21 世紀溼版翕相法翕 ê 月球

Page(/daily/2021/01/20210102.md)

探索宇宙1!逐工會揀一幅無仝款 ê 影像抑是相片,𤆬你熟似咱這个迷人 ê 宇宙,閣有專業天文學者2為你解說3

[漢羅] 21 世紀溼版翕相法翕 ê 月球

佇 19 世紀中,一款上早用來翕月球表面 ê 技術叫做溼版火棉膠處理法。這是英國天文學者 Warren De la Rue 採用 ê 方法。欲翕一張相 to̍h 愛佇玻璃片面頂漆一重厚厚 ê 透明混合物,用硝酸鹽做感光劑,囥佇望遠鏡感光,顯影做成玻璃負片。為著欲維持相片 ê 感光度,規个處理過程對漆料、感光、到顯影,攏愛佇玻璃片焦去進前完成,差不多是 10 到 15 分鐘以內。這个現代版 ê 溼版翕相法,重新用現代 ê 化學物漆佇 21 世紀 五金行買會著 ê 玻璃片面頂來 顯相,這是欲向早期月球攝影 ê 方法 致敬。佇頂閣月 11 月 28 用 8 x 10 比例 ê 相機佮後埕望遠鏡翕 ê 這張,忠實記錄佇 月圓 ê 時看會著山崙 ê 月球大星石坑、明顯 ê 放射線、佮烏暗滑溜 ê 月海。煞落來 kā 相片數位化,影像佇玻璃片面頂是直徑 8.5 公分,感光時間是 2 分鐘。這个溼版翕相法 ê 有效感光度差不多是 ISO 1。你手機仔 ê 相機 ê 感光度差不多有 ISO 100 到 6400,而且 保持焦燥…

[POJ] Jī-cha̍p-it sè-kí si̍p-pán hip-siòng-hoat hip–ê goe̍h-kiû

Tī cha̍p-káu sè-kí tiong, chi̍t-khoán siōng-chá iōng-lâi hip goe̍h-kiû piáu-bīn ê ki-su̍t kiò-chò si̍p-pán hóe-mî-ka chhú-lí-hoat. Che-sī Eng-kok thian-bûn ha̍k-chiá Warren De la Rue chhái-iōng ê hong-hoat. Beh hip chi̍t-tiuⁿ siòng to̍h ài tī po-lê-phìⁿ bīn-téng chhat chi̍t-têng kāu-kāu-ê thàu-bêng hūn-ha̍p-but. Iōng siau-sng-iâm chò kám-kng-che, khǹg tī bōng-oán-kiàⁿ kám-kng, hián-iáⁿ chò-chiâⁿ po-lê-hū-phìⁿ. Ūi-tio̍h beh ûi-chhî siòng-phìⁿ ê kám-kng-tō, kui-ê chhú-lí kòe-têng úi chha̍t-liāu, kám-kng, kàu hián-iáⁿ, lóng ài tī po-lê-phìⁿ ta–khì chìn-chêng oân-sêng, chha-put-to sī cha̍p kàu cha̍p-gō͘ hun-cheng i-lāi. Chit-ê hiān-tāi-pán ê si̍p-pán hip-siòng-hoat, tiông-sin iōng hiān-tāi ê hòa-ha̍k-but chhat tī jī-cha̍p-it sè-kí ngó͘-kim-hâng bé-ē-tio̍h ê po-lê-phìⁿ bīn-téng lâi hián-siòng, che sī beh hiòng chá-kî goe̍h-kiû liap-iáⁿ ê hong-hoat tì-kèng. Tī téng-koh-goe̍h cha̍p-it goe̍h jī-peh iōng peh sêng cha̍p pí-lē ê siòng-ki kah āu-tiâⁿ bōng-oán-kiàⁿ hip ê chi̍t-tiuⁿ, tiong-si̍t kì-lo̍k tī goe̍h-îⁿ ê sî khòaⁿ-ē-tio̍h soaⁿ-lūn ê goe̍h-kiû tōa chheⁿ-chio̍h kheⁿ, bêng-hián ê hòng-siā-sòaⁿ, kah o͘-àm ku̍t-liu ê goe̍h-hái. Soah–lo̍h-lâi kā siòng-phìⁿ só͘-ūi-hòa, iáⁿ-siōng tī po-lê-phìⁿ bīn-téng sī ti̍t-kèng peh-tiám-gō͘ kong-hun, kám-kng sî-kan sī nn̄g hun-cheng. Chit-ê si̍p-pán hip-siòng-hoat ê iú-hāu kám-kng-tō͘ chha-put-to sī ISO chi̍t. Li chhiú-ki-á ê siòng-ki ê kám-kng-tō͘ chha-put-to ū ISO chi̍t-pah  kàu la̍k-chheng-sì, jî-chhiáⁿ ài pó-chhî ta-sò…

[KIP] Jī-tsa̍p-it sè-kí si̍p-pán hip-siòng-huat hip–ê gue̍h-kîu

Tī tsa̍p-káu sè-kí tiong, tsi̍t-khuán siōng-tsá iōng-lâi hip gue̍h-kîu piáu-bīn ê ki-su̍t kiò-tsò si̍p-pán hué-mî-ka tshú-lí-huat. Tse-sī Ing-kok thian-bûn ha̍k-tsiá Warren De la Rue tshái-iōng ê hong-huat. Beh hip tsi̍t-tiunn siòng to̍h ài tī po-lê-phìnn bīn-tíng tshat tsi̍t-tîng kāu-kāu-ê thàu-bîng hūn-ha̍p-but. Iōng siau-sng-iâm tsò kám-kng-tse, khǹg tī bōng-uán-kiànn kám-kng, hián-iánn tsò-tsiânn po-lê-hū-phìnn. Uī-tio̍h beh uî-tshî siòng-phìnn ê kám-kng-tō, kui-ê tshú-lí kuè-tîng uí tsha̍t-liāu, kám-kng, kàu hián-iánn, lóng ài tī po-lê-phìnn ta–khì tsìn-tsîng uân-sîng, tsha-put-to sī tsa̍p kàu tsa̍p-gōo hun-tsing i-lāi. Tsit-ê hiān-tāi-pán ê si̍p-pán hip-siòng-huat, tiông-sin iōng hiān-tāi ê huà-ha̍k-but tshat tī jī-tsa̍p-it sè-kí ngóo-kim-hâng bé-ē-tio̍h ê po-lê-phìnn bīn-tíng lâi hián-siòng, tse sī beh hiòng tsá-kî gue̍h-kîu liap-iánn ê hong-huat tì-kìng. Tī tíng-koh-gue̍h tsa̍p-it gue̍h jī-peh iōng peh sîng tsa̍p pí-lē ê siòng-ki kah āu-tiânn bōng-uán-kiànn hip ê tsi̍t-tiunn, tiong-si̍t kì-lo̍k tī gue̍h-înn ê sî khuànn-ē-tio̍h suann-lūn ê gue̍h-kîu tuā tshenn-tsio̍h khenn, bîng-hián ê hòng-siā-suànn, kah oo-àm ku̍t-liu ê gue̍h-hái. Suah–lo̍h-lâi kā siòng-phìnn sóo-uī-huà, iánn-siōng tī po-lê-phìnn bīn-tíng sī ti̍t-kìng peh-tiám-gōo kong-hun, kám-kng sî-kan sī nn̄g hun-tsing. Tsit-ê si̍p-pán hip-siòng-huat ê íu-hāu kám-kng-tōo tsha-put-to sī ISO tsi̍t. Li tshíu-ki-á ê siòng-ki ê kám-kng-tōo tsha-put-to ū ISO tsi̍t-pah  kàu la̍k-tshing-sì, jî-tshiánn ài pó-tshî ta-sò…

[English] 21st Century Wet Collodion Moon

In the mid 19th century, one of the first photographic technologies usedto record the lunar surface was the wet-plate collodion process, notably employed by British astronomer Warren De la Rue .To capture an image, a thick, transparent mixture wasused to coat a glass plate, sensitized with silvernitrate, exposed at the telescope, and then developedto create a negative image on the plate.To maintain photographic sensitivity,the entire process, from coating to exposure to developing, had to becompleted before the plate dried, in a span of about 10 to 15 minutes.This modern version of a wet-plate collodion image celebrates lunar photography’s early days, reproducing the process using modernchemicals to coat a glass plate from a 21st century hardware store.Captured last November 28 with an 8x10 view camera and backyard telescope,it faithfully records large craters, bright rays,and dark, smooth mare of the waxing gibbous Moon .Subsequently digitized, the image on the plate was 8.5 centimeters indiameter and exposed while tracking for 2 minutes.The wet plate’s effective photographic sensitivity was about ISO 1. In your smart phone, the camera sensor probably has a photographicsensitivity range of ISO 100 to 6400 (and needs to be kept dry …).

詞彙學習(台語漢字/POJ/KIP/華語漢字/English)

  • 【溼版火棉膠處理法】si̍p-pán hóe-mî-ka chhú-lí-hoat/si̍p-pán hué-mî-ka tshú-lí-huat/溼版火棉膠處理法/wet-plate collodion process
  • 【硝酸鹽】siau-sng-iâm/siau-sng-iâm/硝酸鹽/silvernitrate
  • 【感光劑】kám-kng-che/kám-kng-tse/感光劑/sensitizer
  • 【隕石】ún-se̍k/ún-si̍k/隕石/meteorite
  • 【星石】chheⁿ-chio̍h/tshenn-tsio̍h/隕石/meteorite
  • 【星石坑】chheⁿ-chio̍h-kheⁿ/tshenn-tsio̍h-khenn/隕石坑/crater
  • 【有效感光度】iú-hāu kám-kng-tō͘/íu-hāu kám-kng-tōo/有效感光度/effective photographic sensitivity

  1. 逐工 ê 圖 ↩︎

  2. 本站 ê 介紹 (台語/華語) ↩︎

  3. FAQ (華語) ↩︎

昨昏 ê 圖:星系佮南天極 明仔載 ê 圖:佇冰島頂懸 ê 鳳凰極光