30. May 2021
啥物是「水逆 Chúi-ge̍k」？
★ 我最近足衰 ê，敢是水逆 kā 我害 ê？
其實，咱毋若有「水逆 Chúi-ge̍k」水星逆行 Chúi-chhiⁿ Ge̍k-hêng，猶閣有
- 「金逆 Kim-ge̍k」金星逆行 Kim-chhiⁿ Ge̍k-hêng
- 「火逆 Hóe-ge̍k」火星逆行 Hóe-chhiⁿ Ge̍k-hêng
- 「木逆 Bo̍k-ge̍k」木星逆行 Bo̍k-chhiⁿ Ge̍k-hêng
- 「土逆 Thó͘-ge̍k」土星逆行 Thó͘-chhiⁿ Ge̍k-hêng
- 「天王逆 Thian-ông-ge̍k」天王星逆行 Thian-ông-chhiⁿ Ge̍k-hêng
- 「海王逆 Hái-ông-ge̍k」海王星逆行 Hái-ông-chhiⁿ Ge̍k-hêng
而且離地球上近 ê 是金星，紲落來是火星，閣來才是水星。 若是講行星逆行會影響著你，按呢你應該愛先怪金星，毋是水星。
是水星較衰，遠遠仔 tī 遐 leh 行路嘛予你嫌。
★ 行星逆行 (Kiâⁿ-chhiⁿ Ge̍k-hêng) 是按怎發生 ê？
天體 tī 天頂平常時 ê 運行方向 to̍h kā 叫做「順行 Sūn-hêng」。 若是顛倒行，to̍h 叫做「逆行 Ge̍k-hêng」。
Tī 太陽系內底，逐粒行星踅太陽 ê 速度無仝，離太陽較近 ê 行較緊，離太陽較遠 ê 行較慢。
離太陽較近 ê 行星，一定會逐著離太陽較遠 ê 行星。彼當陣 to̍h 會看著行星逆行 ê 現象。這是一款相對運動，所以兩粒行星攏會看著另外一粒 ê 逆行現象。 這是投影 tī 天頂 ê 現象，並毋是行星真正 leh 倒退攄。
這 to̍h 親像你坐 tī 轎車內底，逐著頭前彼台駛較慢 ê 公車仝款。
逐著公車 ê 時陣你敢會變衰潲？
若是袂，是按怎去予水星逐著你會變衰潲？
若是會，按呢水星人嘛會使講「我最近足衰 ê，敢是地逆（地球逆行）kā 我害 ê？」