迒過北極天頂 ê 彎弓橋

Page(/daily/2021/01/20210113.md)

探索宇宙1!逐工會揀一幅無仝款 ê 影像抑是相片,𤆬你熟似咱這个迷人 ê 宇宙,閣有專業天文學者2為你解說3

[漢羅] 迒過北極天頂 ê 彎弓橋

天頂彼兩 ê 大大 ê 彎弓橋是啥物?Tī 倒手爿彼个你可能知影,是咱 銀河 ê 中央盤。Tī 這个大盤仔內底 ê 恆星 kah 星雲,to̍h 愛 tī 南半球較看會著。Tī 這个星橋下跤,彼粒 生鉎 ê 柑仔色 行星是 火星,另外彼个有形體 ê 是 仙女座星系。Tī 這个 冷吱吱 ê 北極暗暝,有幾分鐘仔,正手爿出現第二个 大彎弓橋,這是 極光,另外一半愛 tī 北半球才看會著。極光比恆星離咱較近,伊其實是地球較懸 ê 大氣層 內底 leh 發光 ê 空氣。Tī 青色 ê 極光橋 面頂,有咱 熟似 ê 北斗星這張數位影像 是 kā 18 張 tī 12 月中踮 挪威 翕 ê 相片組合起來 ê。

[POJ] Hāⁿ kòe Pak-ke̍k thiⁿ-téng ê oan-kiong-kiô

Thiⁿ-téng hit nn̄g-ê tōa-tōa-ê oan-kiong-kiô sī siáⁿ-mih? Tī tò-chhiú-pêng hit-ê lí khó-lêng chai-iáⁿ, sī lán Gîn-hô ê tiong-iong-pôaⁿ. Tī chi̍t-ê tōa-pôaⁿ-á lāi-té ê hêng-chhiⁿ kah seng-hûn, tio̍h ài tī Lâm-pôaⁿ-kiû khah khòaⁿ-ē-tio̍h. Tī chit-ê seng-kiô ē-kha, hit-lia̍p seⁿ-sian ê kam-á-sek kiâⁿ-chhiⁿ sī Hóe-chhiⁿ, lēng-gōa hit-ê ū hêng-thé-ê sī Sian-lú-chō seng-hē. Tī chit-ê léng-ki-ki ê pak-ke̍k àm-mî, ū kúi-hun-cheng-á, chiàⁿ-chhiú-pêng chhut-hiān tē-jī-ê tōa oan-kiong-kiô, che-sī ke̍k-kng, lēng-gōa chi̍t-pòaⁿ ài-tī pak-pòaⁿ-kiû chiah khòaⁿ-ē-tio̍h. Ke̍k-kng pí hêng-chhiⁿ lî lán khah-kūn, i kî-si̍t sī tē-kiû khah-koân ê tōa-khì-chân lāi-té leh hoat-kng ê khong-khì. Tī chheⁿ-sek ê ke̍k-kng-kiô bīn-téng, ū lán se̍k-sāi ê Pak-táu-chhiⁿ. Chit-tiuⁿ só͘-ūi iáⁿ-siōng sī kā cha̍p-peh tiuⁿ tī cha̍p-jī goe̍h-tiong tiám Nô͘-ui hip-ê siòng-phìⁿ cho͘-ha̍p–khí-lâi-ê.

[KIP] Hānn kuè Pak-ki̍k thinn-tíng ê uan-kiong-kiô

Thinn-tíng hit nn̄g-ê tuā-tuā-ê uan-kiong-kiô sī siánn-mih? Tī tò-tshíu-pîng hit-ê lí khó-lîng tsai-iánn, sī lán Gîn-hô ê tiong-iong-puânn. Tī tsi̍t-ê tuā-puânn-á lāi-té ê hîng-tshinn kah sing-hûn, tio̍h ài tī Lâm-puânn-kîu khah khuànn-ē-tio̍h. Tī tsit-ê sing-kiô ē-kha, hit-lia̍p senn-sian ê kam-á-sik kiânn-tshinn sī Hué-tshinn, līng-guā hit-ê ū hîng-thé-ê sī Sian-lú-tsō sing-hē. Tī tsit-ê líng-ki-ki ê pak-ki̍k àm-mî, ū kuí-hun-tsing-á, tsiànn-tshíu-pîng tshut-hiān tē-jī-ê tuā uan-kiong-kiô, tse-sī ki̍k-kng, līng-guā tsi̍t-puànn ài-tī pak-puànn-kîu tsiah khuànn-ē-tio̍h. Ki̍k-kng pí hîng-tshinn lî lán khah-kūn, i kî-si̍t sī tē-kîu khah-kuân ê tuā-khì-tsân lāi-té leh huat-kng ê khong-khì. Tī tshenn-sik ê ki̍k-kng-kiô bīn-tíng, ū lán si̍k-sāi ê Pak-táu-tshinn. Tsit-tiunn sóo-uī iánn-siōng sī kā tsa̍p-peh tiunn tī tsa̍p-jī gue̍h-tiong tiám Nôo-ui hip-ê siòng-phìnn tsoo-ha̍p–khí-lâi-ê.

[English] Arches Across an Arctic Sky  

What are these two giant arches across the sky?Perhaps the more familiar one, on the left, is the central band of our Milky Way Galaxy .This grand disk of stars and nebulas here appears to encircle much of the southern sky.Visible below the stellar arch is the rusty-orange planet Mars and the extended Andromeda galaxy .For a few minutes during this cold arctic night, a second giant arch appeared to the right, encircling part of the northern sky: an aurora .Auroras are much closer than stars as they are composed of glowing air high in Earth’s atmosphere . Visible outside the green auroral arch is the group of stars popularly known as the Big Dipper . The featured digital composite of 18 images was captured in mid-December over the Lofoten Islands in Norway .

詞彙學習(台語漢字/POJ/KIP/華語漢字/English)

  • 【北極】Pak-ke̍k/Pak-ki̍k/北極/Arctic
  • 【彎弓橋】oan-kiong-kiô/uân-kiong-kiô/拱橋/arches
  • 【圓栱橋】oân-kong-kiô/uân-kong-kiô/拱橋/arches
  • 【中央盤】tiong-iong-pôaⁿ/tiong-iong-puânn/中央盤面/central band
  • 【恆星】hêng-chhiⁿ/hîng-tshinn/恆星/star
  • 【星雲】seng-hûn/sing-hûn/星雲/nebular
  • 【星橋】seng-kiô/sing-kiô/星橋/stellar arch
  • 【生鉎 ê 柑仔色】seⁿ-sian ê kam-á-sek/senn-sian ê kam-á-sik/生鏽的橘色/rusty-orange
  • 【行星】kiâⁿ-chhiⁿ/kiânn-tshinn/行星/planet
  • 【仙女座星系】Sian-lú-chō seng-hē/Sian-lú-tsō sing-hē/仙女座星系/the Andromeda galaxy
  • 【大氣層】tōa-khì-chân/tuā-khì-tsân/大氣層/atmosphere
  • 【北斗星】Pak-táu-chhiⁿ/Pak-táu-tshinn/北斗七星/Big Dipper
  • 【挪威】Ná-ui/Ná-ui/挪威/Norway

  1. 逐工 ê 圖 ↩︎

  2. 本站 ê 介紹 (台語/華語) ↩︎

  3. FAQ (華語) ↩︎

昨昏 ê 圖:巴西古早時代 ê 星座 明仔載 ê 圖:天頂厚-tut-tut ê 極光