☯ 6 月 10 號 ê 金環日食

六月 10 號有金環日食 (Kim-khoân ji̍t-si̍t)，這擺干焦 tī 加拿大、格陵蘭、露西亞看會著。

雖然台灣看無，毋閣咱猶是會當來了解一下仔，啥物是金環日食？啥物是日全食 (Ji̍t-choân-si̍t)？啥物是日偏食 (Ji̍t-phian-si̍t) ？

台灣後擺欲看著日偏食 ê 時間愛閣等五個月，等到 11 月 19 彼工。

☯ 日食是按怎發生 ê？

月球行到地球 kah 太陽中央 ê 時陣，to̍h 會發生日食 (ji̍t-si̍t)。

• Ùi 太陽 ê 角度來看，月球會 tī 地球表面產生烏影。
• 中央較烏 ê 叫做本影 (pún-iáⁿ)，外沿彼輾較無遐烏 ê 叫做半影 (pòaⁿ-iáⁿ)。
• 月球若是離咱較遠，中央較烏彼區 to̍h 叫做偽本影 (gūi-pún-iáⁿ)。

Ùi 地球 ê 角度來看，日頭會去予月娘閘去。

• 你若是徛 tī 本影區，to̍h 會看著月娘 kā 規粒日頭閘咧，這 to̍h 是日全食 。
• 你若是徛 tī 偽本影區，to̍h 會看著月娘干焦閘著日頭中央彼搭，這 to̍h 是金環日食。
• 你若是徛 tī 半影區，to̍h 會看著月娘 kā 一部份日頭閘咧，這 to̍h 是日偏食。

☯ 是按怎有當時仔會有金環日食？

月球軌道 (kúi-tō) 其實毋是正圓 (chiàⁿ-îⁿ)，是一个足倚正圓 ê 長株圓 (tn̂g-tu-îⁿ) 軌道。所以月娘有當時仔離咱較近，有當時仔離咱較遠。

較近 ê 月娘看起來較大粒，較遠 ê 月娘看起來較細粒。

較細粒 ê 月娘無法度 kā 日頭完全閘牢，to̍h 會產生金環日食 。