讀天文敢若無啥物路用？

最近足衝的話題是，讀 XX 有啥物路用？

其實阮嘛定定去予人問講，讀天文有啥物路用？讀這敢會當趁錢？

講實在的，讀天文毋若袂趁錢，閣愛一直貼錢。按呢講起來，讀天文的敢若是「了尾仔囝」的款？😅

.

天文學家做研究，定定愛用地面大型望遠鏡 佮 太空望遠鏡，這攏是咧開政府的錢（就是各位納稅人的錢啦！😘）

就算是一般人，干焦是愛翕天文相片的、愛觀星的，買 kha-mé-lah、買天文望遠鏡，嘛是一直咧了錢，袂趁錢。

是講，這个世界若是無天文學家、無愛好天文的人，日頭猶是逐工 ùi 東爿 peh--起來，ùi 西爿落落去，這个世界嘛是繼續咧行，閣通省錢。

按呢講來，這个世界無天文學家、無愛好天文的人，嘛無差呢！

.

毋閣就是因為有天文學家，咱才會知影地球毋是太陽系的中心、太陽毋是銀河系的中心、銀河系毋是宇宙的中心。

就是因為有天文學家，咱才會知影日食、月食是一款天文現象，毋是啥物巫術。

就是因為有天文學家，咱才會知影「水逆會影響咱的生活」是烏白講啦！（毋閣天文學家講甲喙角全波，逐家猶是無咧信篤 😎 。）

就是因為有愛翕天文相片的人，咱才逐工有美麗的天文圖通欣賞。

.

毋閣若是無平靜的社會，就無可能有人有閒仔錢來翕天文相片予逐家欣賞。

若是無各位納的稅，政府就無可能有錢通提予天文學家做研究。

所以天文的智識，是全體人類合作的成果。

阮有通讀這个看起來無啥路用的科系，愛感謝逐家的有路用！

.

落尾就用今仔日看著的 這篇文章 做 ending：

「我必須學習政治和戰爭，這樣我的兒子才有機會去學習數學、哲學、地理、博物、商業和農業，這樣他的孩子，才有機會學習繪畫、詩歌、音樂、建築、雕塑、編織和陶瓷。」美國開國元勳約翰·亞當斯說。

即便某些專業，真的沒有「實用價值」，真的沒有「經濟效益」，那又如何？

因為，能允許一群人鑽研無用之學，是社會所能達到的──最高境界。