 ê 恆星形成區。NGC 2841 ê 直徑超過 15 萬 光年 闊，比 咱 ê 銀河閣較大。這張組合影像是 kā 2.4 公尺闊 ê 踅地衛星 哈伯太空望遠鏡 kah 8.2 公尺闊 ê 地面望遠鏡 Subaru 望遠鏡，合併感光而成 ê。Ùi X 光 ê 影像推測，恆星風 kah 恆星爆炸產生噴懸 ê 高溫氣體，湠到 NGC 2841 ê 銀暈。

[POJ] Chhù-piⁿ ê tōa-chit-liōng kńg-lê-á seng-hē NGC jī-pat-sù-it

NGC jī-pat-sù-it sī chi̍t-ê lán se̍k-sāi ê tōa-chit-liōng seng-hē. I sī chi̍t-ê tī pak-pêng ê Tāi-hîm-chō lāi-té, kan-na sì-chheng-la̍k-pah-bān kng-nî hn̄g ê kńg-lê-á-seng-hē. Chit-ê chiah-nī chheng-chhó͘ koh bí-lē ê ú-tiū-tó, ū chi̍t-ê chiok bêng-hián ê n̂g-sek seng-hē-he̍k kah seng-hē-pôaⁿ. Tī chi̍t-chat-chi̍t-chat, ká-ân ê kńg-lê-á-chhiú-kut lāi-té, ū thô͘-hún-tòa, ū hún-âng-á-pan ê  hêng-chhiⁿ-hêng-sêng-khu, koh-ū siàu-liân ê nâ-sek seng-thoân. M̄-koh, tōa-pō͘-hūn ê kńg-lê-á-seng-hē sī ū khah hun-bêng ê chhiú-kut kah khah tōa ê hêng-chhiⁿ-hêng-sêng-khu. NGC jī-pat-sù-it ê ti̍t-kèng chhiau-kòe cha̍p-gō͘-bān kng-nî khoah, pí lán-ê Gîn-hô koh-khah tōa. Chit-tiuⁿ cho͘-ha̍p iáⁿ-siōng sī kā jī-tiám-sù kong-chhioh khoah ê se̍h-tē ūi-chhiⁿ Ha-peh-thài-khong-bōng-oán-kiàⁿ kah peh-tiám-jī kong-chhioh khoah ê tē-bīn bōng-oán-kiàⁿ Subaru bōng-oán-kiàⁿ, ha̍p-pèng kám-kng jī-sêng ê. Ùi X-kng ê iáⁿ-siōng thui-chhek, hêng-chhiⁿ-hong kah hêng-chhiⁿ po̍k-chà sán-seng phùn-koân ê ko-un khì-thé, thòaⁿ-kàu NGC jī-pat-sù-it ê gîn-n̄g.

[KIP] Tshù-pinn ê tuā-tsit-liōng kńg-lê-á sing-hē NGC jī-pat-sù-it

NGC jī-pat-sù-it sī tsi̍t-ê lán si̍k-sāi ê tuā-tsit-liōng sing-hē. I sī tsi̍t-ê tī pak-pîng ê Tāi-hîm-tsō lāi-té, kan-na sì-tshing-la̍k-pah-bān kng-nî hn̄g ê kńg-lê-á-sing-hē. Tsit-ê tsiah-nī tshing-tshóo koh bí-lē ê ú-tiū-tó, ū tsi̍t-ê tsiok bîng-hián ê n̂g-sik sing-hē-hi̍k kah sing-hē-puânn. Tī tsi̍t-tsat-tsi̍t-tsat, ká-ân ê kńg-lê-á-tshiú-kut lāi-té, ū thôo-hún-tuà, ū hún-âng-á-pan ê  hîng-tshinn-hîng-sîng-khu, koh-ū siàu-liân ê nâ-sik sing-thuân. M̄-koh, tuā-pōo-hūn ê kńg-lê-á-sing-hē sī ū khah hun-bîng ê tshiú-kut kah khah tuā ê hîng-tshinn-hîng-sîng-khu. NGC jī-pat-sù-it ê ti̍t-kìng tshiau-kuè tsa̍p-gōo-bān kng-nî khuah, pí lán-ê Gîn-hô koh-khah tuā. Tsit-tiunn tsoo-ha̍p iánn-siōng sī kā jī-tiám-sù kong-tshioh khuah ê se̍h-tē uī-tshinn Ha-peh-thài-khong-bōng-uán-kiànn kah peh-tiám-jī kong-tshioh khuah ê tē-bīn bōng-uán-kiànn Subaru bōng-uán-kiànn, ha̍p-pìng kám-kng jī-sîng ê. Uì X-kng ê iánn-siōng thui-tshik, hîng-tshinn-hong kah hîng-tshinn po̍k-tsà sán-sing phùn-kuân ê ko-un khì-thé, thuànn-kàu NGC jī-pat-sù-it ê gîn-n̄g.

[English] Massive Nearby Spiral Galaxy NGC 2841

It is one of the more massive galaxies known.A mere 46 million light-years distant, spiral galaxy NGC 2841 can be found in the northern constellation of Ursa Major .This sharp view of the gorgeous island universe shows off a striking yellow nucleus and galactic disk.Dust lanes, small, pink star-forming regions, and young blue star clustersare embedded in the patchy, tightly wound spiral arms. In contrast , many other spiralsexhibit grand, sweeping arms with large star-forming regions. NGC 2841 has a diameter of over 150,000 light-years , even larger than our own Milky Way.The featured composite image merges exposures from the orbiting 2.4-meter Hubble Space Telescope and the ground-based 8.2-meter Subaru Telescope . X-ray images suggest that resulting winds and stellar explosions createplumes of hot gas extending into a halo around NGC 2841 .

詞彙學習