12. May 2022

「銀河中心的大烏洞」全球記者會

今仔日 2022/5/12 下暗 8:30，毋知你有做伙關心咱銀河中心的大烏洞無？

若是無，緊來複習一下：

這馬來共逐家鬥 summarize 一下：

銀河中心的烏洞叫做「人馬座 A*」，是人類歷史上第二擺觀測著的烏洞（頭一擺 2019 年觀測著的烏洞是 M87 星系的烏洞），人馬座 A* 是離咱上近的超大質量烏洞，伊的質量是 400 萬个太陽質量。
咱看著的兩个烏洞攏是用「Event Horizon Telescope (EHT) 事件視界望遠鏡」觀測著的。這是一个用全世界 8 組電波望遠鏡組合起來、模擬做一个佮地球平大的望遠鏡，才有法度觀測著烏洞。
銀河中心的烏洞佮 M87 星系的烏洞看起來攏是「甜箍麭」形，表示講「圓箍仔」外形應該是烏洞的特徵。
銀河中心的烏洞比 M87 較細 2000 倍，毋閣伊比 M87 較近 2000 倍，所以 in 兩个看起來差不多平大。
研究烏洞的 EHT 團隊攏總有 300 外人 80 外个團隊，其中台灣團隊就佔 40 外人，包括中央研究院天文佮天文物理研究所、台灣師範大學、中山大學、台灣大學等。
研究團隊開 5 年的時間，才完成銀河中心烏洞觀測資料的分析。

逐家辛苦矣！感謝研究團隊！嘛感謝全世界的納稅人！這个成果屬於全體人類！