木星佮土星大相拄

探索宇宙1!逐工會揀一幅無仝款 ê 影像抑是相片,𤆬你熟似咱這个迷人 ê 宇宙,閣有專業天文學者2為你解說3

[漢羅] 木星佮土星大相拄

是滴!毋知影你敢捌看過木星佮土星相拄 ê 影片無?這个 kā 幾若張相片組合做縮時攝影 ê 影片是佇 泰國 翕 ê。會使看著兩粒大行星互相倚近到十分一度才分開。第一段 大相拄 是五工內兩粒行星倚近 ê 模樣,嘛會使看著衛星佮雲帶。閣來第二段是遠看,是九工 ê 影像。雖然講 木星土星 遮爾無正常佇 2020 年 12 月 21相倚,毋閣 in 兩粒猶閣有 十億公里 遠。這兩粒氣態巨行星是註定 每 19.86 年愛相拄一擺。毋閣,佇過去 397 冬,in 毋捌 行遮爾倚過。而且閣 60 冬 嘛袂行遮爾倚。你若是 願意等7541 年,你著會當看著木星對土星面頭前 行過

[POJ] Bo̍k-chheⁿ kah thó͘-chheⁿ tōa sio-tú

Sī-ti̍h! M̄-chai-iàⁿ lí kám pat khòaⁿ-kòe bo̍k-chheⁿ kah thó͘-chheⁿ sio-tú ê iáⁿ-phìⁿ bô? Chit-ê kā kúi-nā tiuⁿ siòng-phìⁿ cho͘-ha̍p chò sok-sî-liap-iáⁿ ê iáⁿ-phìⁿ sī tī thài-kok hip–ê. Ē-sái khòaⁿ-tio̍h nn̄g-lia̍p tōa-kiáⁿ-chheⁿ hō͘-siong óa-kīn kàu cha̍p-hūn-it tō͘ chia̍h hun-khui. Tē-it-tōaⁿ tōa-sió-tú sī gō͘-kang-lāi nn̄g-lia̍p kiâⁿ-chheⁿ óa-kīn ê bô͘-iūⁿ, mā ē-sái khòaⁿ-tio̍h ūi-chheⁿ kah hûn-tòa. Koh-lâi tē-jī-tōaⁿ sī hn̄g-khòaⁿ, sī kāu-kang ê iáⁿ-siōng. Sui-jiân kóng bo̍k-chheⁿ kah thó͘-chheⁿ chiah-nī bô-chèng-siông tī jī-khòng-jī-khòng nî cha̍p-jī goe̍h jī-it lâi sio-óa, m̄-koh in nn̄g-lia̍p iáu-koh-ū cha̍p-ek kong-lí hn̄g. Chi̍t nn̄g-lia̍p khì-thài kū-kiâⁿ-chheⁿ sī chù-tiāⁿ múi cha̍p-káu-tiám-peh-la̍k nî tō ài sio-tú chi̍t-pái. M̄-koh, tī kòe-khì saⁿ-pah-káu-cha̍p-chhit tang, in m̄-pat kiâⁿ chiah-nī óa–kòe. Jî-chhiáⁿ koh la̍k-cha̍p tang mā bē kiâⁿ chiah-nī óa. Lí nā-sī goān-ì tán kàu chhit-ngó͘-sù-it nî, lí tio̍h ē-tàng khòaⁿ-tio̍h bo̍k-chheⁿ tùi thó͘-chheⁿ bīn-thâu-chêng kiâⁿ–kòe.

[KIP] Bo̍k-tshenn kah thóo-tshenn tuā sio-tú

Sī-ti̍h! M̄-tsai-iànn lí kám pat khuànn-kuè bo̍k-tshenn kah thóo-tshenn sio-tú ê iánn-phìnn bô? Tsit-ê kā kuí-nā tiunn siòng-phìnn tsoo-ha̍p tsò sok-sî-liap-iánn ê iánn-phìnn sī tī thài-kok hip–ê. Ē-sái khuànn-tio̍h nn̄g-lia̍p tuā-kiánn-tshenn hōo-siong uá-kīn kàu tsa̍p-hūn-it tō͘ tsia̍h hun-khui. Tē-it-tuānn tuā-sió-tú sī gōo-kang-lāi nn̄g-lia̍p kiânn-tshenn uá-kīn ê bôo-iūnn, mā ē-sái khuànn-tio̍h uī-tshenn kah hûn-tuà. Koh-lâi tē-jī-tuānn sī hn̄g-khuànn, sī kāu-kang ê iánn-siōng. Sui-jiân kóng bo̍k-tshenn kah thóo-tshenn tsiah-nī bô-tsìng-siông tī jī-khòng-jī-khòng nî tsa̍p-jī gue̍h jī-it lâi sio-uá, m̄-koh in nn̄g-lia̍p iáu-koh-ū tsa̍p-ik kong-lí hn̄g. Tsi̍t nn̄g-lia̍p khì-thài kū-kiânn-tshenn sī tsù-tiānn muí tsa̍p-káu-tiám-peh-la̍k nî tō ài sio-tú tsi̍t-pái. M̄-koh, tī kuè-khì sann-pah-káu-tsa̍p-tshit tang, in m̄-pat kiânn tsiah-nī uá–kuè. Jî-tshiánn koh la̍k-tsa̍p tang mā bē kiânn tsiah-nī uá. Lí nā-sī guān-ì tán kàu tshit-ngóo-sù-it nî, lí tio̍h ē-tàng khuànn-tio̍h bo̍k-tshenn tuì thóo-tshenn bīn-thâu-tsîng kiânn–kuè.

[English] Jupiter and Saturn Great Conjunction: The Movie 

Yes, but have you seen a movie of Jupiter and Saturn’s Great Conjunction?The featured time-lapse video was composed from a series of images taken from Thailand and shows the two giant planets as they angularly passed about a tenth of a degree from each other. The first Great Conjunction sequence shows a relative close up over five days with moons and cloud bands easily visible, followed by a second video sequence, zoomed out, over 9 days. Even though Jupiter and Saturn appeared to pass unusually close together on the sky on December 21, 2020 , in actuality they were still nearly a billion kilometers apart. The two gas giants are destined for similar meet ups every 19.86 years . However, they had not come this close , angularly, for the past 397 years , and will not again for another 60 years . If you’re willing to wait until the year 7541 , though, you can see Jupiter pass directly in front of Saturn.

詞彙學習(台語漢字/POJ/KIP/華語漢字/English)

  • 【縮時攝影】sok-sî-liap-iáⁿ/sok-sî-liap-iánn/縮時攝影/time-lapse
  • 【氣態巨行星】khì-thài kū-kiâⁿ-chheⁿ/khì-thài kū-kiânn-tshenn/氣態巨行星/gas giant
  • 【氣態巨行星】khì-thài kū-kiâⁿ-chhiⁿ/khì-thài kū-kiânn-tshinn/氣態巨行星/gas giant
  • 【行星】kiâⁿ-chheⁿ/kiânn-tshenn/行星/planet(較袂佮「恆星」hêng-chheⁿ 仝音)
  • 【行星】kiâⁿ-chhiⁿ/kiânn-tshinn/行星/planet(較袂佮「恆星」hêng-chhiⁿ 仝音)

  1. 阮嘛有:Podcast面冊InstagramTwitter,會逐工 kā 你提醒有新 ê 翻譯 kah 錄音,緊來追蹤! ↩︎

  2. 本站 ê 介紹 (台語/華語)FAQ (華語) ↩︎

  3. 看無台文?阮讀予你聽!已經錄過 ê 文章 ↩︎

昨昏 ê 圖:地球佇日全食 ê 模樣 明仔載 ê 圖:轉返船 ê 痕跡