泰坦:Kā 土星閘牢 ê 衛星

Page(/daily/2021/01/20210109.md)

探索宇宙1!逐工會揀一幅無仝款 ê 影像抑是相片,𤆬你熟似咱這个迷人 ê 宇宙,閣有專業天文學者2為你解說3

[漢羅] 泰坦:Kā 土星閘牢 ê 衛星

To̍h 親像地球仝款,土星上大粒 ê 衛星泰坦 嘛去予土星鎖牢,tùi 土星同步自轉矣。這張 拼鬥影像 是 2012 年 5 月 ê 時陣 Cassini 太空船 tī 土星 ê 後壁面翕 ê ,to̍h 是 tī 永遠看 袂著有環 ê 氣態巨行星 ê 彼爿面。泰坦是 太陽系 內底唯一一粒有厚厚 ê 大氣層 ê 衛星。嘛是太陽系內底,除了地球以外,唯一一粒定定 tī 表面有液體,而且 kah 地球仝款,是一个有 落雨 kah 蒸發循環 ê 所在。Tī Cassini 太空船面頂看,這粒直徑 5000 公里闊 ê 衛星 kā 土星 ê 環 kah 雲閘牢矣!你閣看會著泰坦高層大氣 ê 雲霧。Tī 中央附近 ê 暗沙崙區叫做 香格里拉。Cassini 太空船送去泰坦 ê Huygens 探測船,是 登陸 太空船 內底 離地球上遠 ê。伊上尾 to̍h tī 影像中央下跤 ê 倒爿安息。

[POJ] Thài-thàn: Kā Thó͘-chhiⁿ cha̍h-tiâu ê ūi-chhiⁿ

To̍h chhin-chhiūⁿ tē-kiû kāng-khoán, Thó͘-chhiⁿ siāng-tōa-lia̍p ê ūi-chhiⁿ Thài-thàn mā khì-hō͘ Thó͘-chhiⁿ só-tiâu, tùi Thó͘-chhiⁿ tông-pō͘-chū-choán ah. Chit-tiuⁿ pheng-tàu iáⁿ-siōng si jī-khòng-it-jí nî gō͘ goe̍h ê sî-chūn Cassini Thài-khong-chûn tī Thó͘-chhiⁿ ê āu-piah-bīn hip ê, to̍h sī tī éng-oán khòaⁿ-bē-tio̍h ū-khoân ê khì-thài kū-kiâⁿ-chhiⁿ ê hit-pêng-bīn. Thài-thàn sī thài-iông-hē lāi-té ûi-it chi̍t-lia̍p ū kāu-kāu-ê tōa-khì-chân ê ūi-chhiⁿ. Mā-sī thài-iông-hē lāi-té, tû-liáu tē-kiû í-gōa, ûi-it chi̍t-lia̍p tiāⁿ-tiāⁿ tī piáu-bīn ū e̍k-thé, jî-chhiáⁿ kah tē-kiû kāng-khoán, sī chi̍t-ê ū lo̍h-hō͘ kah cheng-hoat sûn-khoân ê só͘-chāi. Tī Cassini thài-khong-chûn bīn-téng khòaⁿ, chit-lia̍p ti̍t-kèng gō͘-chheng kong-lí khoah ê ūi-chhiⁿ kā thó͘-chhiⁿ ê khoân kah hûn cha̍h-tiâu ah! Lí koh khòaⁿ-ē-tio̍h Thài-thàn ko-chân tōa-khì ê hûn-bū. Tī tiong-ng hù-kūn ê àm soa-lūn khu kiò-chò Hiang-keh-lí-la. Cassini thài-khong-chûn sàng-khì Thài-thàn ê Huygens thàm-chhek-chûn, sī teng-lio̍k thài-khong-chûn lāi-té lî tē-kiû siāng-hn̄g ê. I siāng-bóe to̍h tī siòng-phìⁿ tiong-ng ē-kha ê tó-pêng an-se̍k.

[KIP] Thài-thàn: Kā Thóo-tshinn tsa̍h-tiâu ê ūi-tshinn

To̍h tshin-tshiūnn tē-kiû kāng-khuán, Thóo-tshinn siāng-tuā-lia̍p ê uī-tshinn Thài-thàn mā khì-hōo Thóo-tshinn só-tiâu, tuì Thóo-tshinn tông-pōo-tsū-tsuán ah. Tsit-tiunn phing-tàu iánn-siōng si jī-khòng-it-jí nî gōo gue̍h ê sî-tsūn Cassini Thài-khong-tsûn tī Thóo-tshinn ê āu-piah-bīn hip ê, to̍h sī tī íng-uán khuànn-bē-tio̍h ū-khuân ê khì-thài kū-kiânn-tshinn ê hit-pîng-bīn. Thài-thàn sī thài-iông-hē lāi-té uî-it tsi̍t-lia̍p ū kāu-kāu-ê tuā-khì-tsân ê uī-tshinn. Mā-sī thài-iông-hē lāi-té, tû-liáu tē-kiû í-guā, uî-it tsi̍t-lia̍p tiānn-tiānn tī piáu-bīn ū i̍k-thé, jî-tshiánn kah tē-kîu kāng-khuán, sī tsi̍t-ê ū lo̍h-hōo kah tsing-huat sûn-khuân ê sóo-tsāi. Tī Cassini thài-khong-tsûn bīn-tíng khuànn, tsit-lia̍p ti̍t-kìng gōo-tshing kong-lí khuah ê uī-tshinn kā thóo-tshinn ê khuân kah hûn tsa̍h-tiâu ah! Lí koh khuànn-ē-tio̍h Thài-thàn ko-tsân tuā-khì ê hûn-bū. Tī tiong-ng hù-kūn ê àm sua-lūn khu kiò-tsò Hiang-keh-lí-la. Cassini thài-khong-tsûn sàng-khì Thài-thàn ê Huygens thàm-tshik-tsûn, sī ting-lio̍k thài-khong-tsûn lāi-té lî tē-kîu siāng-hn̄g ê. I siāng-bué to̍h tī siòng-phìnn tiong-ng ē-kha ê tó-pîng an-si̍k.

[English] Titan: Moon over Saturn

Like Earth’s moon, Saturn’s largest moon Titan is locked in synchronous rotation. This mosaic of images recorded by the Cassini spacecraft in May of 2012shows its anti-Saturn side, the side always facing away from theringed gas giant.The only moon in the solar system with a dense atmosphere,Titan is the only solar system world besides Earth known tohave standing bodies of liquid on its surface and an earthlikecycle of liquid rain and evaporation.Its high altitude layer of atmospheric haze is evident in the Cassiniview of the 5,000 kilometer diameter moon over Saturn’s rings and cloudtops. Near centeris the dark dune-filled region known as Shangri-La .The Cassini-delivered Huygens probe rests below and left of center,after the most distant landing for a spacecraft from Earth.

詞彙學習(台語漢字/POJ/KIP/華語漢字/English)

  • 【泰坦】Thài-thàn/Thài-thàn/泰坦/Titan
  • 【同步自轉】tông-pō͘-chū-choán/tông-pōo-tsū-tsuán/同步自轉/synchronous rotation
  • 【拼鬥影像】pheng-tàu iáⁿ-siōng/phing-tàu iánn-siōng/拼接而成的組合影像/mosaic image
  • 【氣態巨行星】khì-thài kū-kiâⁿ-chhiⁿ/khì-thài kū-kiânn-tshinn/氣態巨行星/gas giant
  • 【濃厚】lông-hō͘/lông-hōo/濃厚/dense
  • 【大氣層】tōa-khì-chân/tuā-khì-tsân/大氣層/atmosphere
  • 【有環 ê 氣態巨行星】ū-khoân-ê khì-thài kū-kiâⁿ-chhiⁿ/ū-khuân-ê khì-thài kū-kiânn-tshinn/環系氣態巨行星/ringed gas giant
  • 【液體】e̍k-thé/i̍k-thé/液體/liquid
  • 【蒸發】cheng-hoat/tsing-huat/蒸發/evaporation
  • 【Cassini 太空船】Khah-si-nî thài-khong-chûn/Khah-si-nî thài-khong-tsûn/卡西尼太空船/Cassini spacecraft
  • 【直徑】ti̍t-kèng/ti̍t-kìng/直徑/diameter
  • 【高海拔層】ko-hái-poa̍t-chân/ko-hái-pua̍t-tsân/高海拔層/high altitude layer
  • 【雲霧】bông-bū/bông-bū/霧霾/haze
  • 【香格里拉】Hiáng-keh-lí-la/Hiáng-keh-lí-la/香格里拉/Shangri-La
  • 【Huygens 探測船】Hūi-kiⁿ-su thàm-chhek-chûn/Huī-kinn-su thàm-tshik-tsûn/惠更斯探測船/Huygens probe

  1. 逐工 ê 圖 ↩︎

  2. 本站 ê 介紹 (台語/華語) ↩︎

  3. FAQ (華語) ↩︎

昨昏 ê 圖:NGC 1365:壯麗 ê 宇宙島 明仔載 ê 圖:R136 星團大出